ଭୁବନେଶ୍ବର: ଓଡିଶା ଗସ୍ତରେ ଥିବା ଜଙ୍ଗଲ ପରିବେଶ ଓ ଜଳବାୟୁ ପରିବର୍ତ୍ତନ ମନ୍ତ୍ରୀ ଭୂପେନ୍ଦ୍ର ଯାଦବ ଶନିବାର ଭୁବନେଶ୍ବର ସ୍ଥିତ ନନ୍ଦନକାନନ ପ୍ରାଣୀଉଦ୍ୟାନ(Nandankanan Zoological Park) ପରିଦର୍ଶନ କରିଛନ୍ତି । ଏହି ସମୟରେ କେନ୍ଦ୍ରମନ୍ତ୍ରୀ କହିଛନ୍ତି, ''ଉପକୂଳବର୍ତ୍ତୀ ଅଞ୍ଚଳରେ କିପରି ନୀଳ ଅର୍ଥନୀତି(Blue Economy) ବଢିପାରିବ ଏବଂ ବିପର୍ଯ୍ୟୟ ପରିଚାଳନା ଉପରେ ଆଲୋଚନା କରାଯିବ । ଦେଶରେ ଥିବା ସମସ୍ତ ଚିଡିଆଖାନା ଏବଂ ପିଲାଙ୍କ ଭିତରେ ପରିବେଶ ଶିକ୍ଷା, ସଚେତନତା ଓ ପରିବେଶ ସମ୍ବନ୍ଧୀୟ ଅନେକ ପ୍ରସଙ୍ଗ ଲାଗି ୧୦ ବର୍ଷର ଯୋଜନା ପ୍ରସ୍ତୁତ ହେବ ।''
''ପ୍ରଧାନମନ୍ତ୍ରୀଙ୍କ ନେତୃତ୍ବରେ ପରିବେଶ ଅନୁକୂଳ ମନ୍ତ୍ରକୁ ଭିନ୍ନ ଭିନ୍ନ କ୍ଷେତ୍ରରେ ଆମେ ଲାଗୁ କରିବାକୁ ଚେଷ୍ଟା କରିବୁ । ସାତକୋଶିଆକୁ ଆମେ ସମ୍ପୂର୍ଣ୍ଣ ଅଧ୍ୟୟନ କରୁଛୁ । ଅନ୍ୟ ଜାଗାଗୁଡ଼ିକୁ ମଧ୍ୟ ଅଧ୍ୟୟନ କରୁଛୁ । ବିଶେଷକରି ଓଡ଼ିଶାର ବାଓସ୍ପିଆର ଜାଗାଗୁଡ଼ିକୁ ବିଶେଷଭାବେ ଅଧ୍ୟୟନ କରାଯାଇଛି । ଚିଲିକା ବ୍ୟତୀତ ଅନ୍ୟ ଆର୍ଦ୍ରଭୂମିକୁ ରାମ୍ସାର କ୍ଷେତ୍ର ଭାବେ ଘୋଷଣା କରାଯାଇଛି । ସେଗୁଡ଼ିକର ପ୍ରାକୃତିକ ସଂରକ୍ଷଣ ଦିଗରେ କାର୍ଯ୍ୟ କରାଯିବ'' ବୋଲି କହିଛନ୍ତି କେନ୍ଦ୍ରମନ୍ତ୍ରୀ(Union Minister Bhupender Yadav) ।
ଏହାମଧ୍ୟ ପଢନ୍ତୁ: ଜଳବାୟୁ ପରିବର୍ତ୍ତନ କାରଣରୁ ହେଉଛି ପ୍ରାକୃତିକ ବିପର୍ଯ୍ୟୟ: କେନ୍ଦ୍ର ପରିବେଶ ମନ୍ତ୍ରୀ
କେନ୍ଦ୍ରମନ୍ତ୍ରୀ ଭୂପେନ୍ଦ୍ର ଯାଦବ ନନ୍ଦନକାନନ ବୁଲିବା ପରେ ପୂର୍ବପେକ୍ଷା ବର୍ତ୍ତମାନ ଏଠାରେ ବହୁତ ଉନ୍ନତି ଘଟିଥିବା କହିଛନ୍ତି । ଦେଶରେ ଯେଉଁ ପ୍ରାଣୀଉଦ୍ୟାନ ରହିଛି ସେମାନଙ୍କ ଉପରେ ଲଗାତାର ନଜର ରଖାଯାଇଛି । ଏହାସହିତ ନନ୍ଦନକାନନରେ ସମସ୍ତ ଜୀବଜନ୍ତୁଙ୍କୁ ଦେଖି ଖୁସି ଲାଗିଲା ସେ କହିଛନ୍ତି ।
ପୋଷଣୀୟ ଉପକୂଳ ପରିଚାଳନା ଜାତୀୟ ସମ୍ମିଳନୀରେ କେନ୍ଦ୍ରମନ୍ତ୍ରୀ ଭୂପେନ୍ଦ୍ର ଯାଦବ ଉପକୂଳ ଅଞ୍ଚଳରେ ପ୍ରାକୃତିକ ବିପର୍ଯ୍ୟୟ ଉପରେ ଗୁରୁତ୍ବାରୋପ କରିଛନ୍ତି । ସେ କହିଛନ୍ତି, ‘‘ଜଳବାୟୁ ପରିବର୍ତ୍ତନ ଯୋଗୁଁ ପରିବେଶ ଉପରେ ବହୁ କୁପ୍ରଭାବ ପଡୁଛି । ବନ୍ୟା ବାତ୍ୟା ଏବଂ ସୁନାମି ଭଳି ପ୍ରାକୃତିକ ବିପର୍ଯୟ ଦେଖାଦେଇଛି । ତେବେ ଏହାକୁ ରୋକିବାକୁ ସରକାରୀ ସ୍ତରରେ ପ୍ରୟାସ ଆରମ୍ଭ ହୋଇଛି । ଉପକୂଳ ଅଞ୍ଚଳରେ ଦେଶର ୨୦ ପ୍ରତିଶତ ଜନସଂଖ୍ୟା ରହିଛି । ବେଳାଭୂମିକୁ ସ୍ବଚ୍ଛ ଓ ପ୍ଲାଷ୍ଟିକ ମୁକ୍ତ କରିବା ପାଇଁ କେନ୍ଦ୍ର ସରକାର ସ୍ବଚ୍ଛ ସାଗର ସୁରକ୍ଷିତ ସାଗର ଯୋଜନା ହାତକୁ ନେଇଛନ୍ତି । ଜଳବାୟୁ ପରିବର୍ତ୍ତନ ଯୋଗୁଁ ସମୁଦ୍ର କୂଳ ଖାଉଛି ଓ ସମୁଦ୍ର ଜଳସ୍ତର ବଢୁଛି । ଯାହା ଚିନ୍ତାର କାରଣ ପାଲଟିଛି । ’’
ଇଟିଭି ଭାରତ, ଭୁବନେଶ୍ବର
