କଟକ: ରାଜ୍ୟବାସୀଙ୍କୁ କୋରୋନା ମାଡରୁ ବଞ୍ଚାଇବା ପାଇଁ ଆପ୍ରାଣ ଉଦ୍ୟମ ଜାରି ରଖିଛନ୍ତି ରାଜ୍ୟ ସରକାର । କୋରୋନା ସ୍ଥିତି ଅନୁଯାୟୀ କଟକଣା କଡା ଓ କୋହଳ ହେଉଥିବା ବେଳେ ଯେଉଁମାନଙ୍କ ପାଇଁ ଏତେ କିଛି ବ୍ୟବସ୍ଥା ହେଉଛି ସେମାନେ ଯେ ମନଇଚ୍ଛା ନିୟମ ଭାଙ୍ଗୁଥିବା ଦେଖିବାକୁ ମିଳୁଛି । ଫଳରେ ରାଜ୍ୟରେ ଲାଗୁ ହୋଇଥିବା ଲକଡାଉନ ଅବଧି ମଧ୍ୟରେ ମୋଟ 6912ଟି ମାମଲା ରୁଜୁ ହୋଇଥିବା ଜଣା ପଡିଛି ।
ସୂଚନା ଅନୁଯାୟୀ ଗତ ମାର୍ଚ୍ଚ 24 ତାରିଖରୁ ରାଜ୍ୟରେ ତାଲାବନ୍ଦ ହେବା ପରେ ଆଜି ପର୍ଯ୍ୟନ୍ତ ରାଜ୍ୟର ବିଭିନ୍ନ ଥାନାରେ ମୋଟ 6912ଟି ମାମଲା ରୁଜୁ ହୋଇଛି । ଏନେଇ ପୋଲିସ ମୁଖ୍ୟାଳୟ ସୂଚନା ଦେଇଛି । ସେପଟେ ଗତ 24 ଘଣ୍ଟା ମଧ୍ୟରେ କେବଳ 14ଟି ମାମଲା ରୁଜୁ ହୋଇଛି । ଏଥିରୁ 9ଟି ମାମଲା ତାଲାବନ୍ଦ ନିୟମ ଉଲଙ୍ଘନ ଅଭିଯୋଗରେ ରୁଜୁ ହୋଇଥିବା ବେଳେ 2ଟି ମାମଲା ହୋମ କ୍ବାରେଣ୍ଟାଇନ ନିୟମ ଉଲଙ୍ଘନ ପାଇଁ ରୁଜୁ ହୋଇଛି ।
ସେହିପରି ଗୋଟିଏ ମାମଲା ଗୁଜବ ସୃଷ୍ଟି କରିଥିବା ଅଭିଯୋଗରେ ରୁଜୁ ହୋଇଥିବା ବେଳେ ଅନ୍ୟ 2ଟି ମାମଲା ଅନ୍ୟାନ୍ୟ କାରଣ ପାଇଁ ରୁଜୁ ହୋଇଥିବା ଜଣା ପଡିଛି । ଏନେଇ ସୂଚନା ଦେଇଛି ରାଜ୍ୟ ପୋଲିସ ମୁଖ୍ୟାଳୟ ।
କଟକରୁ ନାରାୟଣ ସାହୁ, ଇଟିଭି ଭାରତ
