କଟକ: ମହାନଗର ନିଗମ ୨୬ ନମ୍ବର ୱାର୍ଡର କାଠଗଡା ଓ କୁମ୍ଭାର ସାହିରେ ଏବେ ଘରେ ଘରେ ଡେଙ୍ଗୁ ରୋଗୀ। ସ୍ଥିତି ଏତେ ସଙ୍ଗୀନ ଯେ, ଗୋଟିଏ ଗୋଟିଏ ପରିବାରର ସମସ୍ତ ସଦସ୍ୟଙ୍କୁ ଡେଙ୍ଗୁ ହୋଇଛି। ଅକ୍ଟୋବର ୨୨ରୁ କୁମ୍ଭାର ସାହି ଅଞ୍ଚଳରେ ଡେଙ୍ଗୁ ରୋଗୀ ଚିହ୍ନଟ ହେବାପରେ ଏହା ଦିନକୁ ଦିନ ବ୍ୟାପିବାରେ ଲାଗିଛି। ଅଞ୍ଚଳରେ ୨୫ରୁ ଅଧିକ ଲୋକ ଡେଙ୍ଗୁରେ ଆକ୍ରନ୍ତ ହୋଇଥିବା ଜଣାପଡିଛି। ଯାହାକୁ ନେଇ ଅଞ୍ଚଳବାସୀଙ୍କ ମଧ୍ୟରେ ଭୟର ବାତାବରଣ ସୃଷ୍ଟି ହୋଇଛି।
ସିଏମସି ଠିକ ଭାବରେ ସଫେଇ କରୁନଥିବାରୁ ଏଭଳି ପରିସ୍ଥିତି ଉପୁଜୁଥିବା ସ୍ଥାନୀୟ ଲୋକ ଅଭିଯୋଗ କରିଛନ୍ତି । ତେବେ ଏନେଇ କଟକ ମହାନଗର ନିଗମକୁ ଜଣାଇଥିଲେ ମଧ୍ୟ କୌଣସି ସୁଫଳ ମିଳିନଥିବା ସେମାନେ କହିଛନ୍ତି । ରୋଗୀ ଚିହ୍ନଟ ପରେ ଅଞ୍ଚଳରେ ସଚେତନତା ସୃଷ୍ଟି କରିଛି ସିଏମସି । ମଶା ଦାଉରୁ ରକ୍ଷା ନିମନ୍ତେ ଦୈନିକ ଧୂଆଁ ଓ ମଶା ତେଲ ପ୍ରୟୋଗ କରାଯାଉଛି । ଆଙ୍ଗନବାଡି କର୍ମୀ, ଆଶା ଏନେଇ ଲୋକଙ୍କୁ ସଚେତନ କରାଉଛନ୍ତି ।
ଲୋକଙ୍କ ଘରୁ ହିଁ ଡେଙ୍ଗୁ ଲାର୍ଭା ସୃଷ୍ଟି ହେଉଥିବା ଜଣାପଡିଛି। ସଚେତନତା ଅଭାବରୁ ଡେଙ୍ଗୁ ବ୍ୟାପୁଥିବା କହି ନିଜ ଦୋଷ ଛଡାଇ ଦେଇଛି ସିଏମସି । ସହରରେ ରୋଗ ବ୍ୟାପୁଥିବାରୁ ଲୋକଙ୍କ ମଧ୍ୟରେ ଭୟ ସୃଷ୍ଟି ହୋଇଛି। ଯଦିଓ ପୂର୍ବବର୍ଷ ତୁଳନାରେ ଚଳିତବର୍ଷ ଡେଙ୍ଗୁରୋଗୀଙ୍କ ସଂଖ୍ୟା କମିଛି, ତେବେ ଯେକୌଣସି ମୁହୂର୍ତ୍ତରେ ଏହା ବ୍ୟାପିବାର ସମ୍ଭାବନା ଅଛି। ଏନେଇ ସଚେତନ ନ ରହିଲେ ପରିସ୍ଥିତି ଭାୟବହ ହେବାର ଆଶଙ୍କା ରହିଛି ।
କଟକରୁ ନାରାୟଣ ସାହୁ, ଇଟିଭି ଭାରତ
