ଭୁବନେଶ୍ବର: ଦୁଇ ଦିନିଆ ସଟଡାଉନ ସମୟରେ କଟକଣା କୋହଳ କଲେ କମିଶନରେଟ ପୋଲିସ । ଅତ୍ୟାବଶ୍ୟକୀୟ କାର୍ଯ୍ୟ ପାଇଁ ପାସର କୌଣସି ଆବଶ୍ୟକତା ନାହିଁ । ଟ୍ୱିନସିଟିରେ ସଟଡାଉନ ପାଳନ ପାଇଁ ପୋଲିସ ପ୍ରସ୍ତୁତ ଅଛି ବୋଲି କହିଲେ ସିପି । ସେହିପରି ଅମାନିଆଙ୍କୁ ସାବାଡ୍ ପାଇଁ ମଧ୍ୟ ଯୋଜନା ପ୍ରସ୍ତୁତ ।
ଆଗ ଅପେକ୍ଷା ଏଥର କଟକଣା ଯେତିକି କୋହଳ, ଅମାନିଆଙ୍କୁ ସାବାଡ ପାଇଁ ମଧ୍ୟ ସେତିକି କଡାକଡି ହେବ ନିୟମ । ସଂକ୍ରମଣର ମାତ୍ରା ବୃଦ୍ଧିକୁ ଦୃଷ୍ଟିରେ ରଖି ଅମାନିଆଙ୍କ ପାଇଁ କଡା ହେଲା କମିଶନରେଟ ପୋଲିସ । ସଟଡାଉନ ସମୟରେ ଭୁବନେଶ୍ବରରେ 43 ଓ କଟକରେ 25 ସ୍ଥାନରେ ନାକା କରାଯିବ । ସେହିପରି ରାଜଧାନୀରେ 20 ପ୍ଲାଟୁନ ପୋଲିସ ଫୋର୍ସ ସହ 150 ଅଫିସର ଓ କଟକରେ 12 ପ୍ଲାଟୁନ ପୋଲିସ ଫୋର୍ସ ସହ 100 ଅଫିସର ରହିବେ ବୋଲି କମିଶନରେଟ ପୋଲିସ ସମ୍ବାଦିକ ସମ୍ମିଳନୀ କରି ସୂଚନା ଦେଇଛନ୍ତି ।
ଅନ୍ୟପଟେ ଏହି ସମୟରେ ମଧ୍ୟ କେବଳ ବିମାନ ବନ୍ଦର ଏବଂ ରେଳ ଷ୍ଟେସନକୁ ଛାଡିଦେଲେ ଅନ୍ୟ ସବୁ ସ୍ଥାନକୁ ବନ୍ଦ ରହିବ 'ମୋ ବସ' ସେବା । ଏନେଇ କ୍ୟାପିଟାଲ ରିଜିଅନ ଅରବାନ ଟ୍ରାନ୍ସପୋର୍ଟ (ସିଆରୟୁଟି) ପକ୍ଷରୁ ସୂଚନା ଦିଆଯାଇଛି ।
ଭୁବନେଶ୍ବରରୁ ତାପସ କୁମାର ପରିଡା ଓ ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
