କଟକ: ମୁଣ୍ଡଳୀ ବ୍ୟାରେଜ ନିକଟରେ ଫସି ରହିଥିବା ଦନ୍ତା ହାତୀଟିକୁ ନେଇ ଏବେ ଜୋର ଧରିଛି ଚର୍ଚ୍ଚା । ବିଳମ୍ବିତ ରାତି ପର୍ଯ୍ୟନ୍ତ ହାତୀଟି ନଦୀ ଭିତରେ ଫସି ରହି ନିଜ ଜୀବନ ବଞ୍ଚାଇବାକୁ ଚେଷ୍ଟା ଜାରି ରଖିଥିଲା ବେଳେ, ଆଜି ସକାଳୁ ଉକ୍ତ ସ୍ଥାନରେ ନଥିବା ଜଣାପଡିଛି । ତେବେ ହାତୀଟିର ମୃତ୍ୟୁ ହୋଇଯାଇଥିବା କିଛି ସ୍ଥାନୀୟ ଲୋକ କହୁଥିବାବେଳେ ଏନେଇ କୌଣସି ସ୍ପଷ୍ଟ ସୂଚନା ମିଳିପାରି ନାହିଁ ।
କୁଆଡେ ଗଲା ହାତୀ ? ମୃତ ନା ଜୀବିତ !
କିଛି ସ୍ଥାନୀୟ ଲୋକଙ୍କ କହିବା ଅନୁଯାୟୀ, ହାତୀଟି ତାର ଶୁଣ୍ଢକୁ ପାଣିରେ ବୁଡାଇ ପଡିଥିଲା । ସେ ଅତି ଦୁର୍ବଳ ଅବସ୍ଥାରେ ପଡିଥିଲା । ହୁଏତ ସେ ମୃତ୍ୟୁବରଣ କରି ନଦୀ ସ୍ରୋତରେ ଭାସି ଯାଇଥାଇପାରେ । ସେହିପରି ହାତୀଟି ରାତିରେ ନଦୀରୁ ବାହାରି ଜଙ୍ଗଲକୁ ଚାଲି ଯାଇଥାଇପାରେ ବୋଲି ମଧ୍ୟ କୁହାଯାଉଛି । ତେବେ ଏନେଇ ବନ ବିଭାଗ ପକ୍ଷରୁ କୌଣସି ସୂଚନା ଦିଆଯାଇନାହିଁ । ହାତୀଟି ଯଦି ପ୍ରାଣ ହରାଇଥିବ ତେବେ ତା'ର ଶରୀର ମିଳିଲେ ହିଁ ଏନେଇ ସ୍ପଷ୍ଟ ହେବ ।
କଟକରୁ ନାରାୟଣ ସାହୁ, ଇଟିଭି ଭାରତ
