କଟକ: ଚୌଦ୍ବାର ଥାନା ଅନ୍ତର୍ଗତ ଶଙ୍କରପୁର ରାସ୍ତାରେ ଲୁଟ ଉଦ୍ୟମ ଘଟଣାରେ 4 ଅଭିଯୁକ୍ତଙ୍କୁ ଗିରଫ କରିଛି ଚୌଦ୍ବାର ଥାନା ପୋଲିସ । ସେମାନଙ୍କ ନିକଟରୁ ଏକ ଦେଶୀ ବନ୍ଧୁକ, ମୋବାଇଲ ଓ 2ଟି ବାଇକ ଜବତ କରାଯାଇଛି । ଗିରଫ ହୋଇଥିବା ଅଭିଯୁକ୍ତମାନେ ହେଉଛନ୍ତି ଯାଜପୁର ଧର୍ମଶାଳା ଥାନା ପାଟପୁର ଗ୍ରାମର ମକରା ଓରଫ ପ୍ରକାଶ ମଲ୍ଲିକ, ମିଲୁ ଓରଫ ପ୍ରକାଶ ସେଠୀ, ମହଙ୍ଗା ଅଞ୍ଚଳର ସନ୍ତୋଷ ସେଠୀ ଓ ବଳିଆ ଓରଫ ସଞ୍ଜୟ ବେହେରା ।
ସୂଚନାନୁଯାୟୀ ଗତ 19 ତାରିଖ ରାତିରେ ଶଙ୍କରପୁର ଗ୍ରାମର ଘନଶ୍ୟାମ ରାଉତ ଚାରବାଟିଆ ବଜାରରୁ କାମ ସାରି ଶଙ୍କରପୁରକୁ ଯାଉଥିବା ବେଳେ 6 ଜଣ ଦୁର୍ବୃତ୍ତ 2ଟି ବାଇକରେ ଆସି ଶଙ୍କରପୁର ରେଲୱେ କ୍ରସିଂଠାରେ ମେଡ଼ିକାଲ ଯିବାକୁ ରାସ୍ତା ପଚାରିବା ବାହାନା କରି ତାଙ୍କୁ ଅଟକାଇଥିଲେ । ସେମାନଙ୍କ ମଧ୍ୟରୁ ଜଣେ ଯୁବକ ହଠାତ୍ ବନ୍ଧୁକ ଦେଖାଇ ଘନଶ୍ୟାମଙ୍କୁ ଲୁଟ ଉଦ୍ୟମ କରିଥିଲେ । ଠିକ୍ ଏହି ସମୟରେ ସେହି ରାସ୍ତାରେ ଘରକୁ ଫେରୁଥିବା 2 ସ୍ଥାନୀୟ ବାସିନ୍ଦା ଅଟକି ଯିବାରୁ ଲୁଟେରାମାନେ ଫେରାର ହୋଇଯାଇଥିଲେ।
ତେବେ ଲୁଟେରାମାନେ ଘନଶ୍ୟାମଙ୍କର ଗାଡି ଚାବି ଓ ମୋବାଇଲ ନେଇ ପଳାଇ ଯାଇଥିଲେ । ଅଭିଯୋଗ ଆଧାରରେ ପୋଲିସ ଘଟଣାର ତଦନ୍ତ କରି ଏହି ଡକାୟତଙ୍କୁ ଗିରଫ କରିଥିବା କଟକ ଡିସିପି କହିଛନ୍ତି ।
କଟକରୁ ନାରାୟଣ ସାହୁ, ଇଟିଭି ଭାରତ
