ଭୁବନେଶ୍ବର: କୃଷକଙ୍କ ପାଇଁ ସରକାର କାଳିଆ ଯୋଜନା (Kalia Yojana)କରିଛନ୍ତି ହେଲେ ଏହା କୃଷକଙ୍କ ସ୍ୱାର୍ଥରେ ପଦାଘାତ କରୁଛି । ଚାଷୀ ସମସ୍ୟାକୁ ଚଳିତ ବର୍ଷ କ୍ଷତିଗ୍ରସ୍ତ ହୋଇ ରାଜ୍ୟର ୭ଜଣ ଚାଷୀ ଆତ୍ମହତ୍ୟା କରିଛନ୍ତି ଓ ଏଥିପାଇଁ ରାଜ୍ୟ ସରକାରଙ୍କୁ ସାମ୍ବାଦିକ ସମ୍ମିଳନୀରେ ଦାୟୀ କରିଛନ୍ତି କଂଗ୍ରେସ ମୁଖପାତ୍ର ସୁଦର୍ଶନ ଦାସ ।
ସେ ଆହୁରି ମଧ୍ୟ କହିଛନ୍ତି ଯେ, ଜଳେଶ୍ବର ଅଞ୍ଚଳର ଲକ୍ଷ୍ମୀ ନାରାୟଣ ଜେନା ଗତ 16 ତାରିଖରେ ଚାଷରେ ଚକଡ଼ା ପୋକ ଲାଗିବାରୁ ଆତ୍ମହତ୍ୟା କରିଥିବା ବେଳେ ଗତ ୨୦ ତାରିଖରେ ନବରଙ୍ଗପୁରର ବିଭୁତି ଭୂଷଣ 2 ଲକ୍ଷ ଟଙ୍କା ଋଣ କରି କୋବି ଚାଷ ନଷ୍ଟ ହେବାରୁ ଆତ୍ମହତ୍ୟା କରିଥିଲେ । ତେବେ ଏହି ଦୁଇ ପରିବାରକୁ 20 ଲକ୍ଷ ଟଙ୍କା ସହାୟତା ଦିଆଯାଉ ବୋଲି କଂଗ୍ରେସ ଦାବି କରିବା ସହ ଅନ୍ୟ ମୃତ ଚାଷୀଙ୍କ ପରିବାରକୁ ମଧ୍ୟ ସହାୟତା ପାଇଁ ଦାବି କରିଛି ।
ଏଥିସହ ମଣ୍ଡି ଖୋଲିବା ଚାଷୀଙ୍କୁ ଟୋକନ ଦେବାକୁ ଦଳ ଦାବି କରିଛି । ଆସନ୍ତା ଖରିଫ ଋତୁ ପାଇଁ ଧାନ କ୍ୱିଣ୍ଟାଲ ପିଛା 2930 ଟଙ୍କାରେ ସରକାର କିଣନ୍ତୁ ବୋଲି କଂଗ୍ରେସ ଦାବି କରିଛି । ଅଦିନିଆ ବର୍ଷାରେ ବହୁ ଜିଲ୍ଲାରେ ଫସଲ ନଷ୍ଟ ହୋଇଛି । ହେଲେ ଏନେଇ କ୍ଷୟକ୍ଷତିର ଅନୁଧ୍ୟାନ କରାଯାଉନାହିଁ । ଏଥିପାଇଁ କ୍ଷତିଗ୍ରସ୍ତ ଚାଷୀଙ୍କୁ ଏକର ପିଛା 20 ହଜାର ଟଙ୍କା କ୍ଷତି ପୂରଣ ଦିଆଯାଉ । ଭାଗ ଚାଷୀ ଆଇନକୁ ବିଧାନସଭାରେ ଆଣି ସେମାନଙ୍କୁ ନ୍ୟାୟ ଦିଅନ୍ତୁ ବୋଲି କଂଗ୍ରେସ କହିଛି । ତେବେ ଚାଷୀଙ୍କ ସମସ୍ୟା ନେଇ ଡିସେମ୍ବର ୧ରେ କିଷାନ କଂଗ୍ରେସର ବୈଠକ ବସିବ । ଯଦି ସମସ୍ୟାରେ ସମାଧାନ ନହୁଏ ତେବେ ଆଗକୁ ବ୍ଲକରୁ ଜିଲ୍ଲା ସ୍ତର ପର୍ଯ୍ୟନ୍ତ ଆନ୍ଦୋଳନ ହେବ ବୋଲି ଦଳ ଚେତାବନୀ ଦେଇଛି ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
