ଭୁବନେଶ୍ବର: ଉଦଯାପିତ ହେଲା ରାଜଧାନୀ ୟୁନିଟ ୧ ସ୍ଥିତ ଆଦିବାସୀ ମେଳା। କୋଭିଡ କଟକଣା ମଧ୍ୟରେ ଜାନୁଆରୀ 26 ତାରିଖରୁ ଆଦିବାସୀ ମେଳାରୁ ଶୁଭାରମ୍ଭ ହୋଇଥିଲା। ପ୍ରତିବର୍ଷ ଭଳି ଏବର୍ଷ ମଧ୍ୟ ଚିରାଚରିତ ଭାବେ ସାଧାରଣତନ୍ତ୍ର ଦିବସ ଅବସରରୁ ଆରମ୍ଭ ହୋଇଥିବା ଆଦିବାସୀ ମେଳା ଫେବୃଆରୀ ୯ ତାରିଖ ଯାଏଁ ଚାଲିଥିଲା। 15 ଦିନ ଧରି ଚାଲିଥିଲା ଏହି ଆଦିବାସୀ ମେଳା। ଚଳିତ ବର୍ଷ ଏହି ମେଳାରେ ଦୁଇ କୋଟିରୁ ଅଧିକ ଟଙ୍କାର ବ୍ୟବସାୟ ହୋଇଛି।
ଅନୂସୁଚିତ ଜାତି ଓ ଅନୁସୁଚିତ ଜନଜାତି ବିଭାଗ ଦ୍ବାରା ଆୟୋଜିତ ୬୭ତମ ଆଦିବାସୀ ମେଳାକୁ ଭର୍ଚୁଆଲ ମାଧ୍ୟମରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଦଘାଟନ କରିଥିଲେ। କୋଭିଡ କଟକଣା ଯୋଗୁଁ ଉଭୟ ଭର୍ଚୁଆଲ ଓ ପ୍ରତ୍ୟକ୍ଷ ଭାବେ ଆୟୋଜିତ ହୋଇଥିଲା ଆଦିବାସୀ ମେଳା। ପ୍ରତ୍ୟେକ ଦିନ ମେଳା ପୂର୍ବାହ୍ନ 11 ଟାରୁ ଆରମ୍ଭ ହୋଇ ସନ୍ଧ୍ୟା 7ଟା ପର୍ଯ୍ୟନ୍ତ ଚାଲୁ ରହିଥିଲା। ଚଳିତ ବର୍ଷ ଆଦିବାସୀ ଓ ପାରମ୍ପରିକ ସାମଗ୍ରୀ ବିକ୍ରିବଟା ପାଇଁ ୯୦ଟି ଫିଜିକାଲ୍ ଓ ୧୦ ଟି ଭର୍ଚୁଆଲ ଆକାରରେ ମୋଟ ୧୦୦ ଟି ଷ୍ଟଲ ରହିଛି ରହିଥିଲା।
ଏଥର କିନ୍ତୁ ଫୁଡ୍ କୋର୍ଟ, ଆଦିବାସୀ ଝାଟିମାଟି ଘର, ମନ୍ଦିର, ସରକାରଙ୍କ ଦ୍ଵାରା ଲାଗୁଥିବା ଷ୍ଟଲ, ଆର୍ଟ କ୍ରାଫ୍ଟ୍ ଷ୍ଟଲ ମେଳାରେ ଦେଖିବାକୁ ମିଳି ନଥିଲା। ତେବେ ଉଭୟ ଅନଲାଇନ ଓ ଅଫଲାଇନ ହାଇବ୍ରିଡ୍ ମୋଡରେ ମେଳା ବୁଲିବା ଓ ଜିନିଷ କିଣିବାର ବ୍ୟବସ୍ଥା କରାଯାଇଥିଲା।
କରୋନା କଟକଣା ଯୋଗୁଁ ମେଳାରେ ଲୋକମାନଙ୍କ ସମାଗମ କମ ଦେଖିବାକୁ ମିଳିଥିଲା। ଏହାସତ୍ତ୍ବେ ଭଲ ବ୍ୟବସାୟ ହୋଇଥିବା ନେଇ ଷ୍ଟଲ ଦେଇଥିବା ବ୍ୟକ୍ତିମାନେ ପ୍ରକାଶ କରିଛନ୍ତି । ଏହି ଅବସରରେ ଚଳିତ ବର୍ଷ ଆଦିବାସୀ ମେଳାରେ ଭଲ ବ୍ୟବସାୟ କରିଥିବା ଷ୍ଟଲ ମାଲିକଙ୍କୁ ସମ୍ବର୍ଦ୍ଧିତ କରାଯାଇଥିଲା।
ଆଦିବାସୀ ମେଳାର ଶେଷ ଦିନରେ ଦକ୍ଷତା ବିକାଶ ବିଭାଗର ଅଧ୍ୟକ୍ଷ୍ୟ ସୁବ୍ରତ ବାଗଚି ଓ ତାଙ୍କ ପତ୍ନୀ, ବିଭାଗୀୟ ପ୍ରମୁଖ ସାଶନ ସଚିବ ରଞ୍ଜନ ଚୋପ୍ରା ଓ ବିଭାଗୀୟ ନିର୍ଦେଶକ ଗୁହା ପୁନମ କୁମାର ପ୍ରମୁଖ ଯୋଗ ଦେଇଥିଲେ।
ଭୁବନେଶ୍ୱରରୁ ଦେବସ୍ମିତା ରାଉତ ଓ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
