ଭୁବନେଶ୍ବର: ଲକଡାଉନ ଯୋଗୁଁ ଅନେକ କ୍ଷତି ସହିଛନ୍ତି ରାଜ୍ୟର ସବୁ ମନ୍ଦିର ପୂଜକ ଓ ସେବାୟତ । ତେଣୁ ଏମାନଙ୍କ ଲାଗି ପ୍ୟାକେଜ ଘୋଷଣା କରିବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚିଠି ଲେଖିଲେ କେନ୍ଦ୍ରମନ୍ତ୍ରୀ ପ୍ରତାପ ଷଡଙ୍ଗୀ ।
ପୁରୀ ଜଗନ୍ନାଥ ମନ୍ଦିର, ଭୁବନେଶ୍ବର ଲିଙ୍ଗରାଜ ମନ୍ଦିର, କାକଟପୁର ମଙ୍ଗଳା ମନ୍ଦିର, ଯାଜପୁରର ବିରଜା, ବାଲେଶ୍ଵର କ୍ଷୀରଚୋରା ଗୋପୀନାଥ, ଜଗତସିଂହପୁର ସାରଳା ମନ୍ଦିର, ଘଟଗାଁ ତାରିଣୀ ମନ୍ଦିର ଭଳି ଅନେକ ମନ୍ଦିର ରହିଛି ଯେଉଁଠାରେ ସେବାୟତ ହାତ ବାନ୍ଧି ବସିଛନ୍ତି । ଭକ୍ତଙ୍କ ଦାନରେ ପରିବାର ପୋଷୁଥିବା ଏହି ସେବାୟତ ପରିବାର ଏବେ ଚିନ୍ତାରେ । ଏହାକୁ ଦୃଷ୍ଟିରେ ରଖି ସେମାନଙ୍କ ପାଇଁ ପ୍ୟାକେଜ ଘୋଷଣା କରିବାକୁ ଦାବି କରିଛନ୍ତି କେନ୍ଦ୍ରମନ୍ତ୍ରୀ ।
ହିନ୍ଦୁ ଦେବୋତ୍ତର କମିଶନଙ୍କୁ ଏନେଇ ରାଜ୍ୟ ସରକାର ନିର୍ଦ୍ଦେଶ ଦିଅନ୍ତୁ । ସେମାନେ ଏହାକୁ ନେଇ ବିଚାର କରିବେ । ସେବାୟତ ଚିହ୍ନଟ କରି ସେମାନଙ୍କୁ ଆର୍ଥିକ ସହାୟତା ଦେବାକୁ ସେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚିଠି ଲେଖିଛନ୍ତି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
