କଟକ: ପୁଣି ସିଲଭର ସିଟିରେ ଲୁଟେରା ଆତଙ୍କ । ଗତ ମଙ୍ଗଳବାର କିଛି ଲୁଟେରା ମଧୁପାଟଣା ଥାନା ଅନ୍ତର୍ଗତ ପ୍ରମିଳା ମଣ୍ଡପ ମାର୍କେଟ କମ୍ପ୍ଲେକ୍ସର ଏକ ମୋଟର ପାର୍ଟସ ଦୋକାନରୁ ଲକ୍ଷାଧିକ ଟଙ୍କାର ଜିନିଷ ଲୁଟ୍ କରି ନେଇଛନ୍ତି । ଯାହା ସମଗ୍ର ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି ।
ସୂଚନା ମୁତାବକ, ଗତ ମଙ୍ଗଳବାର ବିଳମ୍ବିତ ରାତିରେ କିଛି ଲୁଟେରା ଫିଲ୍ମ ଷ୍ଟାଇଲରେ ଆସି ମଧୁପାଟଣା ସମ୍ରାଟ ହଲ ସାମ୍ନାରେ ଥିବା ପ୍ରମିଳା ମଣ୍ଡପର ମାର୍କେଟ କମ୍ପ୍ଲେକ୍ସର ଏକ ମୋଟର ପାର୍ଟସ ଦୋକାନରୁ ଲୁଟପାତ କରିଛନ୍ତି । ପ୍ରଥମେ ସେମାନେ ଦୋକାନର ସଟର ତାଡିବାକୁ ଚେଷ୍ଟା କରିଥିଲେ । ପରେ ଏଥିରେ ବିଫଳ ହେବାପରେ ଗ୍ୟାସ କଟର ମାଧ୍ୟମରେ ଦୋକାନର ସଟରକୁ କାଟିଥିଲେ । ଏହାପରେ ଦୋକାନର କାନ୍ଥକୁ ତାଡି ପ୍ରାୟ ୮ ଲକ୍ଷରୁ ଊର୍ଦ୍ଧ୍ବ ଟଙ୍କାର ସାମଗ୍ରୀ ଲୁଟ କରିଥିବା କହିଛନ୍ତି ଦୋକାନ ମାଲିକ ବିଚିତ୍ରା ନନ୍ଦ ରାଉତରାୟ ।
ତେବେ ସବୁଠାରୁ ବଡ ଆଶ୍ଚର୍ଯ୍ୟ କଥା ହେଲା ଏହି ଘଟଣାଟି ଘଟିଛି ନିକଟରେ ଥିବା ମଧୁପାଟଣା ଥାନା ନିକଟରେ । ତେବେ ଏଭଳି ସ୍ଥାନରୁ ଏତେ ବଡ ଧରଣର ଲୁଟ ହେବା ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
