ଭୁବନେଶ୍ବର/ମାଲକାନଗିରି: ଜାନୁଆରୀ 8ରୁ 13ତାରିଖ ମାଲକାନଗିରିରେ ମାଓ ଅପରେସନ। ଘନ ଘନ ଗୁଳିର ତୁହାକୁ ତୁହା ବର୍ଷଣ । 5ଦିନ ଓ 4ରାତିର ମିଳିତ ଅପରେସନ। ଘାଟି ପରେ ଘାଟି ପାଦଚଲା ବାଟ ଦେଇ ଜଙ୍ଗଲ ଭିତରେ 300 କମାଣ୍ଡ ଜାରି ରଖିଥିଲେ ମାଓ କ୍ଲିନ ଅପରେସନ। ଲୋକଙ୍କ ଆସ୍ଥାଭାଜନ ହୋଇ ପୋଲିସ କଲା ମାଓ ଖୁଲାସା। ଠାବ ହେଲା ମାଓବାଦୀଙ୍କ ଗୁପ୍ତ କ୍ୟାମ୍ପ ବା ଡମ୍ପ ଏରିଆ। ଜବତ ହେଲା ଇନସାସ ମେସିନ ଗନ ଭଳି କାର୍ବାଇନ ଷ୍ଟେନଗନ, ଏସଏଲଆର ରାଇଫଲ, ଅପଟିକାଲ ସାଇଟ ଭଳି ଅତ୍ୟାଧୁନିକ ଅସ୍ତ୍ରଶସ୍ତ୍ର।
ପ୍ରଥମଥର ପାଇଁ ଓଡିଶାରେ ମାଓବାଦୀଙ୍କ ଜବତ ହେଲା ରେକର୍ଡ ସଂଖ୍ୟକ ମାଓସାମଗ୍ରୀ ଓ ଅସ୍ତ୍ରଶସ୍ତ୍ର। ଯାହା ଓଡିଶା ଇତିହାସର ଏକ ବଡ ଅଭିଯାନ ବୋଲି ପୋଲିସ ଡିଜି କହିଛନ୍ତି।
ତେବେ ଜୋଡାମ୍ବ ଓ ପେପରମେଟଲାକୁ ସଂଯୋଗୀକରଣ ଦେଇଥିଲା ସଫଳତା। ସଂଯୋଗ କରୁଥିବା 7କିମି ଘାଟିରେ 20 ଫୁଟିଆ ରାସ୍ତା ପୋଲିସ ଅପରେସନ ପାଇ ସହଜ ହେଲା। ଏପରିକି 70 ପ୍ରତିଶତ ଲୋକଙ୍କ ଆସ୍ଥାଭାଜନ ପାଇଁ ଗୋଟିଏ ପରେ ଗୋଟି ମାଓ କ୍ୟାମ୍ପର ସୁରାକ ମିଳିଥିଲା।
ମାଲକାନଗିରି ପୋଲିସ,ଏସଓଜି, ଡିଭିଏଫ କମାଣ୍ଡୋ ସହ ସିଆରପିଏଫ, ବିଏସଏଫ ସହ ଆନ୍ଧ୍ର ପୋଲିସର ମିଳିତ ଅପରେସନ ମାଓବାଦୀଙ୍କୁ ମହଙ୍ଗା ପଡିଥିଲା। ଯାହାକୁ ନେଇ ଛତ୍ରଭଙ୍ଗ ଦେଇଥିଲେ ମାଓବାଦୀ । ଗୋଟିଏ ପରେ ଗୋଟିଏ କ୍ୟାମ୍ପ ଛାଡି ପଳାୟନ କରିଥିଲେ। ତେବେ ଟିଫିନ ବୋମା ଭଳି ଅନେକ ମାଓସାମଗ୍ରୀ ଜବତ ହେବା ସେମାନଙ୍କ ଶକ୍ତିକୁ ହ୍ରାସ କରିବା ବୋଲି କୁହାଯାଉଛି ।
ତେବେ ଆନ୍ଧ୍ର-ଓଡିଶା ବର୍ଡର ଜୋନାଲ କମିଟି ମାଓବାଦୀଙ୍କ ଗତିବିଧି ଉପରେ ଅପରେସନ ଜାରି ରହିଥିବା ବେଳେ ସ୍ବାଭିମାନ ଅଞ୍ଚଳର ପ୍ରଥମ ପୋଲିସ ଷ୍ଟେସନ ପେପରମେଟଲା ପରେ ଜୋଡାମ୍ବରେ ହେବାକୁ ଯାଉଛି ଦ୍ବିତୀୟ ଥାନା।
ସେପଟେ ଅପରେସନ ସମୟରେ ଅନେକ ପରିମାଣର ଅସ୍ତ୍ରଶସ୍ତ୍ର ଜବତ ହୋଇଛି । ସେଗୁଡିକ ମଧ୍ୟରେ ରହିଛି ଇନସାସ ଲାଇଟ ମେସିନ ଗନ 1ଟି, ଇନସାସ ରାଇଫଲ 3ଟି, କାର୍ବାଇନ ଷ୍ଟେନଗନ 3ଟି, ଏସଏଲଆର ରାଇଫଲ 1ଟି, 303 ରାଇଫଲ 1ଟି, ପିସ୍ତଲ 1ଟି, 5.56 ଏମଏମ ଆମୁନିସନ 202 ରାଉଣ୍ଡ, 7.62 ଆମୁନିସେନ 59 ରାଉଣ୍ଡ, 9 ଏମଏମ 42 ରାଉଣ୍ଡ, ଏଲଏମଜି ମାଗାଜିନ 4ଟି, ଇନସାସ ମାଗାଜିନ 8ଟି, ଏସଏଲଆର ମାଗାଜିନ 2ଟି, କାର୍ବାଇନ ମାଗାଜିନ 6ଟି, 303 ମାଗାଜିନ 1ଟି, ଭିଏଚଏଫ ସ୍କାନର 2ଟି, ଅପଟିକାଲ ସାଇଟ 1ଟି, ଟିଫିନ ବମ 1ଟି, ଗନ ପାଉଡର 100ଗ୍ରାମ, କର୍ଡେକ୍ସ ୱେୟାର ଓ ଫ୍ଲେକ୍ସି ୱେୟାର, ମାଗାଜିନ ପାଉଚ ଏବଂ ଫ୍ଲାସ ଲାଇଟ ଭଳି ଅନେକ ସାମଗ୍ରୀ ।
ଭୁବନେଶ୍ବରରୁ ତାପସ ପରିଡା ଓ ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
