ଭୁବନେଶ୍ବର: ସଟଡାଉନ ନିୟମକୁ ଅବମାନନା କରି ବନ୍ଧୁମିଳନ କଲେ ସୁର ଭାଇ । ଜଟଣୀ ବିଧାୟକ ସୁରେଶ ରାଉତରାୟ ଜନସେବା ଲାଗି ଯେତିକି ଚର୍ଚ୍ଚିତ, ବେଲଗାମ ତୁଣ୍ଡ ଓ ଅମାନିଆ ଆଚରଣ ପାଇଁ ସେତିକି ବିବାଦୀୟ । ଏବେ ପୁଣି ବିବାଦ ଘେରକୁ ଆସିଛନ୍ତି ସୁର ଭାଇ । କୋଭିଡ୍ କଟକଣାକୁ ଭୁଲି ସଟ୍ଡାଉନରେ ସାମାଜିକ ଦୂରତାକୁ ଭୁଲି ବନ୍ଧୁମିଳନ ଆୟୋଜନ କରିଛନ୍ତି ସୁରେଶ ରାଉତରାୟ ।
ଏହି ଅବସରରେ ଏକ ସାମ୍ବାଦିକ ସମ୍ମିଳନୀ କରିଛନ୍ତି ସୁରେଶ ରାଉତରାୟ । ତାହା ସହିତ ଶତାଧିକ ଲୋକଙ୍କୁ ନେଇ ବନ୍ଧୁମିଳନ ଆୟୋଜନ କରିଛନ୍ତି । ଭୁବନେଶ୍ୱର ଉପକଣ୍ଠ ଦାରୁଠେଙ୍ଗ ଅଞ୍ଚଳରେ କଟକଣା ସମୟରେ ବନ୍ଧୁମିଳନ ସହ ସେ ପ୍ରେସମିଟ୍ କରିଛନ୍ତି ।
ନନ୍ଦନକାନନର ଅବ୍ୟବସ୍ଥା ପ୍ରସଙ୍ଗ ନେଇ ପ୍ରେସମିଟ୍ କରାଯାଇଥିଲା । ପ୍ରସଙ୍ଗ ଠିକ କିନ୍ତୁ ସୁରଙ୍କ ତରିକା ଥିଲା ସମ୍ପୂର୍ଣ୍ଣ ଭୁଲ । ଏନେଇ ଅଭିଯୋଗ ମିଳିବା ପରେ ଉକ୍ତ ଅଞ୍ଚଳରେ ଅତିରିକ୍ତ ତହସିଲଦାର ଓ ପୋଲିସ ଚଢ଼ାଉ କରିଛି ।
ସବୁବେଳେ ଖବରର ଚର୍ଚ୍ଚା ରହିଥାନ୍ତି କଂଗ୍ରେସ ବିଧାୟକ ସୁର ରାଉତରାୟ । କେତେବେଳେ ବିବାଦୀୟ ମନ୍ତବ୍ୟ ତ ଆଉ କେବେ ନିୟମ ଉଲ୍ଲଂଘନ । କୋରୋନା ସମୟରେ ମାସ୍କ ସୁରକ୍ଷା କବଚ ସାଜିଥିବାବେଳେ ସୁରେଶ ରାଉତରାୟ ପ୍ରଥମେ ମାସ୍କ ପିନ୍ଧୁନଥିଲେ । କୋରୋନାର ଭୟାବହ ରୂପ ଦେଖିବା ପରେ ମାସ୍କ ପିନ୍ଧିଥିଲେ ଏହି ବରିଷ୍ଠ ନେତା ।
ବିଧାୟକଙ୍କ କାନ୍ଧରେ ଜନତାଙ୍କ ଦାୟିତ୍ୱ ଥିବାବେଳେ ସୁର ଅମାନିଆ ହୋଇପଡ଼ିଛନ୍ତି । ସଟ୍ଡାଉନ ଓ କୋଭିଡ୍ ନିୟମର ଉଲ୍ଲଂଘନ କରିଥିବାରୁ ଭୁବନେଶ୍ୱର ଅତିରିକ୍ତ ତହସିଲଦାର ଶର୍ମିଷ୍ଠା ଦାସ ଓ ଚନ୍ଦକା ପୋଲିସ ଚଢ଼ାଉ କରିଥିଲା । ନିୟମ ମାନିନଥିବାରୁ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ଅତିରିକ୍ତ ତହସିଲଦାର ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
