ଭୁବନେଶ୍ବର: ଗ୍ରାମାଞ୍ଚଳରେ ପ୍ରଧାନମନ୍ତ୍ରୀ ଆବାସ ଯୋଜନାରେ ଗୃହ ନିର୍ମାଣକୁ ଆହୁରି ବ୍ୟାପକ କରାଯିବ । ଏନେଇ ସ୍ବତନ୍ତ୍ର ରଣନୀତି ପ୍ରସ୍ତୁତ କରିଛନ୍ତି ରାଜ୍ୟ ସରକାର । ପଞ୍ଚାୟତିରାଜ ସଚିବ ଦେଓ ରଞ୍ଜନ ସିଂ ଏଥିପାଇଁ ସବୁ ଜିଲ୍ଲାପାଳଙ୍କୁ ଚିଠି ଲେଖିଛନ୍ତି । ସୋମବାର ଠାରୁ ସବୁ ସ୍ଥାନରେ ହିତାଧିକାରୀଙ୍କ ସମ୍ମିଳନୀ ହେବ। ଓ ଏହା 31ତାରିଖ ଯାଏଁ ଚାଲିବ ବୋଲି ସୂଚନା ରହିଛି । ଏଥିରେ ହିତାଧିକାରୀଙ୍କ ମତାମତ ନେବା, ଗୃହ ନିର୍ମାଣ, କିସ୍ତି, ଆମ ଘର ଆପ୍ ସଂକ୍ରାନ୍ତରେ ସଚେତନ କରାଯିବ ।
ମୁଖ୍ୟତଃ 5 ଗୋଟି ସ୍ତରରେ ଏହି ଯୋଜନାକୁ ତ୍ବରାନ୍ବିତ କରାଯିବ । ପ୍ରଶିକ୍ଷଣ, ହିତାଧିକାରୀ ସମ୍ମିଳନୀ, ଗୃହନିର୍ମାଣାର୍ଥ ମୂଳଦୁଆ ସ୍ଥାପନ ଅଭିଯାନ, ମୁଖ୍ୟମନ୍ତ୍ରୀଙ୍କ ଦ୍ବାରା ଶିଳାନ୍ୟାସ, ଗୃହ ନିର୍ମାଣ ପାଇଁ କଞ୍ଚାମାଲ ଯୋଗାଇବା ଦାୟିତ୍ବ ଓ ସର୍ବଶେଷରେ ଗୃହପ୍ରବେଶ କାର୍ଯ୍ୟକ୍ରମ ।
ଅଗଷ୍ଟ 26 ତାରିଖ ଠାରୁ 31 ଯାଏଁ ହିତାଧିକାରୀ ସମ୍ମିଳନୀ ହେବ । 31 ଅଗଷ୍ଟ ଠାରୁ ସେପ୍ଟେମ୍ବର 7 ତାରିଖ ଯାଏଁ ଗୃହନିର୍ମାଣାର୍ଥ ମୂଳଦୁଆ ସ୍ଥାପନ ଅଭିଯାନ ।
ସେହିପରି ସେପ୍ଟେମ୍ବର ଦ୍ଵିତୀୟ ସପ୍ତାହରେ ପ୍ରାୟ 3 ଲକ୍ଷ ପକ୍କା ଘରର ଶିଳାନ୍ୟାସ କରିବେ ମୁଖ୍ୟମନ୍ତ୍ରୀ । ଭିଡିଓ କନଫେରେନ୍ସିଂ ଜରିଆରେ ଏହା କରାଯିବ। । ଏହି ଭିଡିଓ କନଫେରେନ୍ସିଂ ସମୟରେ ସାଂସଦ, ବିଧାୟକ, ମନ୍ତ୍ରୀ, ବ୍ଲକ ଅଧ୍ୟକ୍ଷ, ଜିଲ୍ଲା ପରିଷଦ ସଭ୍ୟ ଉପସ୍ଥିତ ରହିବେ । ସେହିପରି ଚତୁର୍ଥ ସପ୍ତାହରେ ମଧ୍ୟ ସମାନ କାର୍ଯ୍ୟକ୍ରମ ହାତକୁ ନିଆଯିବ।
ଗୃହ ସମ୍ପୂର୍ଣ୍ଣ ହେବ ପରେ ଗୃହ ପ୍ରବେଶ କରାଯିବ । ଅକ୍ଟୋବର 2ରେ ଗୃହ ପ୍ରବେଶ କାର୍ଯ୍ୟକ୍ରମ ହେବ। ଶୁଭ ଦିନ ଦେଖି ଗୃହ ପ୍ରବେଶ ହେବ। ଦିପାବଳୀରେ ମଧ୍ୟ ଏହି କାର୍ଯ୍ୟକ୍ରମ ହେବ।
ଯେଉଁ ହିତାଧିକାରୀଙ୍କୁ ଅର୍ଥ କିସ୍ତି ସଠିକ ସମୟରେ ମିଳୁ ନାହିଁ, ସେମାନଙ୍କ କାରଣ ଖୋଜିବାକୁ ବ୍ୟବସ୍ଥା ହୋଇଛି । ଏପରିକି ଆପ୍ ଜରିଆରେ ତଥ୍ୟ ଦେଇ କିପରି ହିତାଧିକାରୀଙ୍କ ଖାତାକୁ ଟଙ୍କା ଯିବା ସେ ନେଇ ବିଭାଗ ବିଚାର କରୁଥିବା ଜଣାପଡିଛି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
