ଭୁବନେଶ୍ବର: ସମୀର ମହାନ୍ତି ହେଲେ ବିଜେପି ରାଜ୍ୟ ସଭାପତି । ଏକମାତ୍ର ପ୍ରାର୍ଥୀ ହିସାବରେ ନାମାଙ୍କନ ପତ୍ର ଦାଖଲ କରିଥିବା ବେଳେ ନିର୍ଦ୍ବନ୍ଦରେ ସେ ନିର୍ବାଚିତ ହୋଇଛନ୍ତି । ସେପଟେ ସହମତିରେ ନିର୍ବାଚନ ହେବାକୁ ରାଜ୍ୟ ପ୍ରଭାରୀ ଅରୁଣ ସିଂ କହିଥିଲା ବେଳେ ସମୀରଙ୍କ ନାମରେ ସହମତି ପ୍ରକାଶ କରିଛି ରାଜ୍ୟ ବିଜେପି ।
ଅଖୀଳ ଭାରତୀୟ ବିଦ୍ୟାର୍ଥୀ ପରିଷଦରୁ ସେ ରାଜନୀତି ଆରମ୍ଭ କରିଥିଲେ । ପରେ ବିଜେପିରେ ଯୋଗଦାନ କରିବା ସହ 2009 ମସିହାରେ ଏକାମ୍ର ନିର୍ବାଚନ ମଣ୍ଡଳୀରୁ ଲଢି ପରାଜୟ ହୋଇଥିଲେ । ସେହିପରି ୨୦୧୬ ରୁ ରାଜ୍ୟ ବିଜେପିର ଉପସଭାପତି ଭାବରେ ରହି ଆସିଛନ୍ତି ସମୀର ମହାନ୍ତି ।
ଆଜି ରାଜ୍ୟ କାର୍ଯ୍ୟାଳୟରେ ଏନେଇ ଏକ ଉଚ୍ଚସ୍ତରୀୟ ବୈଠକ ବସିଥିଲା । ଯେଉଁଥିରେ ସମୀର ମହାନ୍ତିଙ୍କ ନାମରେ ମୋହର ମାରିଥିଲେ କେନ୍ଦ୍ରୀୟ ନେତା । ବୈଠକରେ ରାଜ୍ୟ ପ୍ରଭାରୀ ଅରୁଣ ସିଂଙ୍କ ଉପସ୍ଥିତ ରହିଥିଲେ । ସେହିପରି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ସାଂସଦ ଅପରାଜିତା ଷଡ଼ଙ୍ଗୀଙ୍କ ସମେତ ରାଜ୍ୟର ଅନେକ ବରିଷ୍ଠ ନେତୃତ୍ବ ଉପସ୍ଥିତ ରହିଥିଲେ ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
