ଭୁବନେଶ୍ବର: ରାଜଧାନୀ ଭୁବନେଶ୍ଵରସ୍ଥିତ ନୟାପଲ୍ଲୀ ଆଇ.ଆର.ସି ଭିଲେଜ ବିଦ୍ୟାଳୟରେ ଜଣେ ଶିକ୍ଷକ କୋରୋନା ପଜିଟିଭ୍ ଚିହ୍ନଟ ହୋଇଥିଲେ । ଏହାପରେ ବିଦ୍ୟାଳୟକୁ ଶନିବାର ଓ ରବିବାର ଦୁଇ ଦିନ ବନ୍ଦ ରଖାଯିବା ପରେ ବିଦ୍ୟାଳୟକୁ ବିଶୋଧନ କରାଯାଇ ସୋମବାରଠାରୁ ସ୍କୁଲକୁ ଖୋଲାଯାଇଛି ।
ପଜିଟିଭ ଚିହ୍ନଟ ହୋଇଥିବା ଶିକ୍ଷକ ପିଲାଙ୍କୁ ପାଠ ପଢ଼ାଇବା ସମୟରେ ଛାତ୍ରଛାତ୍ରୀଙ୍କ ସଂସ୍ପର୍ଶରେ ଆସିଥିଲେ । ଏଣୁ ପ୍ରଧାନ ଶିକ୍ଷକ ଓ ଡ଼ିଇଓମାନେ ଛାତ୍ରଛାତ୍ରୀ ଓ ଅନ୍ୟ କର୍ମଚାରୀଙ୍କ ଉପରେ ନଜର ରଖିଛନ୍ତି । ଯଦି କାହାର କୌଣସି ଲକ୍ଷଣ ଦେଖାଦିଏ ତେବେ ସେମାନଙ୍କର କୋରୋନା ଟେଷ୍ଟ କରାଯିବ ବୋଲି ବିଏମସି କମିଶନର ପ୍ରେମଚନ୍ଦ୍ର ଚୌଧୁରୀ କହିଛନ୍ତି । ତେବେ ବର୍ତ୍ତମାନ ପରିସ୍ଥିତି ଉପରେ ବିଏମସି ପକ୍ଷରୁ କଡ଼ା ନଜର ରଖାଯାଇଛି ବୋଲି ସେ କହିଛନ୍ତି ।
ସେପଟେ ସଂକ୍ରମଣକୁ ନେଇ କୈାଣସି ପ୍ରକାର ଭୟ ନ କରିବାକୁ ପ୍ରଧାନ ଶିକ୍ଷୟିତ୍ରୀ ସୁନନ୍ଦା ମେକାପ କହିଛନ୍ତି । ତେବେ ସରକାରଙ୍କ ଏସଓପି ମୁତାବକ ବିଦ୍ୟାଳୟରେ ପାଠପଢ଼ା ହେଉଛି । ସରକାରଙ୍କ ଯାହା ନିର୍ଦ୍ଦେଶ ଆସିବ ସେହି ଅନୁସାରେ ପଦକ୍ଷେପ ନିଆଯିବ ବୋଲି ମଧ୍ୟ ପ୍ରଧାନ ଶିକ୍ଷୟିତ୍ରୀ କହିଛନ୍ତି । ବିଦ୍ୟାଳୟରେ ପିଲାମାନେ ନିର୍ଭୟରେ ପାଠପଢୁଥିବା ଦେଖିବାକୁ ମିଳିଛି ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
