ଭୁବନେଶ୍ବର: ସ୍କୁଲ ଶିକ୍ଷା ଗୁଣବତ୍ତା ସୂଚକାଙ୍କ ରିପୋର୍ଟ ଉପସ୍ଥାପନ କରିଛି ନୀତି ଆୟୋଗ । ପ୍ରଥମଥର ପାଇଁ ନିତି ଆୟୋଗ ପକ୍ଷରୁ ପ୍ରସ୍ତୁତ କରାଯାଇଛି ସ୍କୁଲ ଏଜୁକେସନ କ୍ବାଲିଟି ଇଣ୍ଡେକ୍ସ ରିପୋର୍ଟ । ଦେଶରେ ଥିବା ସମସ୍ତ ରାଜ୍ୟଗୁଡିକର ଶିକ୍ଷାର ମାନ ନିର୍ଦ୍ଧାରଣ କରି କେଉଁ ରାଜ୍ୟ ଶିକ୍ଷା କ୍ଷେତ୍ରରେ କେତେ ଉପଲବ୍ଧି କରିପାରିଛନ୍ତି ତାହା MHRD,ବିଶ୍ବ ବ୍ୟାଙ୍କ,ନୀତି ଆୟୋଗ ମିଳିତ ଉଦ୍ୟମରେ ରିପୋର୍ଟ ପ୍ରସ୍ତୁତ ହୋଇଛି ।
ନିତି ଆୟୋଗ ପକ୍ଷରୁ ସ୍କୁଲଶିକ୍ଷା ଗୁଣବତ୍ତା ରିପୋର୍ଟରେ ୨୦ଟି ବଡ଼ ରାଜ୍ୟ ଓ ୮ଟି ଛୋଟ ରାଜ୍ୟମାନଙ୍କୁ ନେଇ ମାନ୍ଯତା ପ୍ରକାଶ ପାଇଛି । ଦୁଇଟି ପର୍ଯ୍ୟାୟରେ ମାନ୍ୟତା ପ୍ରକାଶ ପାଇଛି । ପ୍ରଥମଟି ହେଲା Overall performance rank ଓ ଦ୍ବତୀୟଟି ଇଂକ୍ରିମେଣ୍ଟାଲ ପରଫରମାନ୍ସ ରାଙ୍କିଙ୍ଗ ।
Overall performance rank ରେ ପ୍ରଥମ 10 ରାଜ୍ୟରେ ଓଡିଶାର ସ୍ଥାନ ନାହିଁ । ତେବେ ମାନ୍ୟତାର ପ୍ରଥମ ସ୍ଥାନରେ କେରଳ ଥିବାବେଳେ ରାଜସ୍ଥାନ ଦ୍ବିତୀୟ, କର୍ଣ୍ଣାଟକ ତୃତୀୟ ସ୍ଥାନରେ ରହିଛି । ଆନ୍ଧ୍ରପ୍ରଦେଶ ଚତୁର୍ଥ ସ୍ଥାନରେ ରହିଥିବାବେଳେ ଓଡିଶା ଦ୍ବାଦଶ ସ୍ଥାନରେ ରହିଛି । ସେହିଭଳି Incremental Performances Ranking ରେ ଓଡ଼ିଶା ଚତୁର୍ଥ ସ୍ଥାନରେ ରହିଛି ।
ଅତ୍ୟନ୍ତ ନୈରାଶ୍ୟଜନକ ତାଲିକାରେ ମଧ୍ୟପ୍ରଦେଶ, ଝାଡ଼ଖଣ୍ଡ, ବିହାର, ପଞ୍ଜାବ, ଜମ୍ମୁ-କଶ୍ମୀର ଏବଂ ଉତ୍ତରପ୍ରଦେଶ ରାଜ୍ୟ ସାମିଲ ଅଛି । ରାଜ୍ୟମାନଙ୍କର ୨୦୧୭-୧୮ର ଡାଟା ଅନୁସାରେ ସ୍କୁଲରେ ଛାତ୍ରଛାତ୍ରୀମାନଙ୍କ ଲର୍ଣ୍ଣିଂ ଆଉଟକମ୍ ଆଧାରରେ ଏହି ମୂଲ୍ୟାଙ୍କନ କରାଯାଇଛି ।
୩୦ଟି ବିଭିନ୍ନ ପ୍ରକାରର ସୂଚକାଙ୍କ ସହିତ ୬ଟି ମାନଦଣ୍ଡକୁ ସାମିଲ କରାଯାଇ ରିପୋର୍ଟ ଚୂଡ଼ାନ୍ତ କରାଯାଇଛି । ଶିକ୍ଷାର ଗୁଣବତ୍ତା, ଛାତ୍ରଛାତ୍ରୀମାନେ ଗ୍ରହଣ କରିଥିବା ଶିକ୍ଷାର ସ୍ତର, ସ୍କୁଲରେ କିଭଳି ଶିକ୍ଷାଦାନ ଦିଆଯାଉଛି, ଶିକ୍ଷା ପାଇଁ ଆବଶ୍ୟକୀୟ ଭିତ୍ତିଭୂମି ଓ ପ୍ରଶାସନ ଭଳି ମାନଦଣ୍ଡ ମାନ୍ୟତା ପାଇଁ ନିର୍ଦ୍ଧାରଣ କରାଯାଇଛି ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
