ଭୁବନେଶ୍ବର: ଟିକା ପାଇଁ ଗ୍ଲୋବାଲ ଟେଣ୍ଡରକୁ ସମ୍ପୂର୍ଣ୍ଣ ବାତିଲ କଲେ ରାଜ୍ୟ ସରକାର । ରାଜ୍ୟକୁ କେନ୍ଦ୍ର ସରକାରଙ୍କ ପକ୍ଷରୁ ବ୍ୟାପକ ପରିମାଣରେ ଟୀକା ମିଳୁଥିବା ଯୋଗୁଁ ରାଜ୍ୟ ଓହରିଥିବା ଜଣାପଡିଛି । ଏନେଇ ବୁଧବାର ଔଷଧ ନିଗମ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି ।
କିଛି ଦିନ ତଳେ ପ୍ରଧାନମନ୍ତ୍ରୀ ମାଗଣା ଟିକା ଘୋଷଣା କରିବା ପରେ ରାଜ୍ୟ ସରକାର ଏପରି ନିଷ୍ପତ୍ତି ନେଇ ପାରନ୍ତି ବୋଲି ଆକଳନ କରାଯାଉଥିଲା । ହେଲେ ବୁଧବାର ଏନେଇ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇଛି । ରାଜ୍ୟରେ ଟିକା ଅଭାବକୁ ଦୂର କରିବାକୁ ରାଜ୍ୟ ସରକାର ଗ୍ଲୋବାଲ ଟେଣ୍ଡର ମାଧ୍ୟମରେ ଟିକା କିଣିବାକୁ ନିଷ୍ପତ୍ତି ନେଇଥିଲେ । ମେ 14 ତାରିଖରେ ରାଜ୍ୟ ସରକାର ଗ୍ଲୋବାଲ ଟେଣ୍ଡରିଂ ପାଇଁ ଆହ୍ବାନ କରିଥିଲେ ।
ଟେଣ୍ଡର ହେବାର ଦୀର୍ଘ ଦିନ ପରେ ମଧ୍ୟ ଟିକା ଉତ୍ପାଦନକାରୀ କମ୍ପାନୀ ସାମିଲ ହୋଇନଥିଲେ । ତେଣୁ ଜୁନ୍ 4 ତାରିଖ ପର୍ଯ୍ୟନ୍ତ ଗ୍ଲୋବାଲ ଟେଣ୍ଡର ସମୟସୀମା ବୃଦ୍ଧି କରିଥିଲେ ସରକାର । ଏହାପରେ ଟିକା କିଣିବା ନେଇ ରାଜ୍ୟ ସରକାରଙ୍କୁ ୨ଟି ଆବେଦନ ମିଳିଥିଲା । ତେବେ ଦେଶବାସୀଙ୍କୁ ମାଗଣା ଟିକା ଦେବାକୁ ପ୍ରଧାନମନ୍ତ୍ରୀ ଘୋଷଣା କରିଛନ୍ତି । ସେଥିପାଇଁ ଗ୍ଲୋବାଲ ଟେଣ୍ଡରର କୌଣସି ଆବଶ୍ୟକତା ନାହିଁ ବୋଲି ଏହାକୁ ବାତିଲ୍ କରାଯାଇଥିବା ସ୍ବାସ୍ଥ୍ୟ ବିଭାଗ ସୂଚନା ଦେଇଛି ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
