କଟକ: ପୁଣି କୋର୍ଟରେ ହାଜର ହେଲେ ଡି ବ୍ରଦର୍ସ । ପ୍ରାୟ ଗୋଟିଏ ମାସର ବ୍ୟବଧାନ ପରେ ଆଜି (ସୋମବାର) କୋର୍ଟରେ ହାଜର ହୋଇଛନ୍ତି କୁଖ୍ୟାତ ଅପରାଧୀ ଭ୍ରାତା ଡି-ବ୍ରଦର୍ସ । ଦୁଇ ଭାଇଙ୍କୁ କଡା ସୁରକ୍ଷା ବଳୟ ମଧ୍ୟରେ ବଲାଙ୍ଗୀର ଓ ବାଲେଶ୍ବର ଜେଲରୁ ଆଣି କଟକ ଏସଡିଜେଏମଙ୍କ କୋର୍ଟଙ୍କରେ ହାଜର କରାଯାଇଥିଲା । ଜଣେ ବ୍ୟକ୍ତିଙ୍କୁ ଡି-ଗ୍ୟାଙ୍ଗରେ କାମ କରିବା ପାଇଁ ଧମକ ଦେବା ଅଭିଯୋଗରେ ଗତ ନଭେମ୍ବର ମାସରେ ଲାଲବାଗ ପୋଲିସ ଏକ ମାମଲା ରଜ୍ଜୁ ହୋଇଥିଲା ।
ସେହି ଘଟଣାରେ ଡି-ବ୍ରଦର୍ସଙ୍କ ୪ ଜଣ ସହଯୋଗୀ ଓ ଦୁଇଟି ବନ୍ଧୁକ ସହ ଗୁଳି ମଧ୍ୟ ଜବତ ହୋଇଥିଲା । ସେହି ମାମଲାରେ ଡି-ବ୍ରଦର୍ସଙ୍କ ଭୁମିକା ସାମନାକୁ ଆସିବା ପରେ ଦୁଇ ଭାଇଙ୍କୁ ସମ୍ପୃକ୍ତ ମାମଲାରେ ଯୋଡିବା ପାଇଁ ପୋଲିସ କୋର୍ଟରେ ଆବେଦନ କରିଥିଲା । ଫଳସ୍ବରୂପ କୋର୍ଟଙ୍କ ନିର୍ଦ୍ଦେଶ ପରେ ଉଭୟଙ୍କୁ ହାଜର କରାଯାଇଥିଲା । ଏହି ମାମଲାକୁ ମିଶାଇ ଦୁଇ ଭାଇଙ୍କ ନାଁରେ ମୋଟ ୩୨ଟି ମାମଲା ରୁଜ୍ଜୁ ହୋଇ ସାରିଲାଣି ।
କଟକରୁ ନାରାୟଣ ସାହୁ, ଇଟିଭି ଭାରତ
