କଟକ: କଟକରେ ବସ ଟର୍ମିନାଲରେ ଭତ୍ତିପ୍ରସ୍ତର ସ୍ଥାପନା କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କଟକ ନେତାଜୀ ବସ ଟର୍ମିନାଲ ନାଁରେ ନିର୍ମାଣ ହେବ ଏହି ଟର୍ମିନାଲ୍ । ପ୍ରାୟ ୧୧୦୦୦ ବର୍ଗ ମିଟର ଅଞ୍ଚଳରେ ଏହାକୁ ନିର୍ମାଣ କରାଯିବ । ରାଜ୍ୟ ଗମନାଗମନ ବ୍ୟବସ୍ଥାରେ ଏହା ନୂଆ ଅଧ୍ୟାୟ ସୃଷ୍ଟି କରିବ । 12 ଏକର ଜମିରେ ଦେଢ଼ ବର୍ଷ ମଧ୍ୟରେ କାମ ଶେଷ ହେବ । ଏକାଥରକେ 180 ଟି ବସ୍ ରହିପାରିବ ଏହି ମେଗା ବସ ଷ୍ଟାଣ୍ଡରେ । ଏଥିପାଇଁ ଖର୍ଚ୍ଚ ହେବ ପ୍ରାୟ 65 କୋଟି ।
ରାଜ୍ୟ ସରକାରଙ୍କ ୫-ଟି କାର୍ଯ୍ୟକ୍ରମ ଅଧୀନରେ ଏହା କାର୍ଯ୍ୟକାରୀ କରାଯିବ। ବାଦାମବାଡି ବସ୍ଷ୍ଟାଣ୍ଡ ଜନଗହଳି ବୃଦ୍ଧି ସହିତ ସ୍ଥାନାଭାବ ଦୃଷ୍ଟିରୁ ଜନସାଧାରଣ ଓ ଯାତ୍ରୀ ଅସୁବିଧାର ସମ୍ମୁଖୀନ ହେଉଥିବାରୁ ଏହି ଅତ୍ୟାଧୁନିକ ବସ୍ ଟର୍ମିନାଲକୁ ଖାନନଗରରେ ପ୍ରତିଷ୍ଠା କରିବା ପାଇଁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି। ଏହି ଅତ୍ୟାଧୁନିକ ବସ୍ ଟର୍ମିନାଲରେ ନେତାଜୀଙ୍କ ଜୀବନ ଓ ସଂଗ୍ରାମ ବିଷୟରେ ଜନସାଧାରଣଙ୍କୁ ଅବଗତ କରାଇବା ପାଇଁ ଏକ ସ୍ବତନ୍ତ୍ର କିଓସ୍କ କରିବା ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଥିଲେ । ତେବେ ଏହି ବସ ଟର୍ମିନାଲରେ ରହିବ ନିମ୍ନ ଲିଖିତ ସୁବିଧା...
- ଟର୍ମିନାଲ ବିଲ୍ଡିଂ ନିର୍ମାଣ କରାଯାଇ ଏଥିରେ ଯାତ୍ରୀ ବିଶ୍ରାମସ୍ଥଳ, ଫୁଡ କୋର୍ଟ, କ୍ଲର୍କ ରୁମ, ଟିକେଟ ଗୃହ, ଇ-ଯାନ ଚାର୍ଜିଂ ପଏଣ୍ଟ, ଛାତ ଉପରେ ବର୍ଷା ଜଳ ସଂରକ୍ଷଣ ଏବଂ ସୌର ପ୍ୟାନେଲ ମଧ୍ୟ ରଖାଯିବ।
- ଟର୍ମିନାଲରେ ଏକ ସମୟରେ ୧୮୦ଟି ବସ ପାର୍କିଂର ବ୍ୟବସ୍ଥା ରହିବ ।
- ଯାତ୍ରୀମାନଙ୍କ ସୁବିଧା ପାଇଁ ଇଣ୍ଟିଗ୍ରେଟେଡ ଇନଫରମେସନ ମ୍ୟାନେଜମେଣ୍ଟ ବ୍ୟବସ୍ଥା ମଧ୍ୟ କରାଯିବ ।
- ସାଧାରଣ ଯାତ୍ରୀବାହୀ ବସ୍ ପାଇଁ ସ୍ଥାନ, ସ୍ଥାନୀୟ ଓ ମୋ ବସ ସେବା ପାଇଁ ସ୍ଥାନ, ଯାନ ମରାମତି ଓ ରକ୍ଷଣାବେକ୍ଷଣ ବ୍ଲକ, ଚାରି ଚକିଆ ଯାନ ଓ ଅଟୋ ପାଇଁ ସ୍ବତନ୍ତ୍ର ପାର୍କିଂ ବ୍ୟବସ୍ଥା କରାଯିବ ।
ନିର୍ମାଣ ପୂର୍ବରୁ ଅନେକ ସରକାରୀ ତଥା ବେସରକାରୀ ଜମିକୁ ପ୍ରଶାସନ ଅଧିଗ୍ରହଣ କରିବ ଫଳରେ ଅନେକ ବଡ ବଡ ସପିଂ ମଲ, ହୋଟେଲ, ଧର୍ମାନୁଷ୍ଠାନ, ସ୍କୁଲ ଏବଂ ପାଠାଗାର ଇତ୍ୟାଦିକୁ ଉଚ୍ଛେଦ କରାଯିବ । ଏଥିପାଇଁ କ୍ଷତିଗ୍ରସ୍ତ ହେବାକୁ ଥିବା ଲୋକଙ୍କୁ ପ୍ରଶାସନ ପକ୍ଷରୁ ଏକ ଥଇଥାନ ପ୍ୟାକେଜ ପ୍ରଦାନ କରାଯିବ ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
