କଟକ: ପାର୍ବଣ ପାଇଁ ପ୍ରସ୍ତୁତ କଟକ କମିଶନରେଟ ପୋଲିସ । ବିଶେଷକରି ଏହି ସମୟରେ ଯେପରି କୌଣସି ବିଶୃଙ୍ଖଳା ନଘଟେ, ସେନେଇ ବ୍ୟାପକ ପଦକ୍ଷେପ ନିଆଯାଉଛି । ପୋଲିସ ପକ୍ଷରୁ ସ୍ପେସିଆଲ ଡ୍ରାଇଭ କରାଯାଉଛି ବୋଲି ଗଣମାଧ୍ୟମରେ ପ୍ରତିକ୍ରିୟା ରଖିଛନ୍ତି କଟକ ଡିସିପି ପିନାକ ମିଶ୍ର । କଟକ କମିଶନରେଟ ପୋଲିସ ଅଧିନରେ ଥିବା ପ୍ରତ୍ୟକ ଥାନା ଅଞ୍ଚଳରେ ଅପରାଧୀମାନଙ୍କୁ ଚିହ୍ନଟ କରି ସେମାନଙ୍କ ଉପରେ କଡା ନଜର ରଖାଯାଉଛି ବୋଲି ସେ କହିଛନ୍ତି ।
ବିଶେଷ କରି ଏହି ସମୟରେ ବଟି ଆଦାୟର ଅନେକ ଅଭିଯୋଗ ଆସିଥାଏ । ଅପରାଧୀ ମାନେ ବିଭିନ୍ନ ଯୋଜନା ମାଧ୍ୟମରେ ବଟି ଆଦାୟ କରିଥାଆନ୍ତି । ଯାହାକି ପୋଲିସ ପାଇଁ ବଡ଼ ଚାଲେଞ୍ଜ ସୃଷ୍ଟି କରିଥାଏ । ଏଥିପାଇଁ ପେସାଦାର ଅପରାଧୀଙ୍କ ମଧ୍ୟରେ ଗଣ୍ଡଗୋଳର ସମ୍ଭାବନା ମଧ୍ୟ ରହିଥାଏ । ତେବେ ଏଥିପାଇଁ କଡା ନଜର ରଖିବାକୁ କଟକ କମିଶନରେଟ ପୋଲିସ ଅଧିନରେ ଥିବା ପ୍ରତ୍ୟକ ଥାନାଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି । ସେହିପରି ଜେଲ ଫେରନ୍ତାଙ୍କ ଉପରେ ମଧ୍ୟ କଡା ନଜର ରଖିବାକୁ ସମସ୍ତଙ୍କୁ ନିର୍ଦ୍ଦେଶ ଦିଆଯାଇଥିବା କଟକ ଡିସିପି କହିଛନ୍ତି ।
ଏହାବି ପଢ଼ନ୍ତୁ...ପାର୍ବଣ ପାଇଁ କଟକର ଅଭିଯାନ, ଅପରାଧ ନିୟନ୍ତ୍ରଣ ପାଇଁ ଲାଗିବ ୧୦୦୦ ସିସିଟିଭି
ପ୍ରତିକ୍ରିୟାରେ ଡିସିପି ପିନାକ ମିଶ୍ର କହିଛନ୍ତି, "ପାର୍ବଣ ଋତୁରେ କଟକରେ ବିଭିନ୍ନ ପୂଜା ବହୁ ଆଡ଼ମ୍ବରରେ ପାଳନ କରାଯାଇଥାଏ । ତେବେ ଏନେଇ କମିଶନରେଟ ପୋଲିସ ପକ୍ଷରୁ ମଧ୍ୟ ବ୍ୟାପକ ପ୍ରସ୍ତୁତି କରାଯାଇଛି । ପ୍ରତ୍ୟକ ଦିନ ପୋଲିସ ପକ୍ଷରୁ ସ୍ପେସିଆଲ ଡ୍ରାଇଭ କରାଯିବା ସହ ବିଭିନ୍ନ ସ୍ଥାନରେ ଅବକାରୀ ବିଭାଗ ତରଫରୁ ଚଢ଼ାଉ ମଧ୍ୟ କରାଯାଉଛି । ତେବେ ବିଭିନ୍ନ ଅପରାଧିକ କାର୍ଯ୍ୟକଳାପରେ ସମ୍ପୃକ୍ତ ଥିବା କିମ୍ବା ଜେଲ ଫେରନ୍ତା ଅପରାଧୀଙ୍କ ଉପରେ ତୀକ୍ଷ୍ଣ ନଜର ରଖାଯାଇଛି । ଏହି ସମୟରେ ଯେପରି କୌଣସି ସ୍ଥାନରେ କିଛି ବିଶୃଙ୍ଖଳା ବା ଅପ୍ରୀତିକର ପରିସ୍ଥିତି ନ ଉପୁଜେ, ସେଥିପ୍ରତି ଦୃଷ୍ଟି ଦେବାକୁ ପ୍ରତ୍ୟକ ଥାନା ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି ।"
ଇଟିଭି ଭାରତ, କଟକ
