ଭୁବନେଶ୍ବର: ବାଲେଶ୍ବର ପାଇଁ ପ୍ୟାକେଜ ଘୋଷଣାକୁ ନେଇ ସୃଷ୍ଟି ହୋଇଛି ଝଡ । ଆରମ୍ଭ ହୋଇଛି ଆରୋପ ପ୍ରତ୍ୟାରୋପର ରାଜନୀତି । ସୋସିଆଲ ମିଡିଆରେ ଦୁଇ ଦଳର ନେତାଙ୍କ ଘମାଘୋଟ ଲଢେଇ । ପରସ୍ପରକୁ ଛାଡୁଛନ୍ତି ପ୍ରଶ୍ନବାଣ ।
ମଙ୍ଗଳବାର ବାଲେଶ୍ବର ଯାଇଥିଲେ ରାଜ୍ୟ ମୁଖ୍ୟଶାସନ ସଚିବ ସୁରେଶ ମହାପାତ୍ର । ଆଉ ଏପଟେ ସଂଧ୍ୟାରେ ମୁଖ୍ୟମନ୍ତ୍ରୀ ବାଲେଶ୍ବର ପାଇଁ ଘୋଷଣା କଲେ ପ୍ୟାକେଜ । ତେବେ ଆଗକୁ ପିପିଲିରେ ବିଧାନସଭା ଉପନିର୍ବାଚନ ଥିବାବେଳେ ବାଲେଶ୍ବର ପାଇଁ କିପରି ରାଜ୍ୟ ସରକାର ପ୍ୟାକେଜ ଘୋଷଣା କଲେ, ଏହାକୁ ନେଇ ପ୍ରଶ୍ନ କରିଥିଲା ବିଜେପି ।
ବିଜେପିର ରାଷ୍ଟ୍ରୀୟ ମୁଖପାତ୍ର ସମ୍ବିତ ପାତ୍ର ଟ୍ବିଟ କରି କହିଥିଲେ, ସୁରେଶ ବାବୁ ଆପଣ ଜଣେ ଜଣାଶୁଣା ବରିଷ୍ଠ ଓଡ଼ିଆ ପ୍ରଶାସନିକ ଅଧିକାରୀ । ଆପଣ ବାଲେଶ୍ବର ଗଲେ । ସାଙ୍ଗରେ ରାଜ୍ୟର କାର୍ଯ୍ୟକାରୀ ମୁଖ୍ୟମନ୍ତ୍ରୀଙ୍କୁ ନେଲେ। ଯେତେବେଳେ ମୁଖ୍ୟମନ୍ତ୍ରୀ ପିପିଲି ନିର୍ବାଚନ ମଣ୍ଡଳୀର ଦାୟିତ୍ବ ନିଜ ମୁଣ୍ଡକୁ ନେବାର ଘୋଷଣା କଲେ, ପୂର୍ବରୁ ଉପନିର୍ବାଚନ ହୋଇଥିବା ବାଲେଶ୍ବର ପାଇଁ ଆପଣ ପ୍ୟାକେଜ ଘୋଷଣା କଲେ ।
ସମ୍ବିତ କହିଛନ୍ତି, ଆମ ଦଳ ବିଜେପି ରାଜ୍ୟ ସଭାପତିଙ୍କ ସାମ୍ବାଦିକ ସମ୍ମିଳନୀରେ ଅଭିଯୋଗ ପରେ ଖୋଦ ମୁଖ୍ୟ ଶାସନ ସଚିବଙ୍କ ରାଜନୈତିକ ପୃଷ୍ଠଭୂମିରେ ଭୋଟରଙ୍କୁ ପ୍ରଭାବିତ ଉଦ୍ୟମ ଚିନ୍ତାଜନକ । ମହାପାତ୍ର ବାବୁ ଆପଣଙ୍କ ଠାରୁ ଏପରି ରାଜନୈତିକ ଆଭିମୁଖ୍ୟ ଆଶା କରାନଯାଏ । ଆପଣଙ୍କ ଠାରୁ ରାଜ୍ୟବାସୀ ନିରପେକ୍ଷତା ଅପେକ୍ଷା ରଖିଛନ୍ତି ।
ବିଜେପି ନେତା ଆହୁରି ମଧ୍ୟ କହିଛନ୍ତି, ଆପଣ ସମ୍ବିଧାନ ସହ ବନ୍ଧା ହୋଇଛନ୍ତି ରାଜନୀତି ସହ ନୁହେଁ । ବାଲେଶ୍ବର ଗଲେ କିନ୍ତୁ ବିଜେପୁର, ପାଟକୁରା ଓ ତିର୍ତ୍ତୋଲ ଦାୟିତ୍ବ ମୁଖ୍ୟମନ୍ତ୍ରୀ ନେଇଛନ୍ତି ବୋଲି ଘୋଷଣା କରିଥିଲେ । ସେ ପ୍ରତିଶ୍ରୁତି ମୁଖ୍ୟମନ୍ତ୍ରୀଙ୍କର ମନେ ଅଛି ନା ନାହିଁ ବୋଲି ପ୍ରଶ୍ନ କରିଛନ୍ତି ପାତ୍ର ।
ସେପଟେ ସମ୍ବତଙ୍କ ପ୍ରଶ୍ନକୁ ପ୍ରଶ୍ନବାଣ ଛାଡି ହିଁ ଜବାବ ଦେଇଛନ୍ତି ବିଜେଡି ରାଜ୍ୟସଭା ସାଂସଦ ସସ୍ମିତ ପାତ୍ର । ସସ୍ମିତ ଟ୍ବିଟ କରି ଲେଖିଛନ୍ତି, ଆପଣ ବାଲେଶ୍ବରର ବିକାଶ ବିରୋଧୀ କାହିଁକି ? ଆପଣ କଣ ବାଲେଶ୍ବର ବିରୋଧୀ ? ଆପଣ ଏ ପ୍ରକାରର ଟ୍ବିଟ କରିବା ପୂର୍ବରୁ ମାନ୍ୟବର ମନ୍ତ୍ରୀ ତଥା ବାଲେଶ୍ବର ସାଂସଦ ପ୍ରତାପ ଷଡଙ୍ଗୀଙ୍କୁ ପଚାରିଥିଲେ କି ବୋଲି ପ୍ରଶ୍ନ କରିଛନ୍ତି ସସ୍ମିତ ।
ପ୍ରକାଶ ଯେ, ବୁଧବାର କଂଗ୍ରେସ ପ୍ରାର୍ଥୀ ଅଜିତ ମଙ୍ଗରାଜଙ୍କ ଦେହାନ୍ତ ପରେ ପିପିଲି ଉପନିର୍ବାଚନକୁ ବାତିଲ କରାଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
