ଭୁବନେଶ୍ବର: ଗତବର୍ଷ ୨୦୨୧ ମସିହାରେ କୋରୋନା ମହାମାରୀକୁ ନିୟନ୍ତ୍ରଣ କରିବା ପାଇଁ ସରକାର ରାଜ୍ୟର ପ୍ରତି ପଞ୍ଚାୟତରେ ଗୋଟିଏ ଲେଖାଏଁ ସଙ୍ଗରୋଧ କେନ୍ଦ୍ର ପ୍ରତି ସ୍କୁଲରେ ଖୋଲିଥିଲା । ଯେଉଁ ବ୍ୟକ୍ତିମାନେ ବିଦେଶ କିମ୍ବା ଅନ୍ୟ ରାଜ୍ୟରୁ ଆସୁଥିଲେ ସେମାନଙ୍କ ପାଇଁ ସଙ୍ଗରୋଧ ବାଧ୍ୟତାମୂଳକ କରାଯାଇଥିଲା ।
କୋରୋନା ପରୀକ୍ଷଣ ପରେ ଯେଉଁ ବ୍ୟକ୍ତି ଆରୋଗ୍ୟ ଲାଭ କରୁଥିଲେ ସେ ନିଜ ଘରକୁ ଯାଇ ପାରୁଥିଲେ ଓ ଅନ୍ୟ ଯେଉଁମାନେ ସଂକ୍ରମିତ ହେବାର ଜଣାପଡୁଥିଲା ସେମାନଙ୍କୁ ଚିକିତ୍ସା ପାଇଁ କୋଭିଡ ହସ୍ପିଟାଲକୁ ପଠାଯାଉଥିଲା । ଗୋଟିଏ ସଙ୍ଗରୋଧ ଗୃହ ଖୋଲିବା ପାଇଁ ପ୍ରତି ପଞ୍ଚାୟତ କାର୍ଯ୍ୟାଳୟକୁ ୫ଲକ୍ଷ ଟଙ୍କା ଲେଖାଏଁ ବ୍ୟୟ ବରାଦ ହୋଇଥିଲା । ଏ ବାବଦରେ ରାଜ୍ୟ ସରକାର ପ୍ରାୟ ୩୪୦ କୋଟି ଟଙ୍କା ଖର୍ଚ୍ଚ କରିଥିଲେ ଆଉ ଏହାଦ୍ବାରା ମଧ୍ୟ କୋରୋନା ମହାମାରୀକୁ ଗ୍ରାମାଞ୍ଚଳରେ ରୋକା ଯାଇପାରିଥିଲା ।
ସହରକୁ ନୂଆକରି ଆସିଥିବା ଏହି ମହାମାରୀକୁ ସମ୍ମୁଖୀନ ହେବା ସମୟରେ କିଛି ନିରାକରଣର ଉପାୟ ନଥିଲା ତେଣୁ ସତର୍କତା ହିଁ ଏକମାତ୍ର ବାଟ ଥିଲା । ହେଲେ ଦ୍ବିତୀୟ ଲହର ବେଳକୁ ସହରବାସୀଙ୍କ ପାଖରେ ଯଥେଷ୍ଟ, ଔଷଧ, ଅଭିଜ୍ଞ ସ୍ବାସ୍ଥ୍ୟକର୍ମୀ ଓ ପ୍ରତିଷେଧକ ଟୀକା ଉପଲବ୍ଧ ହୋଇଥିଲା । କିନ୍ତୁ କୋରୋନାର କରାଳ ରୂପକୁ ସାମ୍ନା କରିବାକୁ ରାଜ୍ୟ ସରକାରଙ୍କର ସେଭଳି ତପ୍ତରତା ଦେଖିବାକୁ ମିଳିନଥିଲା ଯାହା ଫଳରେ ସଂକ୍ରମଣ ଦିନକୁ ଦିନ ବଢିବାରେ ଲାଗିଥିଲା । ଆଉ ଅନେକ ନିରୀହ ଜୀବନ ମୃତ୍ୟୁ ମୁଖକୁ ଠେଲି ହୋଇ ଯାଇଥିଲା ।
ସହରାଞ୍ଚଳରେ ସଚେତନତା ଓ ସ୍ବାସ୍ଥ୍ୟସେବାର ଉପଲବ୍ଧ ହେବାଯୋଗୁଁ ଅନେକ ଜୀବନ ବଞ୍ଚିଯାଇଛି ସତ କିନ୍ତୁ ଗାଁ ମାନଙ୍କରେ ସଚେତନତା ଅଭାବରୁ ସଂକ୍ରମଣ ଦିନକୁ ଦିନ ବ୍ୟାପକ ହେବାରେ ଲାଗିଥିଲା । ଯେହେତୁ କୋରୋନାର ଦ୍ଵିତୀୟ ସହର ଅତ୍ୟନ୍ତ ଘାତକ ସାବ୍ୟସ୍ତ ହୋଇଥିଲା ଆଉ ଏହାକୁ ରୋକିବାକୁ ଘରକୁ ଘର ବୁଲି ରୋଗୀ ଚିହ୍ନଟ କରି ସଙ୍ଗରୋଧରେ ରହିବାକୁ ସରକାରଙ୍କ ତରଫରୁ ପରାମର୍ଶ ଦିଆଯାଇଥିଲା ।
ଏହାସହ ଦୀର୍ଘ ଦେଢ ବର୍ଷର ମହାମାରୀ ଜନିତ କ୍ଷତିଗ୍ରସ୍ତ ବଜାର ଅର୍ଥନୀତି ଯୋଗୁଁ ଅନେକ ପରିବାର ରୋଜଗାର ହରାଇଛନ୍ତି । ଯାହାକୁ ନେଇ ଦେଶର ଅର୍ଥନୀତି ଭୁଶୁଡି ପଡିଥିବା ବେଳେ ନିମ୍ନ ମଧ୍ୟବିତ୍ତ ଆଦି ଅନେକ ପରିବାର ଚଳାଇବାକୁ ଅସମର୍ଥ ହୋଇପଡିଛନ୍ତି । ତେଣୁ ଓଡିଶା ପ୍ରଗତି ଦଳ ଓଡ଼ିଶାବାସୀଙ୍କ ତରଫରୁ ରାଜ୍ୟ ସରକାରଙ୍କୁ ଅନୁରେଧ କରିଛନ୍ତି କି ଗ୍ରାମାଞ୍ଚଳରେ ଯୁଦ୍ଧକାଳୀନ ଭିତ୍ତିରେ ସଙ୍ଗରୋଧ ଗୃହଗୁଡିକୁ ପୁନଃ କାର୍ଯ୍ୟକ୍ଷମ କରନ୍ତୁ ଓ ରାଜ୍ୟର ପ୍ରତି ପରିବାରକୁ ୬ ମାସ ପର୍ଯ୍ୟନ୍ତ ମାସିକ ୨୦୦୦ ଟଙ୍କା ଲେଖାଁଏ ଆର୍ଥିକ ସହାୟତା ପ୍ରଦାନ କରନ୍ତୁ ବୋଲି ଏକ ପ୍ରେସ ବିଜ୍ଞପ୍ତି ମାଧ୍ୟମରେ ଅନୁରୋଧ କରିଛି ଦଳ ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
