ସରିଲା ସଜବାଜ, ରଜ ପାଇଁ ପୁରପଲ୍ଲୀ ଚଳଚଞ୍ଚଳ

ରାତି ପାହିଲେ ରଜ। ଓଡ଼ିଶାର କୃଷିଭିତ୍ତିକ ପର୍ବ ରଜ ପାଇଁ ଗାଁଠୁ ସହର ସବୁଆଡେ ଚାଲିଛି ଆୟୋଜନ । ରଜକୁ କିଭଳି ଭାବରେ ଧୁମଧାମରେ ପାଳନ କରାଯିବ, ପିଠାପଣା ତିଆରି ହେବ ଓ କିଭଳି ପୋଷାକ ପରିଚ୍ଛେଦ କିଣାଯିବ ସେନେଇ ଆୟୋଜନରେ ଲାଗିପଡିଛନ୍ତି କୁଆଁରୀ ଝିଅ ।

ଭୁବନେଶ୍ବର: ମାଟି ଓ ମୌସୁମୀର ମିଳନର ପର୍ବ ରଜ, କୁଆଁରୀ ଝିଅର ପର୍ବ ରଜ । ରାତି ପାହିଲେ ଓଡିଶାର ଗଣପର୍ବ ରଜ । ପିଠା ଖାଇ, ଦୋଳି ଖେଳି ରଜ ପାଳିବେ କୁଆଁରୀ କନ୍ୟା । ରଜ ଦୋଳି କଟମଟ ଗୀତରେ ବନସ୍ତ ଉଛୁଳିବ । ଏଥିପାଇଁ ଚଳଚଞ୍ଚଳ ହୋଇଉଠିଲାଣି ପୁର ଠାରୁ ପଲ୍ଲୀ । ସବୁଠି କେବଳ ଆନନ୍ଦ ଆଉ ଉତ୍ସାହ। ରାଜ୍ୟରେ ମୁଖ୍ୟତଃ 3 ଦିନ ଦିନ ଧରି ରଜ ପାଳନ ହେଉଥିବା ବେଳେ ସବୁଠି ପ୍ରସ୍ତୁତି ଜୋରଦାର ଚାଲିଛି । ଗାଁ ହେଉ କି ସହରର ରଜ ପାଳିବାକୁ ସଭିଏଁ ଚାତକ ଭଳି ଅନେଇ ରହିଥାନ୍ତି । ଚଳିତ ଥର ବାତ୍ୟା ଫନି ଉପକୂଳ ଓଡିଶାର ବିଭିନ୍ନ ଅଞ୍ଚଳରେ ବ୍ୟାପକ କ୍ଷତି କରିଥିଲେ ବି ଫିକା ପଡିନି ରଜ ବଜାର । ତେବେ ଆସନ୍ତୁ ଜାଣିବା ରାଜ୍ୟରେ ବିଭିନ୍ନ ଅଞ୍ଚଳରେ କେମିତି ଚାଲିଛି ରଜ ପ୍ରସ୍ତୁତି ।

ଭୁବନେଶ୍ବର: ଓଡ଼ିଶାର ଗଣ ପର୍ବ ଭାବେ ପରିଚିତ ରଜ ମହୋତ୍ସବ। ଗାଁ ଠୁ ସହର ବେଶ ଉତ୍ସାହ ଓ ଉଦ୍ଦୀପନାର ସହିତ ପାଳନ କରାଯାଏ।କିନ୍ତୁ ଧୀରେ ଧୀରେ ସହରୀ ସଭ୍ୟତା ଓ ଆଧୁନିକତାର ଚାକଚକ୍ୟ ଭିତରେ ପରମ୍ପରା ଓ ପ୍ରଥାକୁ ଭୁଲି ଯାଉଥିବା ବେଳେ ଏହାକୁ ଉଜ୍ଜୀବିତ କରି ରଖିବା ପାଇଁ ଓଟିଡିସି ପକ୍ଷରୁ ପ୍ରୟାସ କରାଯାଇଛି।

ପ୍ରତିବର୍ଷ ଭଳି ଓଡିଶା ଆସୁଥିବା ପର୍ଯ୍ୟଟକଙ୍କୁ ଆକୃଷ୍ଟ କରିବା ଲକ୍ଷ୍ୟରେ ବିଭିନ୍ନ ପାନ୍ଥନିବାସରେ ରଜ ମହୋତ୍ସବ ପାଇଁ ସ୍ୱତନ୍ତ୍ର ବ୍ୟବସ୍ଥା ସ୍ୱରୂପ ରଜ ଦୋଳି ଲଗାଯାଇଛି। କେବଳ ଭୁବନେଶ୍ୱର ନୁହେଁ କଟକ,ଚାନ୍ଦିପୁର, ଗୋପାଳପୁର,ସମ୍ବଲପୁର, ରାଉରକେଲା, ବଡ଼କୁଳ ଓ ପାରାଦୀପ ସ୍ଥିତ ପାନ୍ଥନିବାସରେ ରଜ ଦୋଳିର ବ୍ୟବସ୍ଥା କରାଯାଇଛି ।

ଆହୁରି ମଧ୍ୟ ଏଠାରେ ରଜରେ ହେଉଥିବା ବିଭିନ୍ନ ପ୍ରକାର ପିଠାପଣା ପୋଡପିଠା, ଆରିଶା ,କାକାରା, ମଣ୍ଡା ସହିତ ରଜ ପାନର ମଜା ନେବାପାଇଁ ବ୍ୟବସ୍ଥା କରାଯାଇଛି। ଯାହାକି ସୁଲଭ ମୂଲ୍ୟରେ ଲୋକମାନେ ଏଠାରେ ପାଇଁ ପାରିବା ସହିତ ରଜ ଦୋଳିର ମଜ୍ଜା ନେଇ ପାରିବେ ବୋଲି କହିଛନ୍ତି ରାଜ୍ୟ ସଂସ୍କୃତି ଓ ପର୍ଯ୍ୟଟନ ବିଭାଗ ସଚିବ ବିଶାଳ ଦେବ।

ଜଗତସିଂହପୁର: ରଜ ପ୍ରସ୍ତୁତି ପାଇଁ ଜଗତସିଂହପୁର ଜିଲ୍ଲାରେ ମଧ୍ୟ ଚାଲିଛି ଜୋରଦାର ପ୍ରସ୍ତୁତି । ରଜ ପାଇଁ ଦୋକାନ ବଜାରରେ ଲାଗିଛି ଖଚାଖଚ୍ ଭିଡ । ଧନି ହେଉ କି ଗରିବ ରଜ ପର୍ବ ପାଳନ ପାଇଁ ସମସ୍ତଙ୍କ ମନରେ ଆନନ୍ଦ ଉତ୍ସହ। ଖାସ କରି ପୋଷାକ ଓ କସମେଟିକ ଦୋକାନରେ ନାହିଁ ନଥିବା ଭିଡ। ଗ୍ରାହକଙ୍କ ଚାହିଦା ଦେଖି ବିଭିନ ଶୋରୁମ ମାଲିକ ମାନେ ମଧ୍ୟ ଆକର୍ଷଣୀୟ ଅଫର ଦେଇ ନିଜ ଆଡକୁ ଆକର୍ଷିତ କରୁଛନ୍ତି। ଏଥିରେ ବାଦ ପଡିନାହାନ୍ତି ଖୁଦ୍ର ବେବସାୟୀ।

ଫୁଟପାତରେ ସେମାନେ ପସରା ମେଲେଇ ଦେଇଛନ୍ତି। ରଜ ବଜାରରେ ଫଳର ଚାହିଦା ବି ଅଧିକ। ଲୋକେ ଆମ୍ବ ପଣସ ସପୁରୀ ଦର ଆକାଶ ଛୁଆଁ ହୋଇଥିଲେ ବି ଲୋକେ ରଜ ପାଇଁ ଚଢାଦରରେ କିଣୁଥିବା ଦେଖିବାକୁ ମିଳିଛି। ଆଜି ସଜବାଜ ଥିବାରୁ ଗାଁ ଗହଳିରେ ରଜ ମଉଜ ପାଇଁ ପ୍ରସ୍ତୁତି ଶେଷ ପର୍ଯ୍ୟାୟରେ।

ଫୁଲବାଣୀ: ରଜକୁ ନେଇ କନ୍ଧମାଳ ଜିଲ୍ଲାରେ ଚାଲିଛି ଜୋରଦାର ପ୍ରସ୍ତୁତି । ଫୁଲବାଣୀରେ କୁମାରୀମାନେ ରଜ ଗୀତ ଓ ନୃତ୍ୟରେ ଝୁମୁଥିବା ବେଳେ ଆସନ୍ତା ତିନି ଦିନ ପାଇଁ ପ୍ରସ୍ତୁତି କରୁଛନ୍ତି । ବନସ୍ତେ ଡାକିଲା ଗଜ ଓ ଏମିତି ଅନେକ ରଜ ଗୀତ ଓ ନାଚ ଅଭ୍ୟାସ ରେ ଲାଗିଛନ୍ତି।

ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଜଗତସିଂହପୁରରୁ ସୁଶାନ୍ତ ପାତ୍ର ଓ କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ