କଟକ: ଗିରଫ ହେଲା କୁଖ୍ୟାତ ଅପରାଧୀ ଉମର ଫାରୁକ୍ । ଦୁଇ ବର୍ଷ ଧରି ତେଲେଙ୍ଗାନାରୁ ଫେରାର ଥିବା ବେଳେ ଗତକାଲି(ବୁଧବାର) ରାତିରେ ଫାରୁକକୁ ଚଳନ୍ତା ଟ୍ରେନରୁ ଗିରଫ କରିଛି କଟକ ରେଳବାଇ ପୋଲିସ । କରମଣ୍ଡଳ ଏକ୍ସପ୍ରେସରେ ଚେନ୍ନାଇ ଯାଉଥିଲା ବେଳେ କଟକ ଷ୍ଟେସନରୁ ଗିରଫ କରିଛି ରେଳବାଇ ପୋଲିସ ।
ସୂଚନାଅନୁସାରେ, ଫାରୁକ୍ ଏକ ହତ୍ୟା ମାମଲାରେ ଦୁଇ ବର୍ଷ ହେବ ତେଲେଙ୍ଗାନାର ରାଏ ଦୁର୍ଗମ ଥାନା ଅଞ୍ଚଳରୁ ଫେରାର ହୋଇଯାଇଥିବା ବେଳେ ଫାରୁକକୁ ମୋଷ୍ଟ ଓ୍ବାଣ୍ଟେଡ କ୍ରିମିନାଲ ଘୋଷଣା କରିଥିଲା ସ୍ଥାନୀୟ ପୋଲିସ । ତେବେ ଅପରାଧ ଘଟାଇ ଫେରାର ହେବା ପରେ ଫାରୁକକୁ ଗିରଫ କରିବା ପୋଲିସ ପାଇଁ ସୃଷ୍ଟି ହୋଇଥିଲା ବଡ଼ ଚାଲେଞ୍ଜ ।
ଅପରାଧୀମାନେ ଫେରାର ପାଇଁ ଟ୍ରେନକୁ ମୁଖ୍ୟ ପନ୍ଥା ବାଛିଥିବାବେଳେ ପୋଲିସ ସିଧାସଳଖ RPFକୁ ଏନେଇ ସୂଚନା ଦେଇଥିଲା । ତେବେ ଅନେକ ଦିନର ଲୁଚକାଳି ଖେଳ ପରେ ଚଳନ୍ତା ଟ୍ରେନରୁ ଗିରଫ ହୋଇଛି ଫାରୁକ୍ । ହାର୍ଡକୋର ଅପରାଧୀ ଫାରୁକକୁ ଗିରଫ କରିବା ପରେ ତେଲେଙ୍ଗାନାରୁ ଆସିଥିବା ଏକ ସ୍ୱତନ୍ତ୍ର ପୋଲିସକୁ ହସ୍ତାନ୍ତର କରିଛି କଟକ ରେଳବାଇ ପୋଲିସ ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
