କଟକ: ଅନଲକ 3 ଜାରି ହେବା ପରେ ଆଜିଠୁ ଖୋଲିଛି ଜିମ । ଦୀର୍ଘ ପାଞ୍ଚ ମାସ ଧରି ବନ୍ଦ ପଡିଥିବା ଏହି ଅନୁଷ୍ଠାନ ପୁଣିଥରେ ଖୋଲାଯାଇଛି । ମହାମାରୀ କୋରୋନା ଯୋଗୁଁ ଖାଁ ଖାଁ ରହିଥିଲା ଜିମ ।
ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ଅନଲକ 3 ଗାଇଡ଼ଲାଇନ ଅନୁସାରେ ଜିମ ଖୋଲାଯାଇଛି । ତେବେ ଜିମରେ ଝାଳକୁ ନେଇ ଯେଉଁ ଚିନ୍ତା ରହିଥିଲା, ତାହା ଦୂର ହୋଇଛି । ସମସ୍ତ ପ୍ରକାରର କୋରୋନା କଟକଣାକୁ ପାଳନ କରି ଜିମ ଚଲାଇବା ପାଇଁ ଜିମ ମାଲିକମାନେ ନିଷ୍ପତ୍ତି ନେଇଛନ୍ତି । ଜିମକୁ ଆସୁଥିବା ଲୋକମାନଙ୍କର ସ୍କ୍ରିନିଂ ସହିତ ଟେମ୍ପ୍ରେଚର ମପାଯିବ । ଏହା ସହିତ ସାନିଟାଇଜ ଓ ସାମାଜିକ ଦୂରତା ଉପରେ ମୁଖ୍ୟ ଦୃଷ୍ଟି ଦିଆଯିବା ବୋଲି ଜିମ ମାଲିକ କହିଛନ୍ତି । ପ୍ରତି ଏକ ଘଣ୍ଟାପରେ ଜିମକୁ ସାନିଟାଇଜ କରାଯିବ । ଜିମରେ ସମସ୍ତ ପ୍ରକାରର କୋରୋନା ନିୟମକୁ କଡାକଡି ଭାବେ ପାଳନ କରିବା ପାଇଁ ଜିମ ମାଲିକ କହିଛନ୍ତି ।
ଜିମ୍ ମାଲିକମାନଙ୍କୁ ପ୍ରତି ବ୍ୟକ୍ତିଙ୍କ ପାଇଁ ଚାରି ମିଟର ଦୂରତା ରହିବା ପାଇଁ ଏବଂ ଯନ୍ତ୍ରପାତି ଗୁଡିକ ଛଅ ଫୁଟ ଦୂରରେ ରଖିବା ପାଇଁ କେନ୍ଦ୍ର କହିଛି । କାନ୍ଥରେ ଉପଯୁକ୍ତ ଦିଗ ଚିହ୍ନ ସହିତ ବିଲ୍ଡିଂ ଭିତରକୁ ପ୍ରବେଶ ଏବଂ ପ୍ରସ୍ଥାନ ପାଇଁ ନିର୍ଦ୍ଦିଷ୍ଟ ପଥ ସୃଷ୍ଟି କରିବାକୁ କେନ୍ଦ୍ର ଏବଂ ଜିମ୍ ମାଲିକମାନଙ୍କୁ ମଧ୍ୟ ନିର୍ଦ୍ଦେଶ ଦେଇଛି।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
