ଭୁବନେଶ୍ବର: ଆସନ୍ତାକାଲି(ଶନିବାର) ପ୍ରକାଶ ପାଇବ ପୌର ନିର୍ବାଚନ ଫଳ । ଏନେଇ ଆଜିଠୁ ଆକଳନ ଆରମ୍ଭ କରିଦେଇଛନ୍ତି ସମସ୍ତ ରାଜନୈତିକ ଦଳ । ତେବେ ୩ ମହାନଗର ନିଗମ କାହା ସପକ୍ଷରେ ଯିବ ତାହାକୁ ନେଇ ଆରମ୍ଭ ହୋଇଯାଇଛି ମାନସ ମନ୍ଥନ। ଏନେଇ ଆସିଛି ବିଭିନ୍ନ ରାଜନୈତିକ ଦଳର ନେତାଙ୍କ ପ୍ରତିକ୍ରିୟା । କଂଗ୍ରେସ ୧୭ଟି ପୌର ପରିଷଦ ଦଖଲ କରିବାକୁ ଥିବା ବେଳେ ଦ୍ବିତୀୟ ସ୍ଥାନରେ ରହିବ ବୋଲି କହିଛନ୍ତି ସୁର । ନବୀନ ସରକାର ଟଙ୍କା ଦେଇ ଭୁବନେଶ୍ବରକୁ କିଣି ନେଇଥିବା ସେ ପ୍ରତିକ୍ରିୟାରେ କହିଛନ୍ତି ।
ସେପଟେ ନିର୍ବାଚନରେ ବିଜେପି ୩୦ରୁ ୩୫ଟି ପୌର ପରିଷଦ ଦଖଲ କରିବ ବୋଲି କହିଛନ୍ତି ବିଜେପି ବିଧାୟକ ବିଷ୍ଣୁ ସେଠୀ । ଦଳ ସିଟ୍ ସଂଖ୍ୟାରେ ହୁଏତ କମ ହୋଇପାରେ ହେଲେ ଭୋଟ ପରିମାଣରେ କମରେ ନଥିବା ସେ କହିଛନ୍ତି । ନିର୍ବାଚନ ଭଲ ହେବ ବୋଲି ସେ ଆଶା କରିଥିବା କହିଛନ୍ତି ।
ସେହିପରି କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର କହିଛନ୍ତି ଗଣତି ପରେ ରେଜଲ୍ଟ କଣ ହେବ ଜଣାପଡ଼ିବ । ବହୁତ ସ୍ଥାନରେ କଂଗ୍ରେସ ଭଲ ଫାଇଟ କରିଛି । ସେପଟେ ବିଜେଡି କହିଛି ପଂଚାୟତ ନିର୍ବାଚନ ପରି ହେବ ପୌର ନିର୍ବାଚନର ଫଳାଫଳ । 95 ପ୍ରତିଶତ ଆସନ ହାତେଇବ ବିଜେଡି । ଫିଲଡ଼ରେ ବିରୋଧୀ ନଥିଲେ ବୋଲି ବିଜେଡି ବିଧାୟକ ରାଜକିଶୋର ଦାସ କହିଛନ୍ତି ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
