ଭୁବନେଶ୍ବର: ଜନ୍ମଦିନରେ ବିବାହ ବନ୍ଧନରେ ବାନ୍ଧି ହୋଇଛନ୍ତି ଚାନ୍ଦବାଲି ବିଧାୟକ ତଥା ଯୁବ ବିିଜେଡି ସଭାପତି ବ୍ୟୋମକେଶ ରାୟ । ତଦଶା ସାଇ ଦର୍ଶନୀ ବଳଙ୍କ ମଥାରେ ସିନ୍ଦୁର ଭରି ଜୀବନର ଦ୍ବିତୀୟ ଇନିଂସ ଆରମ୍ଭ କରିଛନ୍ତି ଚାନ୍ଦବାଲି ବିଧାୟକ । କୋରୋନା କଟକଣା ମଧ୍ୟରେ ବ୍ୟୋମକେଶ ରାୟଙ୍କ ବିବାହ ଉତ୍ସବ ସମ୍ପର୍ନ୍ନ ହୋଇଛି ।
ପାରମ୍ପରିକ ରୀତିନୀତିରେ ଚିଲିକା କୂଳରେ ଥିବା ଏକ ତାରକା ହୋଟଲରେ ବିବାହ କରିଛନ୍ତି ଚାନ୍ଦବାଲି ବିଧାୟକ ବ୍ୟୋମକେଶ ରାୟ ଓ ତଦଶା ସାଇ ଦର୍ଶନୀ ବଳ । ଚିଲିକାର ଥିବା ସ୍ବସ୍ତି ଚିଲିକା ରିସୋର୍ଟରେ ଆୟୋଜିତ ଏହି ବିବାହ ଉତ୍ସବରେ ଉଭୟ ପରିବାରର ସଦସ୍ୟ ଓ କିଛି ରାଜନେତା ଯୋଗ ଦେଇଛନ୍ତି । ଚାନ୍ଦବାଲିରେ ବ୍ୟୋମକେଶଙ୍କ ଜଣେ ପୁରୁଣା ରାଜନୈତିକ ସହଯୋଗୀଙ୍କ ସାନ ଝିଅ ହେଉଛନ୍ତି ତଦଶା ସାଇ ଦର୍ଶନୀ ବଳ । ତଦଶା ଇଂଜିନିୟରିଂରେ ଡିଗ୍ରୀ ହାସଲ କରିଥିବା ଜଣାପଡ଼ିଛି ।
ବ୍ୟୋମକେଶଙ୍କ ପ୍ରଥମ ପତ୍ନୀ ନିଳିମା ପ୍ରଧାନଙ୍କ ୨୦୨୦ ମସିହା ଫେବୃୟାରୀ ୩ ତାରିଖରେ ପରଲୋକ ଘଟିଥିଲା । ନିଳିମା ପ୍ରଧାନଙ୍କୁ ୨୦୧୪ ମସିହାରେ ପ୍ରେମ ବିବାହ କରିଥିଲେ ଯୁବ ବିିଜେଡି ସଭାପତି ବ୍ୟୋମକେଶ ରାୟ । ବ୍ୟୋମକେଶ ଓ ନିଳିମାଙ୍କ ଏକମାତ୍ର କନ୍ୟା ମଧ୍ୟ ଅଛି । ବିବାହ ସମୟରେ ତାଙ୍କ ଝିଅ ମଧ୍ୟ ଉପସ୍ଥିତ ଥିଲେ ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
