ଭୁବନେଶ୍ବର: ସନ୍ଧ୍ୟା 6ଟା ସ୍ଲଟ ଆସିଲା, ହେଲେ ବହୁ ସମୟ ଧରି ଅପେକ୍ଷା କରି ରହିଥିଲେ ମଧ୍ୟ ବୁକିଂ ହେଲାନି । ରାଜଧାନୀ ଭୁବନଶ୍ବରରୁ ସାମ୍ନାକୁ ଆସିଛି ଏହି ଅବ୍ୟବସ୍ଥାର ଚିତ୍ର । କୋରୋନା ଚେନ ବ୍ରେକ କରିବାକୁ ରାଜ୍ୟବ୍ୟାପୀ ଟୀକାକରଣକୁ ବ୍ୟାପକ କରାଯାଇଛି । ସମାନ ଢଙ୍ଗରେ ଭୁବନେଶ୍ବରରେ ଟୀକାକରଣ ପାଇଁ ବିଏମସି ପକ୍ଷରୁ ପ୍ରଚେଷ୍ଟା ଜାରି ରହିଛି । ହେଲେ ଟୀକାକାରଣ ପାଇଁ ସ୍ଲଟ ବୁକିଂ, ଟୀକାକରଣରେ ହେଉଥିବା ଅବ୍ୟବସ୍ଥାକୁ ପଦାରେ ପକାଇଛି ।
କୋରୋନା ଦ୍ବିତୀୟ ଲହରର ଘଡିସନ୍ଧି ମୂହୁର୍ତ୍ତରେ ଲକ୍ଷ ଲକ୍ଷ ଲୋକ ଟିକା ନେବା ପାଇଁ ଅପେକ୍ଷାରେ ଥିବାବେଳେ ବିଏମସି ପକ୍ଷରୁ ପ୍ରାୟ 60 ରୁ 70 ହଜାର ଲୋକଙ୍କ ପାଇଁ ସ୍ଲଟ ବୁକିଂ ବ୍ୟବସ୍ଥା କରାଯାଇଥିଲା । ହେଲେ ବିଡମ୍ବନାର ବିଷୟ ହେଉଛି, ଲୋକମାନେ ଘଣ୍ଟା ଘଣ୍ଟା ଧରି କୋୱିନ ଆପ୍ ପୋର୍ଟାଲରେ ବୁକିଂ ପାଇଁ ଅପେକ୍ଷା କରି ଶେଷରେ ନିରାଶ ହେଉଛନ୍ତି । ଯାହାକୁ ନେଇ ରାଜଧାନୀବାସୀଙ୍କ ମଧ୍ୟରେ କ୍ଷୋଭ ପ୍ରକାଶ ପାଇଛି ।
ସୂଚନାଥାଉ କି, ବୁଧବାର ସନ୍ଧ୍ୟାରେ ବିଏମସି ପକ୍ଷରୁ 18 ରୁ 44 ବର୍ଷ ବୟସ୍କ ଏବଂ 45 ବର୍ଷରୁ ଉର୍ଦ୍ଧ୍ବ ବୟସ୍କଙ୍କ ଟୀକାକରଣ ପାଇଁ କୋୱିନ ଆପରେ ପଞ୍ଜିକରଣ ଓ ସ୍ଲଟ ବୁକିଂ ନେଇ ଟ୍ବିଟ କରାଯାଇଥିଲା । ହେଲେ ଦୀର୍ଘ ସମୟ ଅପେକ୍ଷା କରି ମଧ୍ୟ ଲୋକମାନେ ନିରାଶ ହୋଇଥିଲେ ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
