ଭୁବନେଶ୍ବର: ସ୍ଥଳଭାଗ ଆଡ଼କୁ ମାଡ଼ି ଆସୁଛି ବାତ୍ୟା 'ଗୁଲାବ' । ଏହାର ପ୍ରଭାବରେ ରାଜ୍ୟରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । ଫଳରେ ଆସନ୍ତାକାଲି(ସୋମବାର) ରାଜ୍ୟର ୧୧ ଜିଲ୍ଲାରେ ସ୍କୁଲ ଓ ଶିକ୍ଷାନୁଷ୍ଠାନ ବନ୍ଦ ରହିବ ବୋଲି ସୂଚନା ଦେଇଛନ୍ତି ସ୍ବତନ୍ତ୍ର ରିଲିଫ କମିଶନର ପ୍ରଦୀପ କୁମାର ଜେନା ।
ସନ୍ଧ୍ୟାରୁ ମଧ୍ୟରାତ୍ର ମଧ୍ୟରେ ଶ୍ରୀକାକୁଲମ ଜିଲ୍ଲାରେ ସ୍ଥଳଭାଗ ଛୁଇଁବ। ସ୍ଥଳଭାଗ ଛୁଇଁବା ସମୟରେ ଘଣ୍ଟାପ୍ରତି ୭୫-୮୫ କିଲୋମିଟର ବେଗରେ ପବନ ରହିବ। ସର୍ବାଧିକ ପବନର ବେଗ ୯୫ କିଲୋମିଟର ରହିବ । ଗଜପତି, ଗଞ୍ଜାମ, କୋରାପୁଟ, ରାୟଗଡା, ମାଲକାନଗିରିରେ ପ୍ରଭାବ ଅଧିକ ରହିବ। ପ୍ରବଳରୁ ଅତି ପ୍ରବଳ ବର୍ଷା ହେବ। ପବନ ଯୋଗୁଁ ପୁରୁଣା ଗଛ ଉପୁଡିପାରେ, ବିଦ୍ୟୁତ ଏଲଟି ଲାଇନ କ୍ଷତି ହୋଇପାରେ। ଭୂସ୍ଖଳନ ମଧ୍ୟ ହୋଇପାରେ । ଫ୍ଲାସ ଫ୍ଲଡ଼ ସହ ବନ୍ୟା ସମ୍ଭାବନା ରହିଛି। ଋଷିକୂଲ୍ୟା, ବଂଶଧାରା ଓ ନାଗବଳୀ ବେସିନରେ ବନ୍ୟା ପାଣି ଆସିପାରେ।
ଭୁସ୍ଖଳନ ପାଇଁ ଗଜପତି, କନ୍ଧମାଳ, ରାୟଗଡାରେ ସତର୍କ କରାଯାଇଛି । ଆନ୍ଧ୍ରର ଗୋଟା ବ୍ୟାରେଜ ଲେବୁଲ ତଳକୁ ପାଣି ରଖାଯାଇଛି। ବନ୍ଧବାଡ଼ ଉପରେ ନଜର ରଖାଯାଇଛି । ODRAF ଓ NDRF ସେମାନଙ୍କ ସ୍ଥାନରେ ପହଞ୍ଚି ସାରିଛନ୍ତି । ବର୍ତ୍ତମାନ ସୁଦ୍ଧା ସବୁ ବୋଟ ଫେରି ଆସିଛି । ଆଜି ମୁଖ୍ୟମନ୍ତ୍ରୀ ୧୧ ଜିଲ୍ଲାର ଜିଲ୍ଲାପାଳପାଳଙ୍କ ସହ ସମୀକ୍ଷା କରିଛନ୍ତି। ଗଞ୍ଜାମ, ଗଜପତି, ରାୟଗଡା, କୋରାପୁଟ, ମାଲକାନଗିରି, ନବରଙ୍ଗପୁର, କନ୍ଧମାଳ, ଖୋର୍ଦ୍ଧା, ପୁରୀ, ନୟାଗଡ଼ ଓ କଳାହାଣ୍ଡି ଜିଲ୍ଲାପାଳଙ୍କ ସହ ଆଲୋଚନା କରିଛନ୍ତି । ୧୧ ଜିଲ୍ଲାରେ ଆସନ୍ତାକାଲି ସ୍କୁଲ ଓ ଶିକ୍ଷାନୁଷ୍ଠାନ ବନ୍ଦ ରହିବ।
ସକାଳ ୮ ଟା ସୁଦ୍ଧା ୫ହଜାର ଲୋକଙ୍କୁ ସ୍ଥାନାନ୍ତର କରାଯାଇଛି । ୪ଟା ସୁଦ୍ଧା ସ୍ଥାନାନ୍ତରଣ ପ୍ରକ୍ରିୟା ସାରିବାକୁ କୁହାଯାଇଛି। ତଳିଆ ଅଞ୍ଚଳ, ଭୂସ୍ଖଳନ ସମ୍ଭାବନା ଥିବା ଅଞ୍ଚଳ ଉପରେ ଗୁରୁତ୍ବ ଦିଆଯାଇଛି । କୋଭିଡ ସ୍ଥିତି ଥିବାରୁ ସ୍ଥାନାନ୍ତର କରି ଅଧିକ ଲୋକଙ୍କୁ ନ ରଖିବାକୁ କୁହାଯାଇଛି । ସମସ୍ତଙ୍କୁ ମାସ୍କ ଦିଆଯିବା ସହ ବାତ୍ୟା ଆଶ୍ରୟ ସ୍ଥଳରୁ ଫେରିବା ପରେ ତାଙ୍କ ଉପରେ ନଜର ରଖାଯିବ । ମଙ୍ଗଳବାର ସ୍ଥିତି ଦେଖି ଜିଲ୍ଲାପାଳ ନିଷ୍ପତ୍ତି ନେବେ। ଆଜି ସନ୍ଧ୍ୟାରୁ ଆସନ୍ତାକାଲି ସକାଳ ପର୍ଯ୍ୟନ୍ତ ସତର୍କ ରହିବାକୁ ପରାମର୍ଶ ରହିଥିବାବେଳେ ପୁରୀ, ଖୋର୍ଦ୍ଧା, ନୟାଗଡ଼ରେ ୫୦ରୁ ୬୦ କିଲୋମିଟର ବେଗରେ ପବନ ବହିପାରେ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
