କଟକ: କଟକ କମିସନରେଟ ପୋଲିସ ହାତରେ ଧରାପଡ଼ିଲା ଦୁର୍ଦ୍ଦାନ୍ତ ଅପରାଧୀ ସକିଲର ଗାର୍ଲଫ୍ରେଣ୍ଡ ତଥା ଲେଡି ଡନ ବେବି ଓରଫ ମାନସୀ ନାୟକ। ଗ୍ୟାଙ୍ଗଷ୍ଟର ସକିଲ ପାଇଁ କାର୍ଯ୍ୟ କରି ଫିରିଙ୍ଗିବଜାର ଅଞ୍ଚଳର ଜଣେ ବିଲଡରଙ୍କୁ ବଟି ମାଗିବା ଅଭିଯୋଗରେ ଲାଲବାଗ ଥାନା ପୋଲିସ ବେବିକୁ ଗିରଫ କରିଛି। ବଟି ମାଗିବା ସହ ମାଡ ମାରିଥିବା ଅଭିଯୋଗ ହୋଇଛି ।
୨୦୧୫ ମସିହାରେ ବେବି ଏକ ହତ୍ୟା ମାମଲାରେ ଜେଲ ମଧ୍ୟ ଯାଇଥିଲା । ତା ନାଁ’ରେ ପୂର୍ବରୁ ମଧ୍ୟ ଅନେକ ଅପରାଧିକ ମାମଲା ଥିଲା । ବର୍ତ୍ତମାନ ସେ କଟକ ସହରରେ ଗ୍ୟାଙ୍ଗଷ୍ଟର ସକିଲ ପାଇଁ କାର୍ଯ୍ୟ କରୁଥିବା ନେଇ ପୋଲିସକୁ ସୂଚନା ମିଳିଥିଲା। ଗତ ସପ୍ତାହରେ ଶିଶୁ ଭବନ ଛକ ପାଖେ କିଛି ଦୁର୍ବୃତ୍ତ ଜଣେ ବିଲଡରଙ୍କୁ ଦାଦା ବଟି ମାଗିବା ସହ ତାଙ୍କୁ ଆକ୍ରମଣ କରିଥିଲେ।
ଏନେଇ ଲାଲବାଗ ଥାନାରେ ଏତଲା ଦିଆଯାଇଥିବା ବେଳେ ଏହି ଦୁବୃର୍ତ୍ତ ମାନଙ୍କୁ ବେବି ସହଯୋଗ କରୁଥିଲା ବୋଲି ଅଭିଯୋଗ ହୋଇଥିଲା । ହେଲେ ଏତଲାରେ ତାଙ୍କ ନାଁ ନଥିଲା। ତେବେ ପୋଲିସ ବେବିକୁ ଏବେ କୋର୍ଟ ଚାଲାଣ କରିଛି ।
କଟକରୁ ନାରୟଣ ସାହୁ, ଇଟିଭି ଭାରତ
