ଭୁବନେଶ୍ବର: ଖସୁଛି ପାରଦ । ବଢୁଛି ଶୀତ ଲହରୀ । ଘରୁ ପାଦ କାଢିବାକୁ 10 ଥର ଭାବିବାକୁ ପଡୁଛି । ପୁଣି ଆସନ୍ତା ୩ ଦିନ ପାଇଁ ଆଭ୍ୟନ୍ତରୀଣ ଓଡ଼ିଶାରେ ପ୍ରବଳ ଥଣ୍ଡା ଅନୁଭୂତ ହେବ ବୋଲି ଆଞ୍ଚଳିକ ପାଣିପାଗ ବିଭାଗ ପକ୍ଷରୁ କୁହାଯାଇଛି । ଫଳରେ ଦୈନନ୍ଦିନ ଜୀବନ ପ୍ର୍ରଭାବିତ ହେବାର ସମ୍ଭାବନା ରହିଛି। ଆସନ୍ତା ୨୪ ଘଣ୍ଟା, ତୀବ୍ର ଶୀତ ଲହରୀ ପାଇଁ ୨୧ ଡିସେମ୍ବର ସୋମବାର ମଧ୍ୟରେ ୫ ଟି ଜିଲ୍ଲାକୁ ଅରେଞ୍ଜ ୱାର୍ଣ୍ଣିଂ ଜାରି ହୋଇଛି ।
ବରଗଡ଼, ସୁନ୍ଦରଗଡ଼, ଝାରସୁଗୁଡା, ଅନୁଗୋଳ ଓ ମୟୂରଭଞ୍ଜ ଜିଲ୍ଲାରେ ପ୍ରବଳ ଶୀତ ଅନୁଭୂତ ହେବ। ଏହାର ପ୍ରଭାବରେ ଥଣ୍ଡା, ନାକରୁ ଅବିଶ୍ରାନ୍ତ ପାଣି ଦେବା ଭଳି ସ୍ଥିତି ଉପୁଜିବ। ତେଣୁ ରାତ୍ରି ସମୟରେ ଘରେ ରହିବା, ରାତ୍ରି ସମୟରେ ଦୁଇ ଚକିଆ ଯାନ ନ ଚଳେଇବାକୁ ପରାମର୍ଶ ଦିଆଯାଇଛି ।
ସେହିପରି ଶୀତ ଲହରୀ ପାଇଁ ୧୧ ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି ହୋଇଛି । କୋରାପୁଟ, କନ୍ଧମାଳ, ବାଲେଶ୍ବର, କେନ୍ଦୁଝର, ବୌଦ୍ଧ, ସୋନପୁର, କଳାହାଣ୍ଡି, ନୂଆପଡା, ଢେଙ୍କାନାଳ, କଟକ ଏବଂ ଦେବଗଡ଼ରେ ଥଣ୍ଡା ଲହରୀ ଅନୁଭୂତ ହେବ । ଏହାର ପ୍ରଭାବରେ ଥଣ୍ଡା ଜନିତ ଅସୁସ୍ଥତା ମଧ୍ୟ ଦେଖା ଦେଇପାରେ । ତେଣୁ ରାତ୍ରି ସମୟରେ ଘରେ ରହିବାକୁ ପରାମର୍ଶ ଦେଇଛି ଭୁବନେଶ୍ବର ଆଞ୍ଚଳିକ ପାଣିପାଗ କେନ୍ଦ୍ର ।
ଉପକୂଳବର୍ତ୍ତୀ ଜିଲ୍ଲାରେ ରାତ୍ରି ତାପମାତ୍ରା ୨ ରୁ ୩ ଡିଗ୍ରୀ ଖସିବ। ଗତ ୨୪ ଘଣ୍ଟାରେ ୯ ଟି ସ୍ଥାନରେ ୧୦ ଡିଗ୍ରୀ ତଳକୁ ତାପମାତ୍ରା ରହିଛି । ଝାରସୁଗୁଡା ଠାରେ ସର୍ବନିମ୍ନ ତାପମାତ୍ରା ୭.୬ ଡିଗ୍ରୀ ତାପମାତ୍ରା ରେକର୍ଡ କରାଯାଇଛି।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
