ଭୁବନେଶ୍ବର: ରାତିପହିଲେ ସାବିତ୍ରୀ । ସ୍ୱାମୀର ଦୀର୍ଘଜୀବନ କାମନା କରି ସାବିତ୍ରୀ ବ୍ରତ ପାଳିଥାଏ ସଧବା ନାରୀ । ହେଲେ ଲକଡାଉନ ପାଇଁ ଏସବୁ ଫିକା ପଡିଛି । କାରଣ କଟକଣାକୁ ନେଇ ସଧବା ନାରୀଟିଏ ନା ବଜାର ଆସିପାରିବ ନା ମନ୍ଦିର ଯାଇପାରିବ । ହେଲେ କଟକଣା ଭିତରେ ଯେତିକି କୋହଳ କରାଯାଇଥିଲା ଅର୍ଥାତ ୧୧ଟା ସମୟ ଭିତରେ ଲୋକମାନେ ଯେଉଁ କିଣା କିଣିକରିଥିଲେ ସେଥିରେ ବେଶ ଭିଡ ଦେଖିବାକୁ ମିଳିଥିଲା ।
ଭୁବନେଶ୍ୱର ୟୁନିଟ-୧ ବଜାରରେ ଲାେକମାନେ ଫଳ କିଣିବା ପାଇଁ ଆସିଥିବାବେଳେ ଭୁଲିଯାଇଥିଲେ କଟକଣା। ମାର୍କେଟରେ ସାମାଜିକ ଦୂରତାକୁ ଲୋକମାନେ ଭୁଲିଯାଇଥିବାବେଳେ କଟକଣାକୁ ଖୋଲାଖୋଲି ଫୁ କରିଦେଇଥିଲେ । ଯାହା ଦେଖିଲେ ମନେହେଉଥିଲା ସାବିତ୍ରୀ ବଜାରର ଭିଡ ଯେଭଳି କୋରୋନା ସଂକ୍ରମଣକୁ ହାତ ଠାରି ଡାକୁଥିଲା । କାରଣ ଭିଡ ଭିତରେ ଆଉ କିଣାକିଣି ବ୍ୟସ୍ତରେ ଅନେକଙ୍କ ମୁହଁରେ ଭଲଭାବେ ମାସ୍କ ବି ନଥିଲା । ପରମ୍ପରା ବଞ୍ଚାଇବା ପାଇଁ ଲୋକମାନେ ବ୍ରତ ପାଳନ ପାଇଁ ଫଳ ଓ ଶାଢ଼ୀ କିଣୁଥିଲେ ସତ କିନ୍ତୁ ଫଳ ବଜାରର ଭିଡ଼ କିନ୍ତୁ ରାଜଧାନୀବାସୀଙ୍କୁ କୋରୋନା ସଂକ୍ରମଣ ଆଡକୁ ଟାଣି ନେଉଥିବା ମନେହେଉଥିଲା । ସବୁଠାରୁ ଗୁରୁତ୍ୱପୂର୍ଣ୍ଣ କଥା ଦେଖିବାକୁ ମିଳିଥିଲା ଯେ, ପୋଲିସର ଦୋକାନ ବନ୍ଦ ଡାକରା ପରେ ବି ଲୋକମାନେ କିଣାକିଣି କରୁଥିବାର ଦେଖିବାକୁ ମିଳିଥିଲା ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
