ଭୁବନେଶ୍ବର: ଅନ୍ତିମ ପର୍ଯ୍ୟାୟରେ ମା’ ଜଗତଜନନୀଙ୍କ ପୂଜା । ଧରାପୃଷ୍ଠରୁ ବିଦାୟ ନେବେ ମା’ । ତେବେ ମଙ୍ଗଳବାର ମା’ଙ୍କ ବିଜୟା ଦଶମୀ ପୂଜା ଖୁବ ହର୍ଷ ଉଲ୍ଲାସରେ ପାଳିତ ହୋଇଛି । ସନ୍ଧ୍ୟା ଆଳତି ପରେ ପୁଷ୍ପାଞ୍ଜଳି ଆଉ ତା ପରେ ମା’ଙ୍କ ବିସର୍ଜନ। ତେବେ ଏ ସବୁ ଭିତରେ ବଙ୍ଗାଳୀ ସମ୍ପ୍ରଦାୟଙ୍କ ମଧ୍ୟରେ ମା’ଙ୍କ ପାଇଁ ରହିଛି କିଛି ଖାସ ପୂଜାବିଧି । ସିନ୍ଦୁର ଖେଳ ସହ ଧୁନୁଚି ନାଚରେ ମା’ଙ୍କୁ ବିଦାୟ ଦେଉଛନ୍ତି ଏମାନେ।
ଭୁବନେଶ୍ବର ରେଳ ଷ୍ଟେସନ ପାଖ ବଙ୍ଗାଳୀ ସାହି ପୂଜାମଣ୍ଡପରେ ବଙ୍ଗାଳୀ ମହିଳା ମାନେ ସିନ୍ଦୁର ଖେଳ ସହ ଧୁନୁଚି ନାଚରେ ବେଶ ମସଗୁଲ ହୋଇଥିଲେ। ଝିଅ ଯେପରି ନିଜ ବାପ ଘରୁ ଶାଶୁ ଘରକୁ ଫେରେ ଠିକ ସେହିପରି ମା’ ମଧ୍ୟ ଦଶମୀ ଦିନ ପରେ ନିଜ ଶାଶୁ ଘରରକୁ ଫେରନ୍ତି ବୋଲି ବିଶ୍ବାସ ରହିଛି । ତେଣୁ ମା’ଙ୍କୁ ସିନ୍ଦୁର, ସହ ପାନ ଗୁଆ, ମିଠା ଆଦି ଦେଇ ବିଦାୟ ଦେଉଛନ୍ତି ଏମାନେ । ଅନ୍ୟପଟେ ଢାକି ବାଦ୍ୟର ତାଳେ ତାଳେ ମା’ଙ୍କ ସମ୍ମୁଖରେ ଧୁନୁଚି ନାଚ ପରିବେଷଣ କରୁଛନ୍ତି । ଖାଲିଯେ ବଙ୍ଗାଳୀ ତାହା ନୁହେଁ ଭୁବନେଶ୍ବର ଅନେକ ଅଲଗା ସମ୍ପ୍ରଦାୟର ଲୋକ ମଧ୍ୟ ଏଠି ଉପସ୍ଥିତ ରହିଥିଲେ।
ଭାରତ ବର୍ଷରେ ଭିନ୍ନ ଭିନ୍ନ ଅଞ୍ଚଳରେ ଭିନ୍ନ ଭିନ୍ନ ରୀତିନୀତିରେ ମା’ ଦୁର୍ଗାଙ୍କୁ ଆରାଧନା କରାଯାଏ କିନ୍ତୁ ମା’ଙ୍କ ବିଦାୟ ସମୟରେ ସଭିଏଁ ଭାବ ବିହ୍ବଳ ହୋଇଉଠନ୍ତି ।
ଭୁବନେଶ୍ବରରୁ ଶତରୂପା ସାମନ୍ତରାୟ, ଇଟିଭି ଭାରତ
