କଟକ: ଜିଲ୍ଲାର ବଡମ୍ବା ଥାନା ଅନ୍ତର୍ଗତ ହାଟଛକ ନିକଟରେ ବସ ଦୁର୍ଘଟଣାଗ୍ରସ୍ତ। ଭାରସାମ୍ୟ ହରାଇ ଗଛରେ ପିଟିହୋଇଛି ଗୋଟିଏ ବସ। ଏହି ଦୁର୍ଘଟଣାରେ 3 ଜଣ ଗୁରୁତର ହୋଇଥିବା ବେଳେ ୧୨ ଜଣ ଯାତ୍ରୀ ଆହତ ହୋଇଛନ୍ତି।
ସମସ୍ତ ଆହତଙ୍କୁ ବଡମ୍ବା ଡାକ୍ତରଖାନାରେ ଭର୍ତ୍ତି କରାଯାଇଛି। ସେମାନଙ୍କ ମଧ୍ୟରୁ 3ଜଣଙ୍କ ଅବସ୍ଥା ଗୁରୁତର ଥିବାରୁ ସେମାନଙ୍କୁ କଟକ ବଡ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ଆଜି ଦିନ 1ଟା 45 ମିନିଟ ସମୟରେ ବଡମ୍ବା ଭଟ୍ଟାରିକାରୁ କଟକ ଅଭିମୁଖେ ଯାଉଥିବା ଏକ ଘରୋଇ ବସ ବଡମ୍ବା ହାଟଛକ ନିକଟରେ ଭାରସାମ୍ୟ ହରାଇ ଦୁଇଟି ବାଇକକୁ ପଛ ପଟୁ ଧକ୍କା ଦେଇଥିଲା।
ଭାରସାମ୍ୟ ହରାଇ ବସ୍ଟି ଗଛରେ ପିଟି ହୋଇଥିଲା। ସୌଭାଗ୍ୟବଶତଃ ବାଇକ ଆରୋହୀ ଅଳ୍ପକେ ବର୍ତ୍ତି ଯାଇଥିଲେ। ବସ ମଧ୍ୟରେ ଥିବା 12ରୁ ଊର୍ଦ୍ଧ୍ୱ ଯାତ୍ରୀ ଆହତ ହୋଇଥିଲେ। ଆହତଙ୍କୁ ବଡମ୍ବା ଡାକ୍ତରଖାନାରେ ଭର୍ତ୍ତି କରାଯାଇ ଚିକିତ୍ସା କରାଯାଇଥିଲା ବେଳେ ସେମାନଙ୍କ ମଧ୍ୟରୁ ଜାନକୀ ନାୟକ, ଗୋବର୍ଦ୍ଧନ ମହାନ୍ତି, ଗୀତା ସାହୁଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ କଟକ ବଡ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି।
ଘଟଣାସ୍ଥଳରେ ବଡମ୍ବା ପୋଲିସ ପହଞ୍ଚି ଦୁର୍ଘଚଣାଗ୍ରସ୍ତ ବସକୁ ଜବତ କରିଥିବା ବେଳେ ବସର ଡ୍ରାଇଭର ଓ ହେଲପର ଏ ଘଟଣା ପରେ ଫେରାର ହୋଇଯାଇଛନ୍ତି। ଏହି ବସକୁ ହେଲପର ଚଳାଉଥିବାରୁ ଏଭଳି ଘଟଣା ଘଟିଥିବା ଜାଣିବାକୁ ମିଳିଛି।
କଟକରୁ ନାରାୟଣ ସାହୁ, ଇଟିଭି ଭାରତ
