ଭୁବନେଶ୍ବର: ପୁଣି ଚର୍ଚ୍ଚାରେ ଓଡିଶା କ୍ରୀଡା ଓ ଯୁବବ୍ୟାପାର ମନ୍ତ୍ରୀ ତୁଷାରକାନ୍ତି ବେହେରା । କିଛି ଦିନ ତଳେ ସଚିବାଳୟ କ୍ୟାଣ୍ଟିନରେ ଖାଇ ପ୍ରଶଂସା ସାଉଁଟିଥିଲେ ମନ୍ତ୍ରୀ । ଏବେ ରାଜଧାନୀରେ ନିସ୍ବାର୍ଥପର ଭାବେ ଚାକିରୀ ଆଶାୟୀ ଯୁବକଙ୍କୁ ତାଲିମ ଦେଉଥିବା ଗୋପୀନାଥ ସେଠୀଙ୍କୁ ଭେଟିଛନ୍ତି ମନ୍ତ୍ରୀ ।
2002 ମସିହାରୁ ରାଜଧାନୀ ଭୁବନେଶ୍ବରରେ ଏପରି ତାଲିମ ପ୍ରଦାନ କରିଆସୁଛନ୍ତି ଗୋପୀନାଥ । ପୁଲିସ, ସେନା ଏବଂ ଅଗ୍ନିଶମ ବିଭାଗରେ ଚାକିରି ପାଇଁ ତାଲିମ ପ୍ରଦାନ କରିଥାନ୍ତି ଗୋପୀନାଥ । ଚାକିରି ଆଶାୟୀ ଯୁବକମାନଙ୍କୁ ୫ ହଜାର ମିଟର ଦୌଡ଼, ୧୬ ଶହ ମିଟର ଦୌଡ଼, ଲଙ୍ଗଜମ୍ପ, ହାଇଜମ୍ପ, ଦଉଡ଼ିଚଢ଼ା, ବାଲିବସ୍ତା ବୋହିବା, ସାଇକେଲିଂ ଆଦି ବିଭିନ୍ନ ବ୍ୟାୟାମ ଓ ଶାରୀରିକ ଶକ୍ତି ଓ ସାମର୍ଥ୍ୟ ବୃଦ୍ଧି ନେଇ ବିନା ମୂଲ୍ୟରେ ତାଲିମ ପ୍ରଦାନ କରିଥାନ୍ତି ।
ସବୁଠୁ ଗୁରୁତ୍ବପୂର୍ଣ୍ଣ କଥା ହେଉଛି, ଗୋପୀନାଥ ନିକଟରୁ ତାଲିମ ଗ୍ରହଣ କରି ପ୍ରାୟ ୩୫୦୦ ଯୁବକ ଚାକିରୀ ପାଇସାରିଛନ୍ତି । ସିଆରପିଏଫ୍, ସୀମା ସୁରକ୍ଷା ବଳ, ହୋମଗାର୍ଡ, କମିଶନରେଟ ପୁଲିସ୍, ଜିଲ୍ଲା ପୁଲିସ୍, ଅଗ୍ନିଶମ ଏବଂ ଅବକାରୀ ବିଭାଗରେ ଇନସପେକ୍ଟର, ସବ୍-ଇନିସ୍ପେକ୍ଟର, କନ୍ଷ୍ଟେବଳ ସହ ରେଳବାଇ ଗ୍ରୁପ୍-ଡି ଆଦିରେ ନିଯୁକ୍ତି ପାଇଛନ୍ତି ।
ଗୋପୀନାଥଙ୍କ ମହତ କାମ ବିଷୟରେ ଖବର ପାଇବା ପରେ ମନ୍ତ୍ରୀ ତୁଷାରକାନ୍ତି ତାଙ୍କୁ ଭେଟିବା ସହ ତାଙ୍କର ପ୍ରଶଂସା କରିଛନ୍ତି । ଏଥିସହିତ ଓଡିଶାର ଯୁବକ ଯୁବତୀ ମାନଙ୍କୁ ଦକ୍ଷ କରାଇବା ନେଇ ଆଲୋଚନା ମଧ୍ୟ କରିଥିଲେ । ଗୋପୀନାଥଙ୍କ ଏହି ମହାନ କାର୍ଯ୍ୟ ପାଇଁ ପୂର୍ବରୁ ବିଭିନ୍ନ ଅନୁଷ୍ଠାନ ପକ୍ଷରୁ ତାଙ୍କୁ ସମ୍ମାନିତ କରାଯାଇଛି ।
ପିଲାଙ୍କ ତାଲିମ ପ୍ରଦାନ ପାଇଁ ପଡ଼ିଆର ଅଭାବ ରହିଥିବା କଥା ଗୋପୀନାଥ ମନ୍ତ୍ରୀଙ୍କୁ ଜଣାଇଥିଲେ । ଏ ନେଇ ତୁରନ୍ତ ଆବଶ୍ୟକୀୟ ପଦକ୍ଷେପ ଗ୍ରହଣ କରାଯିବ ବୋଲି ମନ୍ତ୍ରୀ ପ୍ରତିଶ୍ରୁତି ଦେଇଛନ୍ତି । ଏହି ସାକ୍ଷାତ ସମୟରେ ବଡ଼ଚଣା ବିଧାୟକ ଅମର ପ୍ରସାଦ ଶତପଥୀ ମଧ୍ୟ ଉପସ୍ଥିତ ଥିଲେ ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
