କଟକ: ପୁଣି ଥରେ ରକ୍ତରଞ୍ଜିତ ହୋଇଉଠିଛି ସିଲଭର ସିଟି । ଦାଦାବଟି କିମ୍ବା ଅନ୍ୟ କୌଣସି କାରଣ ପାଇଁ ନୁହେଁ ମାଛ ପାଇଁ ଗଡିଛି ମୁଣ୍ଡ । ମାଛ ବ୍ୟବସାୟକୁ କେନ୍ଦ୍ର କରି ଜଣକୁ ହତ୍ୟା କରାଯାଇଥିବା ଜଣାପଡିଛି । ଏଭଳି ଚାଞ୍ଚଲ୍ୟକର ଘଟଣା ଦେଖିବାକୁ ମିଳିଛି ସହରର ଯୋବ୍ରା ଅଞ୍ଚଳରେ । ଏ ଘଟଣା ନେଇ ଯେପରି କୌଣସି ପ୍ରକାରର ଅପ୍ରୀତିକର ପରିସ୍ଥିତି ସୃଷ୍ଟି ନହୁଏ ତାହା ଉପରେ ନଜର ରଖିଛି ପୋଲିସ ।
ଯୋବ୍ରା ବ୍ୟାରେଜରେ ମାଛ ବ୍ୟବସାୟକୁ କେନ୍ଦ୍ର କରି ଜଣକ ହତ୍ୟା କରାଯାଇଛି । ବିରୋଧୀ ଗୋଷ୍ଠୀର ଆକ୍ରମଣରେ କୁଖ୍ୟାତ ଅପରାଧୀ ତପନ ନାୟକ ପ୍ରାଣ ହରାଇଛି । ଏଥିରେ ତପନର ସହଯୋଗୀ ସିଲୁ ଆହତ ହୋଇଥିବା ଜଣାପଡିଛି । ଯୋବ୍ରା ମାଛ ମାର୍କେଟର ନିଲାମକୁ ନେଇ ଗଲା କିଛି ଦିନ ହେବ ବିବାଦ ଚାଲିଥିଲା । ଏହାକୁ ନେଇ ସ୍ଥାନୀୟ ଅଞ୍ଚଳର ଦୁଇ ଅପରାଧୀ ଗୋଷ୍ଠୀ ମଧ୍ୟରେ ଛକାପଞ୍ଝା ଲାଗି ରହିଥିଲା । ରବିବାର ରାତିରେ ଯୋବ୍ରା ମାଟିଆ ମଙ୍ଗଳା ସାହିର କୁଖ୍ୟାତ ଅପରାଧୀ ତପନ ନାୟକ ଓ ହାପି ମହାନ୍ତି ମୁହାଁମୁହିଁ ହୋଇଥିଲେ ।
ଉଭୟଙ୍କ ମଧ୍ୟରେ ଜୋରଦାର ବଚସା ହୋଇଥିଲା । ଆଉ ଏହି ସମୟରେ ହାପି ମହାନ୍ତି ନିଜ ପାଖରେ ରଖିଥିବା ଏକ ଛୁରୀ ରେ ତପନର ତଳି ପେଟ ଓ ପିଠିକୁ ଭୁସି ଦେଇଥିଲା । ଏଥିରେ ଗୁରୁତର ଆହତ ହୋଇଥିଲା ତପନ । ସ୍ଥାନୀୟ ଲୋକ ଏ ଘଟଣା ବାବଦରେ ପୋଲିସକୁ ଖବର ଦେଲା ପରେ ପୋଲିସ ପହଞ୍ଚି ତପନକୁ ଚିକିତ୍ସା ପାଇଁ ଏସସିବିରେ ଭର୍ତ୍ତି କରିଥିଲା । ସୋମବାର ଭୋର ସମୟରେ ତପନର ମୄତ୍ୟୁ ଘଟିଛି ।
ମାଛ ମାର୍କେଟ ନିଲାମ କରିବାକୁ ନେଇ ଯୋବ୍ରାରେ ବିବାଦ ଦେଖାଯିବ କିଛି ନୂଆ ଘଟଣା ନୁହେଁ । ପୁର୍ବରୁ ଏଭଳି ବିବାଦକୁ ନେଇ ଦୁଇବର୍ଷ ତଳେ ଏକ ହୋଟେଲ ଉପରେ ବୋମାମାଡ଼ ହୋଇଥିଲା । ସେତେବେଳେ ଏହି ଘଟଣାରେ ଜଡିତ ଥିବା ମୁଖ୍ୟ ଅଭିଯୁକ୍ତ ତପନକୁ ଏନକାଉଣ୍ଟର କରିଥିଲା ପୋଲିସ । ଅନ୍ୟପଟେ ଏହି ହତ୍ୟାରେ ଜଡିତ ଅଭିଯୁକ୍ତ ହାପି ମହାନ୍ତି ବିଗତ କିଛିଦିନ ହେବ ଯୋବ୍ରା ଅଞ୍ଚଳରେ ନିଜର ପତିଆରା ଜାହିର ପାଈଁ ଜୋରଦାର୍ ଉଦ୍ୟମ କରୁଛି । ଏଥିପାଇଁ ସେ ତପନ ଉପରେ ଆକ୍ରମଣ କରିଥିବା ନେଇ ଚର୍ଚ୍ଚା ହେଉଛି ।
ନିଜ ପୁଅ ହତ୍ୟା ଘଟଣାରେ ସମ୍ପୃକ୍ତ ଥିବା ଅଭିଯୁକ୍ତଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି ତପନର ମାଆ । ଅନ୍ୟପଟେ ଅଭିଯୁକ୍ତଙ୍କୁ ଧରିବା ପାଇଁ ୩ଟି ଟିମ ଗଠନ କରିଛି ପୋଲିସ । ଖୁବଶୀଘ୍ର ଅଭିଯୁକ୍ତଙ୍କୁ ଧରାଯିବ ବୋଲି ଅତିରିକ୍ତ ଡିସିପି କହିଛନ୍ତି । ତପନ ହତ୍ୟାକାଣ୍ଡ ପରେ ଯୋବ୍ରା ଅଞ୍ଚଳରେ କୋକୁଆ ଭୟ ସୃଷ୍ଟି ହୋଇଛି । କୌଣସି ପ୍ରକାରର ଅପ୍ରୀତିକର ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ବିଭିନ୍ନ ସ୍ଥାନରେ ବ୍ୟାପକ ପୋଲିସ ମୁତୟନ କରାଯାଇଛି ।
କଟକରୁ ନାରାୟଣ ସାହୁ, ଇଟିଭି ଭାରତ
