ଭୁବନେଶ୍ବର: ଆଜି ବସିଥିଲା ରାଜ୍ୟ ବିଜେପିର କୋର କମିଟି ବୈଠକ । ବୈଠକ ପରେ ସାଂସଦ ସୁରେଶ ପୂଜାରୀ ପୁରା ବିସ୍ତୃତ ସୂଚନା ଦେଇଛନ୍ତି । ସାଂସଦ ସୁରେଶ ପୂଜାରୀ କହିଛନ୍ତି ଦଳକୁ ଆଗକୁ ବଢିବାକୁ ବିଭିନ୍ନ ନିର୍ଣ୍ଣୟ ନିଆଯାଇଛି । ମୋଦି ସରକାରଙ୍କ ଦ୍ବିତୀୟ ପାଳିର ତୃତୀୟ ବର୍ଷ ପୂର୍ତ୍ତି ଅବସରରେ କେନ୍ଦ୍ର ସମେତ ବିଭିନ୍ନ ରାଜ୍ୟ ଓ ଜିଲ୍ଲାୱାରୀ ଅଭିଯାନ ଆରମ୍ଭ କରାଯିବ । ବିଜେପି ସାଂସଦ ଥିବା ପ୍ରତ୍ୟେକ ସଂସଦୀୟ କ୍ଷେତ୍ରରେ 100ଟି ଦୁର୍ବଳ ବୁଥ ବୁଲି ସମୀକ୍ଷା କରିବାକୁ ଦାୟିତ୍ବ ଦିଆଯାଇଛି । ଓଡିଶାର ବିଭିନ୍ନ ପ୍ରସଙ୍ଗରେ ଆଲୋଚନା ହୋଇଛି । ଶ୍ରୀମନ୍ଦିର ପ୍ରସଙ୍ଗରେ ମଧ୍ୟ ଆଲୋଚନା ହୋଇଛି । ଦଳର କାର୍ଯ୍ୟ ଖସଡା ପ୍ରସ୍ତୁତ ହୋଇଛି ।
ଏହାବାଦ ବ୍ରଜରାଜନଗର ଉପନିର୍ବାଚନ ପାଇଁ ଉତ୍ତରଦାୟିତ୍ବ ମୋ ଉପରେ ଥିବା କହିଛନ୍ତି ସୁରେଶ । ଯେହେତୁ ବରଗଡ ସଂସଦୀୟ କ୍ଷେତ୍ର ଅଧିନରେ ବ୍ରଜରାଜ ନଗର ଆସୁଛି ତେଣୁ ସାଂସଦ ଭାବେ ମୋର ଗୁରୁ ଦାୟିତ୍ବ ରହିଛି ବୋଲି ସୁରେଶ କହିଛନ୍ତି । ଦଳର ବିଜୟ ପାଇଁ ପରିଶ୍ରମ କରିବୁ । ସମସ୍ତ ଉଦ୍ୟମ କରିବୁ ବୋଲି ସୁରେଶ କହିଛନ୍ତି । ସେହିପରି ବିଜେଡି ମନ୍ତ୍ରୀ ବିଧାୟକଙ୍କ ଭୋଟ ବ୍ୟବଧାନ ବିଜୟ ମନ୍ତବ୍ୟକୁ ସୁରେଶ କଡା ସମାଲୋଚନା କରିଛନ୍ତି । ଆମେ ଜ୍ୟୋତିଷ ନୋହୁଁ । ବିଜେଡିର ମେୟର, ବିଧାୟକ ଜ୍ୟୋତିଷ ହୋଇଛନ୍ତି ବୋଲି କହିଛନ୍ତି ।
ଭୁବନେଶ୍ବରରୁ ମନୋରଞ୍ଜନ ଶଙ୍ଖୁଆ, ଇଟିଭି ଭାରତ
