ଭୁବନେଶ୍ବର: କୋରୋନା ମହାମାରୀ ସମୟରେ ଔଷଧ ଦୋକାନୀମାନେ ମଧ୍ୟ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିଛନ୍ତି । ଏଥିଲାଗି ରାଜଧାନୀରେ ସେମାନଙ୍କ ଟୀକାକରଣ ଉପରେ ଗୁରୁତ୍ବ ଦିଆଯାଇଛି । ତେବେ ଏମାନଙ୍କ ଟୀକାକରଣ ଲାଗି ବଡଗଡ କଲ୍ୟାଣ ମଣ୍ଡପରେ ସ୍ବତନ୍ତ୍ର ଟୀକାକରଣ ବ୍ୟବସ୍ଥା କରାଯାଇଥିବା ଜଣାପଡିଛି ।
ମହାମାରୀ ସମୟରେ ଆଗଧାଡିର କର୍ମଚାରୀଙ୍କ ଭଳି ଏମାନେ ଲୋକମାନଙ୍କୁ ସେବା ଯୋଗାଇ ଆସିଛନ୍ତି । କୋଭିଡ ସମୟରେ ସମସ୍ତେ ଲକଡାଉନ ଓ ସଟଡାଉନକୁ ଯୋଗୁଁ ଘରେ ଥିବା ବେଳେ ଏମାନେ ଅନବରତ ସେବା ଯୋଗାଇ ଆସୁଥିଲେ । ତେଣୁ ଏମାନଙ୍କ ଉପରେ ବିଏମସି ଗୁରୁତ୍ବାରୋପ କରି ସ୍ବତନ୍ତ୍ର ଟୀକାକରଣ କରିବା ପାଇଁ ସ୍ଥିର କରିଛି । ଆଜି(ମଙ୍ଗଳବାର)ଠାରୁ ବଡଗଡ କଲ୍ୟାଣ ମଣ୍ଡପରେ ଔଷଧ ଦୋକାନୀଙ୍କୁ ଟିକା ଦିଆଯାଇଛି ।
ରାଜଧାନୀରେ 2500 ଔଷଧ ଦୋକାନୀ ରହିଛନ୍ତି । ଏମାନେ ଟୀକାକରଣ ଲାଗି ପୂର୍ବରୁ ବିଏମସିକୁ ଅନୁରୋଧ କରିଆସୁଥିଲେ । ତେବେ ବିଏମସି କମିଶନର ଔଷଧ ବ୍ୟବସାୟୀ ସଂଘ ସହିତ ଆଲୋଚନା କରିବା ପରେ ଟୀକାକରଣର ତାରିଖ ଧାର୍ଯ୍ୟ କରିଥିଲେ । ପ୍ରତିଦିନ 500 ବ୍ୟବସାୟୀଙ୍କୁ ଟିକା ଦେବା ପାଇଁ ଲକ୍ଷ୍ୟ ରଖାଯାଇଛି ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
