ଭୁବନେଶ୍ବର: ଆପଣ ନିଶା ସେବନ କରି ଗାଡି ଚଲାଉଛନ୍ତି କି ? ଓଭର ସ୍ପୀଡ଼ ଗାଡି ଚଳାଇବା ଆପଣଙ୍କ ସୌକ କି ? ଗାଡି ଚଳାଇବା ବେଳେ ମୋବାଇଲରେ ଗପୁଛନ୍ତି କି ? ଏହା ସହ କୌଣସି ପ୍ରକାର ମୋଟର ଯାନ ଆଇନକୁ ଉଲ୍ଲଘଂନ କରୁଛନ୍ତି କି ? ଯଦି ହଁ ! ତେବେ ଏଣିକି ହୋଇଯାଆନ୍ତୁ ସାବଧାନ । ଏହା କରିବା ଆପଣଙ୍କୁ ପଡିପାରେ ମହଙ୍ଗା । କାରଣ ମୋଟର ଯାନ ଆଇନକୁ କଡାକଡି କରିଛନ୍ତି ସରକାର ।
ଲୋକଙ୍କ ସୁରକ୍ଷା ପାଇଁ ମୋଟର ଯାନ ଆଇନକୁ କଡ଼ାକଡ଼ି କରାଯାଇଛି । ଏଣିକି ମୋଟର ଯାନ ଆଇନ ଉଲ୍ଲଙ୍ଘନ କଲେ ଅସ୍ଥାୟୀ ଭାବେ ଲାଇସେନ୍ସ ରଦ୍ଦ ହେବ । ପ୍ରାୟ ୩ ମାସ ପାଇଁ ଅସ୍ଥାୟୀ ଭାବେ ଡ୍ରାଇଭିଂ ଲାଇସେନ୍ସ ରଦ୍ଦ ହେବ । ଏହା ସମସ୍ତ ଗାଡି ଚାଳକଙ୍କ ଲାଗି ଲାଗୁ ହୋଇଛି । ଏନେଇ ସମସ୍ତ ପରିବହନ ଅଧିକାରୀଙ୍କୁ ବା ଆରଟିଓକୁ ଚିଠି ଲେଖିଛନ୍ତି ପରିବହନ କମିଶନର ।
ହେଲମେଟ୍ ନପିନ୍ଧିଲେ ଓ ମୋବାଇଲ ବ୍ୟବହାର କରୁଥିଲେ ଲାଇସେନ୍ସ ରଦ୍ଦ ହେବ । ଏହା ବ୍ୟତୀତ ମଦ ପିଇ ଗାଡ଼ି ଚଳାଇଲେ ଓ ଅଧିକ ବେଗରେ ଗାଡ଼ି ଚଳାଇଲେ ବି ଲାଇସେନ୍ସ ରଦ୍ଦ କରାଯିବ । ସେହିପରି ‘ରେଡ଼୍ ଲାଇଟ୍’ ଉଲ୍ଲଙ୍ଘନ ଓ ଭୁଲ ଦିଗରେ ଗାଡ଼ି ଚଳାଇଲେ ଲାଇସେନ୍ସ ରଦ୍ଦ କରାଯିବ । ଏହି ଦିଗରେ ସୁପ୍ରିମକୋର୍ଟ କମିଟିର ନିର୍ଦ୍ଦେଶ ଲାଗୁ କରିବାକୁ ଚିଠି ଲେଖିଛନ୍ତି ପରିବହନ କମିଶନର ।
ଭୁବନେଶ୍ବରରୁ ଭବାନୀ ଶଙ୍କର ଦାସ,ଇଟିଭି ଭାରତ
