ଭୁବନେଶ୍ବର: ଆଜି ଭାରତ ବନ୍ଦ ଡାକରା ଦେଇଛନ୍ତି ବିଭିନ୍ନ କୃଷକ ସଂଗଠନ । ଏହାକୁ ଦୃଷ୍ଟିରେ ରଖି ଯେକୌଣସି ପରିସ୍ଥିତିର ମୁକାବିଲା କରିବା ପାଇଁ ସବୁ ଜିଲ୍ଲାପାଳମାନଙ୍କୁ ଚିଠି ଲେଖିଛି ଗୃହ ବିଭାଗ । ଆଇନ ଶୃଙ୍ଖଳା ବଜାୟ ରଖିବା ସହିତ ଅତ୍ୟାବଶ୍ୟକ ସେବା ଯେପରି ବାଧାପ୍ରାପ୍ତ ନହୁଏ ସେଥିପାଇଁ ଦୃଷ୍ଟି ଦେବାକୁ କୁହାଯାଇଛି। ଗୃହ ବିଭାଗ ସ୍ବତନ୍ତ୍ର ସଚିବ ସନ୍ତୋଷ ବାଳ ଏନେଇ ଚିଠି ଲେଖିଛନ୍ତି । ସେହିପରି ବନ୍ଦକୁ ନଜରରେ ରଖି ରାଜଧାନୀରେ ଗଡିବନି ମୋ ବସ । ଏନେଇ କୃଟ ପକ୍ଷରୁ ସୂଚନା ଦିଆଯାଇଛି।
କୃଷି ଆଇନକୁ ବିରୋଧ କରି ସାରା ଦେଶରେ କୃଷକ ଆନ୍ଦୋଳନ ତେଜୁଛି,ଏପରିକି ପଞ୍ଜାବ,ହରିୟାନା ,ଉତ୍ତରପ୍ରଦେଶ,ମଧ୍ୟ ପ୍ରଦେଶ,ଓଡିଶା ଏବଂ ବିଭିନ୍ନ ରାଜ୍ୟର ଚାଷୀ ଏବେ ରାଜଧାନୀ ଦିଲ୍ଲୀରେ ଡେରା ପକାଇଛନ୍ତି । କେନ୍ଦ୍ର ସରକାର କୃଷି ବିଲକୁ ପ୍ରତ୍ୟାହାର କରନ୍ତୁ ଦାବିରେ ଚାଷୀ ଅଡ଼ି ବସିଥିବାବେଳେ କଂଗ୍ରେସ ,ବାମ ଦଳ,ବିଭିନ୍ନ ରାଜ୍ୟର ଆଞ୍ଚଳିକ ଦଳ ଏହି ଆନ୍ଦୋଳନରେ ସାମିଲ ହେଉଛନ୍ତି । ରାଜ୍ୟ କଂଗ୍ରେସ ଏହାକୁ ସିଧା ସଳଖ ସମର୍ଥନ ଦେଇସାରିଥିବା ବେଳେ ପ୍ରତ୍ୟକ୍ଷ ଭାବେ ସମର୍ଥନ ଦେଇନାହିଁ ବିଜେଡି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ ଓ ସଂଞ୍ଜୀବ ରାୟଙ୍କ ରିପୋର୍ଟ, ଇଟିଭି ଭାରତ
