ଭୁବନେଶ୍ବର: ରାଜ୍ୟକୁ ଭିଭିଆଇପି ଜେଡ ପ୍ଲସ ସୁରକ୍ଷାଧାରୀଙ୍କ ଗସ୍ତ ବଢୁଥିବା ବେଳେ ସେମାନଙ୍କ ସୁରକ୍ଷା ପାଇଁ ନାହିଁ ଆବଶ୍ୟକ ସଂଖ୍ୟକ ବୁଲେଟ ପ୍ରୁଫ ଗାଡି । ଯେଉଁ କିଛି ଅଛି ତାହା ବ୍ୟବହାର ଉପଯୋଗୀ ନୁହେଁ । ତେଣୁ ଅଧିକ ସଂଖ୍ୟକ ବୁଲେଟ ପ୍ରୁଫ ଗାଡି ସହ ମୁଖ୍ୟମନ୍ତ୍ରୀଙ୍କ ପାଇଁ ସ୍ବତନ୍ତ ଭାବେ ଦୁଇଟି ବୁଲେଟ ପ୍ରୁଫ ଇନୋଭା କ୍ରେଷ୍ଟା ଗାଡି କିଣିବାକୁ ରାଜ୍ୟ ଗୁଇନ୍ଦା ବିଭାଗ ପୋଲିସ ଡିଜିଙ୍କୁ ଚିଠି ଲେଖିଛି ।
ଗତ 25 ତାରିଖରେ ସ୍ବତନ୍ତ ଗୁଇନ୍ଦା ଡିଜି ପୋଲିସ ଡିଜିଙ୍କୁ ଚିଠି ଲେଖି ଅଧିକ ବୁଲେଟ ପ୍ରୁଫ ଗାଡି ପାଇଁ ଅନୁରୋଧ କରିଛନ୍ତି । ଏଥିରେ କୁହାଯାଇଛି ଯେ, ରାଜ୍ୟରେ 11ଟି ବୁଲେଟ ପ୍ରୁଫ ଗାଡି ଅଛି । ସେଥିମଧ୍ୟରୁ 9ଟି ହିନ୍ଦୁସ୍ତାନ ମୋଟର୍ସର ଆମ୍ବାସଡର କାର ଓ ଗୋଟିଏ ଟାଟା ସଫାରି ଓ ଅନ୍ୟଟି ମହିନ୍ଦ୍ରା ସ୍କର୍ପିଓ । ଆମ୍ବାସଡର କାରଗୁଡିକ ଚାଲିବା ଉପଯୋଗୀ ନୁହେଁ । ଏହି ଗାଡିର ସ୍ପେୟାର ପାର୍ଟସ ବି ମିଳୁନି ।
ରାଜ୍ୟକୁ ଧୀରେ ଧୀରେ ଭିଭିଆଇପି ଓ ଜେଡ ପ୍ଲସ ସୁରକ୍ଷାଧାରୀଙ୍କ ଗସ୍ତ ବଢୁଥିବା ବେଳେ ସ୍କର୍ପିଓ ଓ ସଫାରି ଗାଡିର ବ୍ୟବହାର ହେଉଛି । ଅତ୍ୟଧିକ ବ୍ୟବହାର ଯୋଗୁଁ ସଫାରି ଓ ସ୍କର୍ପିଓରେ ବାରମ୍ବାର ଯାନ୍ତ୍ରିକ ତ୍ରୁଟି ଦେଖାଦେଉଛି । ଏହିଦୃଷ୍ଟିରୁ ନୂଆ ବୁଲେଟ ପ୍ରୁଫ ଗାଡି କିଣିବାକୁ ଗୁଇନ୍ଦା ବିଭାଗର ସ୍ବତନ୍ତ୍ର ଡିଜି ଅନୁରୋଧ କରିଛନ୍ତି । ଏଥିସହ ସଡକ ପଥରେ ମୁଖ୍ୟମନ୍ତ୍ରୀଙ୍କ ଗସ୍ତ ପାଇଁ ମଧ୍ୟ ଦୁଇଟି ଇନୋଭା କ୍ରେଷ୍ଟା ଗାଡି ମଗାଯାଇଛି ।
ଏହା ପୂର୍ବରୁ ମଧ୍ୟ ଗୁଇନ୍ଦା ବିଭାଗ ପୋଲିସ ଡିଜିଙ୍କୁ ଦୁଇଥର ଚିଠି ଲେଖିଥିଲା । ଭିଭିଆଇପି ଓ ଜେଡ ପ୍ଲସ ସୁରକ୍ଷାଧାରୀଙ୍କ ପାଇଁ ନୂଆ ବୁଲେଟ ପ୍ରୁଫ ଗାଡି କିଣିବାକୁ ଗତ 2017 ନଭେମ୍ବର 30 ତାରିଖ ଓ 2018 ଏପ୍ରିଲ 17 ତାରିଖରେ ଚିଠି ଲେଖାଯାଇଥିଲା ।
ଭୁବନେଶ୍ବରରୁ ଅଜିତ ଦାଶ, ଇଟିଭି ଭାରତ
