କଟକ: କ୍ରାଇମ ପେଟ୍ରୋଲ ଦେଖି ଫିଲ୍ମ ଷ୍ଟାଇଲରେ ଲୁଟ କରି ଗିରଫ ହେଲେ ଘରୋଇ ଫାଇନାନ୍ସ କମ୍ପାନୀର ମହିଳା ଏଜେଣ୍ଟ । ମହିଳାଙ୍କ ସହ ତାଙ୍କ ପ୍ରେମିକ ଓ ଅନ୍ୟ ଜଣେ ନାବାଳକକୁ ଗିରଫ କଲା ଲାଲବାଗ ଥାନା ପୋଲିସ । ଗିରଫ ଅଭିଯୁକ୍ତ ହେଲେ ପ୍ରିୟଙ୍କା ସାହୁ ଓ ତାଙ୍କ ପ୍ରେମିକ ଅରବିନ୍ଦ ନାୟକ ।
ଦୁଇ ଦିନ ତଳେ ଅର୍ଥାତ ଗତ ୨ ତାରିଖରେ ପ୍ରିୟଙ୍କା ନିଜ ଅଫିସ ସୁପରଭାଇଜର ସାଦିୟା ଖାତୁନଙ୍କୁ ଟଙ୍କା ନେବା ପାଇଁ ସୂତାହାଟ ଚର୍ଚ୍ଚ ନିକଟକୁ ଡାକିଥିଲେ । ସାଦିୟା ପହଞ୍ଚିବା ପରେ ଦୁଇଜଣ ବ୍ୟକ୍ତି ହଠାତ ବାଇକରେ ଆସି ସାଦିୟାଙ୍କ ପାଖରେ ଥିବା ଟଙ୍କା ବ୍ୟାଗ ଲୁଟି ନେଇଥିଲେ । ତେବେ ଲୁଟ ନେଇ ସାଦିୟା ଲାଲବାଗ ଥାନାରେ ଅଭିଯୋଗ କରିବା ପରେ ପୋଲିସ ଆରମ୍ଭ କରିଥିଲା ତଦନ୍ତ । ପ୍ରିୟଙ୍କାଙ୍କ ଉପରେ ସନ୍ଦେହ କରି ପଚରାଉଚୁରା କରିବାରୁ ସେ ଲୁଟ କଥା ମାନିଥିଲେ ।
ପୋଲିସ କହିବା ଅନୁସାରେ ପ୍ରିୟଙ୍କା ଏକ ଘରୋଇ ଫାଇନାନ୍ସ କମ୍ପାନୀରେ ଏଜେଣ୍ଟ ଭାବେ କାମ କରନ୍ତି । ଟଙ୍କା ଆବଶ୍ୟକ ପଡିବାରୁ ସେ ନିଜ ପ୍ରେମିକ ସହ ମିଶି ଟିଭି କାର୍ଯ୍ୟକ୍ରମ କ୍ରାଇମ ପେଟ୍ରୋଲ ଢଙ୍ଗରେ ଏହି ଲୁଟ ପାଇଁ ଯୋଜନା କରିଥିଲେ । ତେବେ ପୋଲିସ ଉଭୟଙ୍କ ଠାରୁ ୩୫ ହଜାର ଟଙ୍କା ଜବତ କରିବା ସହ ତାଙ୍କୁ ସହଯୋଗ କରିଥିବା ଜଣେ ନାବାଳକକୁ ଗିରଫ କରି ୩ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଛି ।
ଇଟିଭି ଭାରତ, କଟକ
