ଭୁବନେଶ୍ବର: ଓଡିଶା ସମେତ ୩ ରାଜ୍ୟକୁ ୪ ସପ୍ତାହ ଭିତରେ ସୁପ୍ରିମକୋର୍ଟଙ୍କ କାରଣ ଦର୍ଶାଅ ନୋଟିସ ନିର୍ଦ୍ଦେଶ । ରାଜ୍ୟରେ ଏତେ ଦିନ ହେଲା ସୂଚନା କମିଶନ କାର୍ଯ୍ୟାଳୟରେ ଏତେ ପଦ ପଦବୀ ଖାଲି ପଡ଼ିଛି, ସେ ନେଇ ଓଡ଼ିଶା ସରକାରଙ୍କୁ କାରଣ ଦର୍ଶାଅ ନୋଟିସ ଜାରି କରିଛନ୍ତି ସୁପ୍ରିମକୋର୍ଟ ।
ରାଜ୍ୟ ସରକାର କଣ ପାଇଁ ଦୀର୍ଘ ଦିନ ହେବ ସୂଚନା କମିଶନ କାର୍ଯ୍ୟାଳୟରେ ଥିବା ପଦ ଗୁଡିକ ପୂରଣ କରିନାହାଁନ୍ତି ସେ ନେଇ ଓଡ଼ିଶା ସମେତ ୩ ରାଜ୍ୟକୁ କାରଣ ଦର୍ଶାଅ ନୋଟିସ ଜାରି କରିଛନ୍ତି ସୁପ୍ରିମକୋର୍ଟ । ଏହାକୁ ନେଇ ସୂଚନା ଅଧିକାର କର୍ମୀମାନେ ସୁପ୍ରିମକୋର୍ଟଙ୍କ ଏଭଳି କଡା ଆଭିମୁଖ୍ୟକୁ ସ୍ବାଗତ କରିଛନ୍ତି । ସୂଚନା କମିଶନ କାର୍ଯ୍ୟାଳୟରେ ବିଭିନ୍ନ ପଦବୀ ଖାଲିଥିବା କାରଣରୁ ସୂଚନା ଅଧିକାର କର୍ମୀମାନେ ସରକାରୀ ତଥ୍ୟ ପାଇବା ନେଇ ଅସୁବିଧାର ସମ୍ମୁଖୀନ ହେଉଛନ୍ତି ବୋଲି ସେମାନେ ମତ ଦେଇଛନ୍ତି ।
'ରାଜ୍ୟ ସରକାର ସୂଚନା କମିଶନଙ୍କ କାର୍ଯ୍ୟାଳୟରେ ଥିବା ୮ ଟି ସୂଚନା କମିଶନ ପଦବୀ ପୂରଣ କରିନାହାଁନ୍ତି । ବ୍ୟବସ୍ଥାଗତ ଭାବରେ ସରକାର ଲୋକଙ୍କ ପାଖରେ ଉତ୍ତରଦାୟୀ ରହିବାକୁ ଚାହୁଁନାହାଁନ୍ତି । ସରକାର ଜାଣିଶୁଣି ଆଇନର କାର୍ଯ୍ୟକାରୀ କରୁନାହାଁନ୍ତି ଫଳରେ ସାଧାରଣ ଲୋକ ତଥ୍ୟ ପାଇବାରେ ଅସୁବିଧାରେ ପଡ଼ିବେ । ସରକାର ଏ ଆଇନ ନେଇ ଷଡ଼ଯନ୍ତ୍ର ରଚିଛନ୍ତି ,କାରଣ ସରକାରଙ୍କ ଅସଲ ଚେହେରା ସାମ୍ନାକୁ ଆସିଯିବ । ସରକାରୀ ନିୟମ ମୁତାବକ ସରକାରୀ କର୍ମଚାରୀ ଆଚରଣ ସଂହିତା ମାନିବା କଥା କିନ୍ତୁ ତାହା ହେଉନାହିଁ, 5ଟି ଏବଂ ମୋ ସରକାର କେବଳ ସ୍ଲୋଗାନ' ବୋଲି ମାନବାଧିକାର କର୍ମୀ ବିଶ୍ବପ୍ରିୟ କାନୁନଗୋ କହିଛନ୍ତି ।
ଅନ୍ୟପକ୍ଷରେ ସୂଚନା ଅଧିକାର କର୍ମୀ ଶ୍ରୀକାନ୍ତ ପାକଳଙ୍କ କହିବା କଥା କି,'ରାଜ୍ୟରେ ଦୀର୍ଘଦିନ ଧରି ସୂଚନା କମିଶନ କାର୍ଯ୍ୟାଳୟରେ ଆହୁରି ୮ଟି କମିଶନ ପଦବୀ ଖାଲି ପଡ଼ିଛି । ପ୍ରାୟ ୧୪,୧୫ ହଜାର କେସ ପଡିରହିଛି । ପୂର୍ବରୁ ଏନେଇ ସୁପ୍ରିମକୋର୍ଟ ରାଜ୍ୟ ସରକାରଙ୍କ ଠାରୁ ଜବାବ ତଲବ କରିଥିଲେ । ସାମ୍ବିଧାନିକ ପଦକୁ ଅଚଳକରି ଅପମର୍ଯ୍ୟାଦା କରୁଛନ୍ତି ରାଜ୍ୟ ସରକାର । ଯାହା ଫଳରେ ତ୍ବରିତ ନ୍ୟାୟ ପାଇବାରୁ ବଞ୍ଚିତ ହେଉଛନ୍ତି ସାଧାରଣ ଲୋକ । ଦ୍ବିତୀୟ ଥର କେସ ଅପିଲ କଲେ ସମାଧାନ ହେବାକୁ ୩ ବର୍ଷ ସମୟ ଲାଗିଯାଉଛି । ସରକାରଙ୍କର ଆନ୍ତରିକତା ନାହିଁ ଖାଲି ଭୋଟ ପାଇବା ପାଇଁ ଯୋଜନା ପ୍ରଣୟନ କରୁଛନ୍ତି ସତ କିନ୍ତୁ ବାସ୍ତବରେ ତାହା ଓଲଟା' ବୋଲି ସ ମତ ରଖିଛନ୍ତି।
କେବଳ ଓଡିଶା ନୁହେଁ ମହାରାଷ୍ଟ୍ର ଏବଂ ଆନ୍ଧ୍ରପ୍ରଦେଶ ସରକାରଙ୍କୁ ମଧ୍ୟ କାରଣ ଦର୍ଶାଅ ନୋଟିସ ଜାରି କରିଛନ୍ତି ସୁପ୍ରିମକୋର୍ଟ । ସେହିଭଳି କେନ୍ଦ୍ର ସରକାରଙ୍କୁ ନୋଟିସ ଜାରି କରାଯାଇଛି । କେନ୍ଦ୍ର ସୂଚନା କମିଶନ କାର୍ଯ୍ୟାଳୟରେ ମଧ୍ୟ ବିଭିନ୍ନ ପଦ ପଦବୀ ଖାଲି ପଡ଼ିଥିବାରୁ କେନ୍ଦ୍ର ଠାରୁ ଜବାବ ତଲବ କରିଛନ୍ତି ସୁପ୍ରିମକୋର୍ଟ ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
