ଭୁବନେଶ୍ବର: ରାଜ୍ୟରେ ବହୁ ଜାଲ ହିତାଧିକାରୀ ସରକାରୀ ସୁବିଧା ସୁଯୋଗ ଉପଭୋଗ କରିଚାଲିଛନ୍ତି । ପ୍ରକୃତ ହିତାଧିକାରୀ ଅନେକଥିରୁ ବଞ୍ଚିତ ହେଉଛନ୍ତି । ସାଧାରଣ ବଣ୍ଟନ ବ୍ୟବସ୍ଥାରେ ରାଜ୍ୟରେ ଭୁତ ହିତାଧିକାରୀ ଖାଦ୍ୟଶସ୍ୟ ନେଉଛନ୍ତି । ପ୍ରାୟ 10 ଲକ୍ଷ ହିତାଧିକାରୀ ଚାଉଳ ଓ ଗହମ ଲୁଟିଛନ୍ତି । ଏବେ ଏହି ତଥ୍ୟ ସାମନାକୁ ଆସିବା ପରେ ସରକାରଙ୍କ ନିଦ ହଜି ଯାଇଛି । ରାସନ କାର୍ଡ ସହିତ ଆଧାର ସଂଯୋଗ କରିବା ପରେ ଏହି ତଥ୍ୟ ପଦାକୁ ଆସିଛି । ଏବେ ନବୀନଙ୍କ ବିଭିନ୍ନ ଯୋଜନାକୁ ନେଇ ତାତ୍ସଲ୍ୟ କରିଛନ୍ତି ବିଜେପି ବିରୋଧୀ ଦଳ ଉପନେତା ବିଷ୍ଣୁ ଚରଣ ସେଠୀ ।
ସୂଚନା ଅନୁସାରେ ରାଜ୍ୟରେ ସାଧାରଣ ବଣ୍ଟନ ବ୍ୟବସ୍ଥାରେ ବ୍ୟାପକ ଜାଲ ହିତାଧିକାରୀ ଥିବା ତଥ୍ୟ ଆସିଛି । ପ୍ରାୟ 10 ଲକ୍ଷ ହିତାଧିକାରୀ ଚାଉଳ ଓ ଗହମ ଲୁଟିଛନ୍ତି । ଜାତୀୟ ଖାଦ୍ୟ ସୁରକ୍ଷା ଆଇନରେ ଏମାନେ ସାମିଲ ଥିଲେ । ଏମାନଙ୍କୁ ବାଦ୍ ଦେଇ ସେହି ସ୍ଥାନରେ ରାଜ୍ୟ ସରକାରଙ୍କ ନିଜସ୍ବ ଖାଦ୍ୟ ସୁରକ୍ଷା ଯୋଜନରୁ ହିତାଧିକାରୀଙ୍କୁ ସାମିଲ କରିବାକୁ ପ୍ରକ୍ରିୟା ଆରମ୍ଭ ହୋଇଛି । ଆଧାର ଲିଙ୍କ ପ୍ରକ୍ରିୟା ଆସନ୍ତା15 ଯାଏ ଥିବାରୁ ଆହୁରି ଜାଲ ହିତାଧିକାରୀ ବାହାରିବେ ବୋଲି ଅନୁମାନ କରାଯାଉଛି । ମୋଟ 3 କୋଟି26 ଲକ୍ଷ ହିତାଧିକାରୀଙ୍କ ମଧ୍ୟରୁ 3 କୋଟି 6 ଲକ୍ଷ ହିତାଧିକାରୀଙ୍କ ଆଧାର ସଂଯୋଗ ହୋଇଛି । ଆହୁରି ବାକି 20 ଲକ୍ଷ ହିତାଧିକାରୀଙ୍କ ସଂଯୋଗ ଚାଲିଛି।
ରାଜ୍ୟ ସରକାର ନିଜସ୍ବ ଖାଦ୍ୟ ନିରାପତ୍ତା ଯୋଜନାରେ ପ୍ରାୟ 25 ଲକ୍ଷ ହିତାଧିକାରୀଙ୍କୁ ଖାଦ୍ୟ ଶସ୍ୟ ଯୋଗାଇ ଦେଉଛନ୍ତି । ଏହି ଅର୍ଥ ସରକାର ଭରଣା କରୁଛନ୍ତି । ଏଥିରୁ ହିତାଧିକାରୀଙ୍କୁ ଜାତୀୟ ଖାଦ୍ୟ ସୁରକ୍ଷା ଯୋଜନାରେ ସାମିଲ କରିବା ପରେ ରାଜ୍ୟ ସରକାରଙ୍କ ଉପରୁ ଆର୍ଥିକ ବୋଝ କମିବ । ଏପରିକି ରାଜ୍ୟ ସରକାର ଆଉ ନିଜସ୍ବ ଯୋଜନା ଚଳାଇବା ପାଇଁ ଆର୍ଥିକ ବୋଝ ସମ୍ଭାଳିବା ଅବସ୍ଥାରେ ନାହାଁନ୍ତି । ତେଣୁ ନିଜସ୍ବ ଯୋଜନାର ସବୁ ହିତାଧିକାରୀଙ୍କୁ ଜାତୀୟ ଯୋଜନା ସହିତ ମିଶ୍ରଣ କରିବାକୁ ବିଚାର କରୁଛନ୍ତି । ଏବେ ଜାତୀୟ ଖାଦ୍ୟ ସୁରକ୍ଷା ଯୋଜନା ସହ ମିଶିବ ରାଜ୍ୟ ଖାଦ୍ୟ ଯୋଜନା । ଯାହାକୁ ସମାଲୋଚନା କରିଛନ୍ତି ବିରୋଧୀ ।
ବିରୋଧୀ ଦଳ ଉପ ନେତା ବିଷ୍ଣୁ ଚରଣ ସେଠୀ ଆୟୁଷ୍ମାନ ଯୋଜନା ଠାରୁ ଆରମ୍ଭ କରି ସୌଭାଗ୍ୟ ଯୋଜନା ସବୁଥିରେ ସରକାରଙ୍କୁ ଟାର୍ଗେଟ କରି କଟାକ୍ଷ କରିଛନ୍ତି । ରାଜ୍ୟ ସରକାର ସବୁବେଳେ ଧପାବାଜି କରି ଭୂଆଁ ବୁଲେଇବା ପାଇଁ ଚେଷ୍ଟା କରୁଥିବା କଥା କହିଛନ୍ତି । ମୋଦି ଅଛନ୍ତି ବୋଲି ସରକାର ଅଛି ଓ ଋଣରେ ସରକାର ଚାଲିଛି ବୋଲି ସେ କହିଛନ୍ତି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
