ଭୁବନେଶ୍ବର: ଆଜି(ଗୁରୁବାର) ପବିତ୍ର ଶିଶୁ ଦିବସ। ଶିଶୁଙ୍କ ପାଇଁ ଏହି ଦିନଟି ବେଶ ମହତ୍ବ ରଖୁଥାଏ । ଏହି ଅବସରରେ ଭୁବନେଶ୍ବରର ଅବହେଳିତ ତଥା ବସ୍ତିରେ ରହୁଥିବା ଶିଶୁମାନେ 'ଆଶାଏଁ ଅନୁଷ୍ଠାନ' ସହାୟତାରେ ଗୁରୁବାର ରାଜ୍ୟପାଳଙ୍କ ସହିତ ସାକ୍ଷାତ କରିଥିଲେ ।
ଏହି ଅବସରରେ ରାଜ୍ୟପାଳ ପିଲାଙ୍କ ସହ ମିଶିବା ସହ ତାଙ୍କ ସହ କଥା ହୋଇଥିଲେ । ଏହାସହ ତାଙ୍କୁ ପେନ୍ ଓ ଚକୋଲେଟ୍ ଖାଇବାକୁ ଦେଇଥିଲେ । ଏଠାରେ ସୂଚନାଯୋଗ୍ୟ, ବସ୍ତି, ରାସ୍ତାକଡ଼, ରେଳ ଷ୍ଟେସନ ଆଦିରେ ଅବହେଳିତ ଭାବେ ବୁଲୁଥିବା ଶିଶୁଙ୍କୁ ଉଦ୍ଧାର କରି ସେମାନଙ୍କୁ ଶିକ୍ଷା ପ୍ରଦାନ କରିବା ସହ ସମାଜର ମୁଖ୍ୟସ୍ରୋତରେ ଜଡିତ କରିବା କାର୍ଯ୍ୟ କରୁଛି 'ଆଶାଏଁ ଅନୁଷ୍ଠାନ'।
ଏହି ଅନୁଷ୍ଠାନ ଏ ପର୍ଯ୍ୟନ୍ତ ଭୁବନେଶ୍ବର ସହରର ବିଭିନ୍ନ ସ୍ଥାନରେ ଭିକ୍ଷା ବୃତ୍ତି କରୁଥିବା ଓ ନିଶା ସେବନ କରୁଥିବା 160 ଜଣ ପିଲାଙ୍କୁ ଉଦ୍ଧାର କରି ସମାଜର ମୁଖ୍ୟ ସ୍ରୋତରେ ସାମିଲ କରିବାର ପ୍ରୟାସ ଜାରି ରଖିଛି। ତେବେ ଏଥିପାଇଁ କୌଣସି ସରକାରୀ ସହାୟତା ନନେଇ ଏହି ପ୍ରୟାସ ଜାରି ରଖିଥିବା ଅନୁଷ୍ଠାନର ସଦସ୍ୟ ସଂଗ୍ରାମ ରାଉତରାୟ କହିଛନ୍ତି।
ଏହାସହ ଏଠାରେ ଆହୁରି ଅନେକ ଏପରି ପିଲା ରହିଛନ୍ତି, ଯାହାକୁ ସମାଜର ମୁଖ୍ୟ ସ୍ରୋତରେ ସାମିଲ କରିବା ପାଇଁ ସରକାରଙ୍କ ସହଯୋଗର ଆବଶ୍ୟକତା ଥିବା ସେ ରାଜ୍ୟପାଳଙ୍କୁ ଅବଗତ କରାଇଛନ୍ତି। ରାଜ୍ୟପାଳ ଏନେଇ ଆଲୋଚନା ପରେ ତାଙ୍କୁ ଅବଗତ କରାଇବେ ବୋଲି ସେ କହିଛନ୍ତି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
