ଭୁବନେଶ୍ବର: ମନ୍ତ୍ରୀ ଜ୍ୟୋତିପ୍ରକାଶ ପାଣିଗ୍ରାହୀ ହାଇଦ୍ରାବାଦରେ ସରକାରୀ ଟଙ୍କାରେ ମହିଳା ବନ୍ଧୁ ମାନଙ୍କୁ ଆତିଥ୍ୟ ପ୍ରଦାନ କରିବା ଘଟଣାରେ ପୁଣି ଆଜି ପର୍ଯ୍ୟଟନ ମନ୍ତ୍ରୀ ଓ ରାଜ୍ୟ ସରକାରଙ୍କୁ ଟାର୍ଗେଟ କରିଛି କଂଗ୍ରେସ । ଗତକାଲି ମନ୍ତ୍ରୀ ବିକ୍ରମକେଶରୀ ଆରୁଖ ଦେଇଥିବା ସ୍ପଷ୍ଟୀକରଣରେ ମନ୍ତ୍ରୀଙ୍କ ଗସ୍ତରେ ଦିଆଯାଇଥିବା ଟଙ୍କା କିଏ କେଉଁ ଆକାଉଣ୍ଟରେ ଦେଇଛନ୍ତି ତାହାର ଉତ୍ତର କାହିଁକି ଦେଲେ ନାହିଁ ବୋଲି କଂଗ୍ରେସ ମୁଖପାତ୍ର ସତ୍ୟ ପ୍ରକାଶ ନାୟକ ପ୍ରଶ୍ନ କରିଛନ୍ତି ।
ମନ୍ତ୍ରୀ ସରକାରୀ ଗସ୍ତରେ ହୋଟେଲ ତାଜକ୍ରିଷ୍ଣା ପଞ୍ଚତାରକା ହୋଟେଲରେ ମହିଳାଙ୍କ ପାଇଁ ସରକାର କାହିଁକି ଖର୍ଚ୍ଚ କରିଛି ବୋଲି ପ୍ରଶ୍ନ ପଚାରିଛି କଂଗ୍ରେସ । ଏଥିପାଇଁ ମୁଖ୍ୟମନ୍ତ୍ରୀଙ୍କ ଅନୁମତି ନେଇଥିଲେ କି ମନ୍ତ୍ରୀ ଜ୍ୟୋତିପ୍ରକାଶ ପାଣିଗ୍ରାହୀ ?5‘ଟି’ ର କଥା କହୁଥିବା ମୁଖ୍ୟମନ୍ତ୍ରୀ ଏହି ଘଟଣାରେ ଟ୍ରାନ୍ସପେରନ୍ସି କେଉଁଠି ରହିଲା ତାହାର ଉତ୍ତର ରଖନ୍ତୁ । ମୁଖ୍ୟମନ୍ତ୍ରୀ ଅପବାଦ ହେବା ଭୟରେ ଆଗୁଆ ପଳାୟନ ପନ୍ଥୀ ହୋଇ ବିଧାନସଭା ବନ୍ଦ କରିଦେଲେ ବୋଲି କଂଗ୍ରେସ କହିଛି ।
ଏହାର ଜବାବରେ ବିଜେଡି ନେତ୍ରୀ ପ୍ରମିଳା ମଲ୍ଲିକ କହିଛନ୍ତି ଯେ, ନିୟମ ଓ ପ୍ରକ୍ରିୟା ଅନୁସାରେ ଗୃହକାର୍ଯ୍ୟ ବନ୍ଦ ହୋଇଛି। ଆଲୋଚନା ପାଇଁ କୌଣସି ବିଲ ନ ଥିଲା। ଅଗଣତାନ୍ତ୍ରିକ ନୁହେଁ ବରଂ ସମ୍ପୂର୍ଣ୍ଣ ଗଣତାନ୍ତ୍ରିକ ଉପାୟରେ ବିଧାନସଭା ବନ୍ଦ ହୋଇଛି। ମନ୍ତ୍ରୀ ପାଣିଗ୍ରାହୀ ପ୍ରସଙ୍ଗରେ କହିଛନ୍ତି ଯେ, କିଏ କାହା ବନ୍ଧୁବାନ୍ଧବଙ୍କୁ ସାଙ୍ଗରେ ନେଇ କି ଯାଇପାରିବେନି କି? ଏହା ସହ ମନ୍ତ୍ରୀଙ୍କ ଗସ୍ତରେ ସରକାରୀ ଅର୍ଥ ଖର୍ଚ୍ଚ ହୋଇନି ବୋଲି ସରକାର ସ୍ପଷ୍ଟ କରିସାରିଛନ୍ତି ବୋଲି କହିଛନ୍ତି ପ୍ରମିଳା ମଲ୍ଲିକ ।
ଭୁବନେଶ୍ବରରୁ ତପନ କୁମାର ଦାସ, ଇଟିଭି ଭାରତ
