ଭୁବନେଶ୍ବର: ରାଜଧାନୀର ଏକ ମନ୍ଦିର ପୂଜକ ରାଜ୍ୟ ମାନବାଧିକାର ଆୟୋଗଙ୍କ ନିକଟରେ ଆଣିଛନ୍ତି ସଙ୍ଘାତିକ ଅଭିଯୋଗ। ମନ୍ଦିର ଭିତରେ ଚାଲିଛି ଅନୈତିକ କାର୍ଯ୍ୟ। ବିରୋଧ କଲେ ମିଳୁଛି ମାଡ ସହ ଜୀବନରୁ ମାରିଦେବାକୁ ଧମକ । ପୂଜକ ଜଣକ ହେଉଛନ୍ତି ଯାଜପୁର ଅଞ୍ଚଳର ।
ପୂଜକ ବିଷ୍ଣୁପ୍ରସାଦ ପଣ୍ଡା ଯାଜପୁରରୁ ଆସି ଭୁବନେଶ୍ବରର ୟୁନିଟ-5 ଅଞ୍ଚଳରେ ରୁହନ୍ତି । ଏଜି ଛକ ନିକଟସ୍ଥ ଥିବା ରାଜୀବ ଭବନ ନିକଟରେ ଥିବା ମନ୍ଦିରରେ ଦୀର୍ଘ ବର୍ଷ ଧରି ପୂଜା କରି ଆସୁଛନ୍ତି ସେ । ତେବେ ଗତ କିଛିଦିନ ହେଲା କିଛି ଲୋକ ଜୋର ଜବରଦସ୍ତି ମନ୍ଦିରରେ ପ୍ରବେଶ କରି ରାଜଧାନୀର ବିଭିନ୍ନ ସ୍ଥାନରୁ ମହିଳା ଓ ଝିଅଙ୍କୁ ଆଣି ଦେହ ବ୍ୟବସାୟ କରୁଛନ୍ତି ଏବଂ ଏହାକୁ ବିରୋଧ କଲେ ମିଳୁଛି ପୂଜକ ବିଷ୍ଣୁପ୍ରସାଦଙ୍କୁ ମିଳୁଛି ହତ୍ୟା ଧମକ। ଏହି ଘଟଣାକୁ ନେଇ ସେ କ୍ୟାପିଟାଲ ଥାନାରେ ଜଣାଇଥିଲେ ମଧ୍ୟ ପୋଲିସ କୌଣସି କାର୍ଯ୍ୟାନୁଷ୍ଠାନ କରି ନାହିଁ ।
ମନ୍ଦିର ପରିସରରେ ଏଭଳି କାମ କରାଯାଉଥିବା ବେଳେ ଏହାକୁ ବିରୋଧ କରିବାରୁ ବ୍ରାହ୍ମଣ ବିଷ୍ଣୁପ୍ରସାଦଙ୍କୁ ମାଡ ମାରିବା ସହ ଜୀବନରୁ ମାରିଦେବାକୁ ଧମକ ଦିଆଯାଇଛି। ତେଣୁ ସେ ଏବେ ସେମାନଙ୍କ ଠାରୁ ଲୁଛି ଛପି ରହୁଛନ୍ତି । ତେବେ ଘଟଣା ଅସହ୍ୟ ହେବାରୁ ରାଜ୍ୟ ମାନବାଧିକାର କମିଶନରଙ୍କ ନିକଟରେ ଅଭିଯୋଗ କରିଛନ୍ତି । ଅଭିଯୋଗ ପରେ ବିଷ୍ଣୁପ୍ରସାଦ କହିଛନ୍ତି ଯେ ପୋଲିସ ଠାରୁ ନ୍ୟାୟ ନପାଇ ରାଜ୍ୟ ମାନବାଧିକାରଙ୍କ ଦ୍ବାରସ୍ତ ହୋଇଛନ୍ତି ସେ । ଯଦି ମନାବାଧିକାର ଆୟୋଗ ନିକଟରେ ନ୍ୟାୟ ନପାଇବେ ତେବେ ବ୍ରାହ୍ମଣ ସମାଜ ସହ ଅନଶନରେ ବସିବେ ବୋଲି ଚେତାବନୀ ଦେଇଛନ୍ତି ପୂଜକ ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
