ଭୁବନେଶ୍ବର: ମହାମାରୀ କୋରୋନାର ଭୟାବହତା ମଧ୍ୟରେ ରାଜ୍ୟରେ ପୁଣି ଦେଖାଦେଇଛି ଟିକା ସଙ୍କଟ । ରାଜ୍ୟକୁ କୋଭିସିଲ୍ଡ ଟିକା କମ୍ ଆସୁଥିବାରୁ ରାଜ୍ୟରେ ଟିକାକରଣ ହୋଇପାରୁନି । ରାଜ୍ୟରେ ପର୍ଯ୍ୟାପ୍ତ ଟିକା ନଥିବାରୁ ଶନିବାର 10ଟି ଜିଲ୍ଲାରେ ଟିକାକରଣ ବନ୍ଦ ରହିବ ।
ରାଜ୍ୟରେ ଟୀକା ଅଭାବ କାରଣରୁ ଶନିବାର 10ଟି ଜିଲ୍ଲାରେ ଟୀକାକରଣ ବନ୍ଦ ରହିଛି । ଟୀକାକରଣ ବନ୍ଦ ରହିଥିବା ଜିଲ୍ଲାଗୁଡିକ ମଧ୍ୟରେ ବାଲେଶ୍ୱର, ଯାଜପୁର, କଳାହାଣ୍ଡି ଢେଙ୍କାନାଳ, କେନ୍ଦ୍ରାପଡା, କୋରାପୁଟ, ମାଲକାନଗିରି, ନୟାଗଡ଼, ନୂଆପଡା, ସୋନପୁର ସାମିଲ ରହିଛି।
ଭୁବନେଶ୍ୱର ଓ ଗଞ୍ଜାମରେ କୋଭାକ୍ସିନ ଟିକା ଦିଆଯାଉଥିବାବେଳେ ବାକି ଜିଲ୍ଲାରେ କୋଭିସିଲ୍ଡ ଟିକା ଦିଆଯାଉଛି । ତେବେ ରାଜ୍ୟରେ ଟିକା ନଥିବା ବେଳେ ଶୁକ୍ରବାର 545ଟି କେନ୍ଦ୍ରରେ 93334 ଟୀକାକରଣ କରାଯାଇଛି । ରାଜ୍ୟରେ ମୋଟ ଟୀକାକାରଣ 1 କୋଟି 32 ଲକ୍ଷ 72 ହଜାର 638ରେ ପହଞ୍ଚିସାରିଲାଣି ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
