କଟକ: ପାରିବାରିକ ବିବାଦ ମାମଲାରେ ଆଜି(ଗୁରୁବାର) କଟକ ପାରିବାରିକ ଅଦାଲତରେ ହଜାର ହେଲେ ଅନୁଭବ ମହାନ୍ତି । ତେବେ ତାଙ୍କ ପତ୍ନୀ ବର୍ଷା ଆଜି ବି ହାଜର ହୋଇନଥିଲେ । ବିବାହ ବିଚ୍ଛେଦ ମାମଲାରେ ବର୍ଷାଙ୍କ ସାକ୍ଷ୍ୟ ଗ୍ରହଣ କରାଯାଇନାହିଁ । ନିଜ ପକ୍ଷ ରଖିବାକୁ ସମୟ ଅଦାଲତଙ୍କୁ ସମୟ ମାଗିଥିଲେ ବର୍ଷା(Barsha abstain from Cuttack family court) ।
ସେହି ଆବେଦନ ଉପରେ ଆଜି(ଗୁରୁବାର) ଶୁଣାଣି କରାଯାଇଥିଲା । ଆସନ୍ତାକାଲି(ଶୁକ୍ରବାର) ମଧ୍ୟ ଏହି ଶୁଣାଣି ଜାରି ରହିବ । ସେପଟେ ମୂଳ ବିବାହ ବିଚ୍ଛେଦ ମାମଲାର ଚୁଡ଼ାନ୍ତ ଶୁଣାଣି ପାଇଁ ଅନୁଭବ ପ୍ରସ୍ତୁତ ଥିବା ତାଙ୍କ ଓକିଲ କହିଛନ୍ତି । ଏହା ବ୍ୟତୀତ ବର୍ଷା ହାଇକୋର୍ଟରେ ଜାଲ ଟାଇମ ପିଟିସନ ଦାଖଲ କରିଥିବା ଅଭିଯୋଗ ହୋଇଛି । ତାଙ୍କ ବିରୁଦ୍ଧରେ ଆଇନଗତ ପଦକ୍ଷେପ ଗ୍ରହଣ କରିବା ପାଇଁ ପ୍ରସ୍ତୁତ ହେଉଥିବା କଥା କହିଛନ୍ତି ଅନୁଭବଙ୍କ ଓକିଲ ।
ସେପଟେ ପାରିବାରିକ ବିବାଦକୁ ନେଇ ହାଇକୋର୍ଟରେ ଦାଖଲ କରିଥିବା ପିଟିସନ୍କୁ ପ୍ରତ୍ୟାହାର କରି ନେଇଛନ୍ତି ଅଭିନେତ୍ରୀ ବର୍ଷା ପ୍ରିୟଦର୍ଶିନୀ(Actress Barsha Priyadarshini withdrew petition ) । ଏହାପରେ ଏହି ମାମଲାକୁ ରଦ୍ଦ କରିଛନ୍ତି ହାଇକୋର୍ଟ । ଫଳ ସ୍ବରୂପ ପରିବାର ଅଦାଲତଙ୍କ ନିର୍ଦ୍ଦେଶ କାୟମ ରହିଛି ।
ବିବାହ ବିଚ୍ଛେଦ ମାମଲାରେ ସାନି ସାକ୍ଷ୍ୟଗ୍ରହଣ ପାଇଁ ଆବେଦନ କରିଥିଲେ ବର୍ଷା । ସ୍ବାମୀ ଅନୁଭବଙ୍କ ଆଉ ଥରେ ସାକ୍ଷ୍ୟ ଗ୍ରହଣ କରିବା ପାଇଁ ବର୍ଷା ପ୍ରୟିଦର୍ଶିନୀ ଆବେଦନ କରିଥିଲେ । ତଳ କୋର୍ଟରେ ବର୍ଷାଙ୍କ ଆବେଦନ ଖାରଜ ହେବାରୁ ହାଇକୋର୍ଟରେ ପିଟିସନ ଦାଖଲ କରିଥିଲେ ବର୍ଷା ।
ବର୍ଷାଙ୍କୁ ଛାଡ଼ପତ୍ର ଦେବା ପାଇଁ ଅନୁଭବ ପ୍ରଥମେ ଦିଲ୍ଲୀର ପଟିଆଲା ହାଉସ କୋର୍ଟରେ ଏକ ମାମଲା ଦାଖଲ କରିଥିଲେ । ଏହାପରେ ବର୍ଷା ଅନୁଭବଙ୍କ ବିରୋଧରେ କଟକ SDJM କୋର୍ଟ ଓ ପରିବାର ଅଦାଲତରେ ଘରୋଇ ହିଂସା, ଭରଣ ପୋଷଣ ଓ ବୈବାହିକ ଜୀବନକୁ ସ୍ଥାୟୀ କରିବାକୁ ପ୍ରାର୍ଥନା କରି ଦୁଇଟି ମାମଲା ଦାଖଲ କରିଥିଲେ । ଏହାର କିଛିଦିନ ପରେ ବର୍ଷା ପଟିଆଲା ହାଉସ କୋର୍ଟରେ ଅନୁଭବ ଦାଖଲ କରିଥିବା ଛାଡ଼ପତ୍ର ମାମଲାକୁ କଟକ ସ୍ଥାନାନ୍ତର କରିବା ପାଇଁ ସୁପ୍ରିମକୋର୍ଟଙ୍କ ଦ୍ବାରସ୍ଥ ହୋଇଥିଲେ । ପରେ ସୁପ୍ରିମକୋର୍ଟ ମାମଲାର ଶୁଣାଣି କରି ମାମଲାକୁ ତୁରନ୍ତ କଟକ ପରିବାର ଅଦାଲତକୁ ସ୍ଥାନାନ୍ତର କରିବା ପାଇଁ ପଟିଆଲା ହାଉସ କୋର୍ଟଙ୍କୁ ନିର୍ଦ୍ଦେଶ ଦେଇଥିଲେ । ଅନୁଭବ ଦାଖଲ କରିଥିବା ପିଟିସନରେ ଉଲ୍ଲେଖ କରିଥିଲେ ଯେ, ସେ ଓ ତାଙ୍କ ପରିବାର ଲୋକେ ଏହି ମାମଲା କାରଣରୁ ମାନସିକ ଅବସାଦ ମଧ୍ୟରେ ରହୁଛନ୍ତି । ଏଥିସହ ତାଙ୍କ ବାପାଙ୍କ ଦେହ ଖରାପ ରହୁଛି । ବର୍ଷା ତାଙ୍କ ପ୍ରତିଷ୍ଠାକୁ ନଷ୍ଟ କରିବା ପାଇଁ ଚେଷ୍ଟା କରୁଛନ୍ତି । ଏଥିପାଇଁ ସେ ରାଜନୈତିକ ସ୍ତରରେ ମଧ୍ୟ ଆକ୍ରୋଶର ଶିକାର ହେଉଥିବା ଅଭିଯୋଗ କରିଛନ୍ତି । ତେଣୁ ମାମଲାର ତୁରନ୍ତ ସମାଧାନ କରିବା ପାଇଁ ସୁପ୍ରିମକୋର୍ଟରେ ନିବେଦନ କରିଥିଲେ ।
