କଟକ: ସାଇ ସୁନ୍ଦରଗଡ ପୁଣି ଚମ୍ପିଆନ । 17ତମ ରାଜ୍ୟ ହକି ଚମ୍ପିଆନସିପ୍ ନାଲକୋ କପ ଫାଇନାଲ ମୁକାବିଲାରେ ରେଳବାଇ ଦଳକୁ 1-0 ଗୋଲରେ ହରାଇ ଚମ୍ପିଆନ ହୋଇଛି ସାଇ ସୁନ୍ଦରଗଡ ଟିମ୍ । ଏହି ବିଜୟ ସହ କ୍ରମାଗତ ଦୁଇ ଥର ଟାଇଟଲ ମୁକୁଟ ପିନ୍ଧିଛି ସାଇ ସୁନ୍ଦରଗଡ ଦଳ ।
ଅମିତ ରୋସନ ଲାକ୍ରା ସାଇ ସୁନ୍ଦରଗଡ ଦଳ ବିଜୟ ଭେଟି ଦେଇଥିଲେ । ବିପକ୍ଷ ଦଳକୁ 43 ମିନିଟରେ ଏକ ଚମତ୍କାର ଗୋଲ ଦେଇ ସେ ମ୍ୟାଚକୁ ସାଇ ସୁନ୍ଦରଗଡ ଦଳ କବଜାକୁ ଆଣିଥିଲେ।
ପ୍ରାଥମାର୍ଦ୍ଧରୁ ହିଁ ଉଭୟ ଦଳ ଚମତ୍କାର ଖେଳ ପ୍ରଦର୍ଶନ କରିଥିଲେ, କିନ୍ତୁ 43 ମିନିଟରେ ସାଇ ସୁନ୍ଦରଗଡ ଦଳ ପକ୍ଷରୁ ଅମିତ ବିପକ୍ଷ ଦଳକୁ ଏକ ଚିତାକର୍ଷକ ଗୋଲ ଦେଇଥିଲେ । ଯାହା ଫଳରେ 1-0 ରେ ଆଗୁଆ ହୋଇଥିଲା ଦଳ । ତେବେ ଏହି ସ୍କୋର ଶେଷ ପର୍ଯ୍ୟନ୍ତ ରହିବାରୁ ରେଳବାଇ ଦଳ ପରାଜୟର ସାମ୍ନା କରିଥିଲା ।
ଚମ୍ପିଆନସିପ୍ରେ 22 ଟି ଦଳରୁ 400ରୁ ଊର୍ଦ୍ଧ୍ବ ଖେଳାଳି ଭାଗ ନେଇଥିଲେ । ତେବେ ଏହି ପ୍ରତିଯୋଗିତା ଚଳିତ ମାସ 14 ତାରିଖରୁ ଆରମ୍ଭ ହୋଇ 19 ତାରିଖରେ ସମାପ୍ତ ହୋଇଛି ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
